Gálatas 5

1 Crisht bicy mi nu wayubaê ic leey zeê de ub na. Orzeê nap bicy yac der nu de coz nu bicy mi, nunu cueê shet ic der nu gyub ic leey zeê der tuubaê tir. 2 Bzuub gyidag der ne̱ ya̱, Baly, gun ne̱e̱ de riidz ii lo der: Benu zaan der nu caa mbecy beey sircunsision cuerp ni der, orzeê par de ru se laê la cyiiñ Crisht. 3 Ya̱ ne̱e̱ lo der tuubaê tir: Benu ca na mbecy zaan yu nu caa dey beey sircunsision cuerp niy, orzeê yu zeê rlagy ñi nu gyicy yac yu nu dela leey ni Moisees par nu gyanap yu lo Ãgyoozh. 4 De ru mbecy nu rnii too nu gyanap lo Ãgyoozh nu nac leey zeê, de ru bi bruu chu der lo Crisht. Ãgyoozh wayicy mi faboor num der. 5 Zeê de ub na, par nu nac Espiriit Yon ni Ãgyoozh nunu par nu nac nu ricy cup den consuel lo Crisht, ndeê nu drish lo den lo Ãgyoozh nu gyanap den lom. 6 Gun benu nac du den Crisht, se la la cyiiñ nu ca beey sircunsision cuerp ni den, nunu niê ziêl se la la cyiiñ ñi mas sac beey sircunsision zeê cuerp ni den. Coz nu cyiiñ, ndeê nu gyicy cup den consuel lo Crisht. Nunu par nu nac ndeê rca den Ãgyoozh, nunu rcaa gaê den losaên. 7 De ru tonaê la nap bicy der. Na, ¿cyu bicy nu guca der nu ricy yac ru nu de coz rishli? 8 Walab ni bicy Ãgyoozh, biñ nu bzu der par nu gac ru mbecy nim. 9 Benu ri tub mbecy nu radza lat der, orzeê yu zeê nay gal nu na lebadur. Gal nu lebadur rbic ñi fers ni dela cub gyishtily, niê ziêl ricy yu zeê nu rnu dela de ru. 10 Tees ya̱, ricy cupa̱ consuel lo Shuaan den Jesuuz. Ndeê nu ya̱ rnii to̱o̱ nu de ru rila washaê der reñaê shcab, nunu de mbecy nu ricy deet lat der, de yu zeê Ãgyoozh cuic mi cashtig ni dey. Ni gyicy num yu mas cyur mbecy nac yu. 11 Yuê mbecy rnii dey nu ya̱ rlyu̱u̱ nu ca beey sircunsision cuerp ni mbecy. Benu ni ricya̱, orzeê ¿lagu rshet zi dey ya̱, beni? Benu ni bicya̱, orzeê wazi lagy de mbecy lo̱ ornu rshaala̱ de riidz ni de coz nu bzac Crisht lo cruuz. 12 Tees par de mbecy nu ricy deet lat der nu nac leey ni sircunsision, nap zir benu gyicy capo̱o̱ dey ub yu tub tir ziêl. 13 Der bicy na, Ãgyoozh bloo sum de ru par nu gac der mbecy nu wayubaê ic de leey zeê. Orzeê cueê cuic der lugaar ni ub ru nu gyicy der de gusht a̱ê nap, par nu nac nu bi bla der ni de leey zeê. Sinu de mod la par nu nac nu rca der losaêr, orzeê bicy der coz nu galagy deê zir dey. 14 Gun benu ricy yac der nu tub zi riidz, orzeê ricy yac der dela coz nu ca lo leey zeê. Riidz zeê, ndeê: “Pca der losaêr gal nu rcar ub ru”, rniiñ. 15 Tees benu de ru gyicy der gal nu ricy bañcyug dañ, cucuaê der nunu gow der losaêr, orzeê gnu der de losaêr. 16 Coz nu rne̱e̱ ndeê nu bzaan der nu gyub ic Espiriit Yon ni Ãgyoozh der nunu cueê shet ic der nu gyicy ru de gusht a̱ê nap. 17 Gun de gusht a̱ê nap zeê zañ contr ni coz nu rlagy Espiriit Yon ni Ãgyoozh, nunu coz nu rlagy Espiriit Yon nim za gaêñ contr ni de gusht a̱ê nap zeê. Lo cyup de coz zeê zañ contr ni losaêñ. Nunu ndeê nu wagac gyicy der coz nu rlagy ub der. 18 Tees benu Espiriit Yon ni Ãgyoozh riib ic mi de ru, orzeê leey zeê walabaêñ riib ic ñi der. 19 Naal la gad lagy na la na coz nu druu lo de gusht a̱ê nap zeê. Druu nu ral dey losaêy nu wanchelaay, ricy dey coz a̱ê nap, ricy dey coz nu walab seêñ. 20 Nunu driib zily dey nab. Ricy tuê dey losaêy. Rzi lagy dey lo losaêy. Ricy dey nu deet rzuê losaêy. Ricy saap dey ich losaêy. Nac dey mbecy dzaê ic. Zu dey shcab nu ded loy lo losaêy. Ricy dey nu yacyup nac de mbecy nu losaêy. 21 Nac dey mbecy lagy saap. Nac dey mbecy rzugy. Row shaad dey de coz nu a̱ê yadaêñ nu gow dey. Benu de coz a̱ê nap zeê gyub ic ñi mbecy, orzeê dela ndeê ricy dey, nunu yuê zir coz nu na gal nu na de ndeê ricy dey. Na ya̱ rdo̱o̱ rishlo der nu gyicy cuidad der ub ru, gal nu bi mne̱e̱ lo der anzir. Dela de mbecy nu ricy de coz zeê rila wazac dey lo gyel gubier ni Ãgyoozh. 22 Zeê benu Espiriit ni Ãgyoozh riib ic mi mbecy, orzeê rca dey losaêy. Zu cyit lagy dey. Yuê gyel ri zu nañ lardoo dey. Nac dey mbecy pase̱z. Nunu nap ricy nu dey losaêy. Nac dey mbecy nap. Ricy yac dey nu de riidz nu rniiy. 23 Nunu wagyicy lily dey ub yu. Nunu nap riib ic dey ub yu. Dela de nu ndeê ricy mbecy benu Espiriit Yon ni Ãgyoozh riib ic mi dey. Nunu sac ni tub la leey nu chañ contr ni de coz zeê. 24 De mbecy nu bi nac ni Jesucrisht, orzeê ndeê nañ gal nu na nu bi gut dey lo cruuz nu Crisht. Orzeê walabaê de coz a̱ê nap zeê riib ic ñi dey. Ni wagyubaê ic de coz nu rlagy ub ziêl dey nañ lardooy. 25 Como de ub na cui mbañ na par nu nac de coz nu ricy Espiriit Yon ni Ãgyoozh, orzeê rlagy ñi nu shet ic na nu gyub ic mi den. 26 Walagy ñi nu gac den mbecy leê. Ni walagy ñi nu caa yuu den losaên. Ni walagy ñi nu gazaap lagy den nu nac losaên.