Gálatas 4

1 De coz nu rlagya̱ ne̱e̱, ndeê de nu nii: Benu tub mbecy gat yu, nunu zeeñ yu gyel nap niy yaa iêñ yu lat nu miiñ yu, mas rishli gaal nac yu shuaan dela gyel nap zeê, tees gyicy nu dey yu gal nu ricy nu dey moz por fers la. 2 Lat nu miiñ yu, yuê mbecy nu rña dey yu nguzh zeê, nunu yuê gaê mbecy nu ryub ic yu de coz nu ricy cup yu nguzh zeê. Ni gyicy dey gashtal shuub la dzi gal nu mnii gyitoo uz yu. 3 Niê ziêl mod rac nu de ub na. Gulas de coz nu blyuu mbecy ni gyishlombecy ii, ndeê ziêl byub ic ñi de ub na. 4 Tees ornu pshuub tiem nu Ãgyoozh mniim, orzeê bzuu nez mi Iêñ mi biid mi. Gul mi ni tub biñ mñaa, nunu pcyiiñ mi lat leey nu bzeeñ Moisees. 5 Biid mi bicy mi nu bla den ni leey nu pcyiiñ den lat zeê gulas, gun orzeê Ãgyoozh bicy iêñ mi de ub na. 6 Par nu gabe nu nac den iêñ mi, orzeê bzeed mi Espiriit Yon ni Iêñ mi nu cyiiñ mi nañ lardoo den. Espiriit zeê rniim: “Ãgyoozh, Uza̱”, rniim. 7 Orzeê na a̱ê nacaê den moz por fers ni leey zeê, sinu na nac den iêñ Ãgyoozh. Na como bi nac na iêñ mi, orzeê cuic mi dela gyel nap nim ni den. 8 Gulas wangad lagy der cyu Ãgyoozh. Orzeê bicy yac der dela coz nu rlagy de ñgyoozh nu walab ñgyoozh nu rishli. 9 Tees na bi yuê lo der Ãgyoozh. O nap zir nu ne̱e̱ nu Ãgyoozh yuê lom de ru. Orzeê na ¿lagu rlagy der gash ru leey nu wacyiiñ zeê par nu gyub ic ñi de ru tuubaê tir? 10 De ru, yuê dzi gabee ricy zily der ñii. Nunu yuê gaê beey nu ricy zily der. Yuê tiem nu niê ricy zily der. Nunu niê ziêl yuê gaê ñaên nu ricy zily der ñii. 11 ¡Ya̱ tonaê la rdziba̱ nu leew la bicya̱ riiñ ni Ãgyoozh lat der! 12 Der bicy na, ya̱ rnishbaa lo der nu gyicy der gal nu ya̱ ricya̱. Niê ricya̱ uba̱ par mbecy nu na gal nu na de ru. De ru rila walab nu shiñ bicy nur ya̱. 13 De ru rad lagy der nu tir loga la nu pshaala̱ riidz ni Crisht lat der, orzeê guud mod nu gyicya̱ ñii nu nac nu gurata̱ tub güii tiem zeê. 14 Mas güiñ lagy der güii nu gurata̱, tees wansu chu der ya̱, nunu wangüii naañ der lo̱, sinu “O” mnii der nu cyiiña̱ lat der. Gal nu rnii der lo tub anc ni Ãgyoozh ni mnii der lo̱. Mnii der lo̱ gal nu rnii der lo ub la Jesucrisht. 15 De ru tonaê la bet lagy der. Zeê na, ¿la coz bzac der? Ya̱ gac ne̱e̱ tub coz par nu gyabica̱ gyel mbecy ni der. Bi bicy na nu ñgyac, mas gashtal urlo der mboor nu mbic ru ne̱. 16 Zeê na ¿a byaca̱ losaê yuu der nu nac nu rne̱e̱ de coz rishli? 17 Deê zir de mbecy zeê dzi zu dey shcab nu nac de ru. Par walab nu rishli rlagy dey nu gruu nap der, sinu coz nu rlagy dey, ndeê nu gyareñ de ru nu de̱ ya̱, gun orzeê niê de yu zeê rlagy dey nu de ru gzu der shcab nu nac dey. 18 Na ndeê tub coz nap nu gzu den shcab nu nac de losaên benu rishli rlagy den nu gruu nap dey. Tees napaê benu ni gyicy de mbecy zeê dub laa tiem, cueê ornu zu̱ ziêla̱ lat der. 19 De ru yu feñ ne̱, tuubaê tir ya̱ rzaca̱ gal nu rzac tub biñ mñaa ornu gaal mi mdoo. Tonaê la rzac deeta̱. Gashtal gyac la der gal nu na Crisht, orzeê checa̱ nu rzac deeta̱. 20 ¡Bi guc nu gac bi zu̱ lat der na na la, orzeê gac ne̱e̱ lo der! ¡Na wagad lagya̱ ca na coz nu nii to̱o̱ nu nac de ru! 21 Zeê de ru, mbecy nu rlagy gyub ic leey zeê, ya̱ rlagya̱ dugyi̱ê tub coz lo der: ¿walab gaal wagad lagy der de coz nu rnii leey zeê? 22 Rniiñ nu zu cyup iêñ Abraham. Tub yu gul yu ni tub biñ mñaa nu nac moz por fers la niy. Zeê tuubaêy gul yu ni mñaa gaal yu, tub biñ mñaa nu a̱ê nac moz por fers la. 23 Mod nu gul iêñ moz por fers la zeê, mod zeê ral cualcyer la mbecy gyishlombecy ii. Zeê iêñ biñ mñaa nu a̱ê nac moz zeê, yu zeê gul yu par nu nac nu Ãgyoozh mniim nu segur la cuic mi tub iêñ Abraham yu gyeey. 24 Riidz zeê cyiiñ ñi par nu gad lagy na lac gyicy na. Lo cyup de biñ mñaa zeê, ndeê cyup trat nu bicy Ãgyoozh num de ub na. Biñ nu nac moz por fers la zeê, mi zeê lam Agar. Mi zeê yaruum trat nu guud bicy Sinaí. De mbecy nu ricy cup trat zeê, de yu zeê nac yu moz por fers la. 25 Agar yaruum bicy Sinaí nu zub lugaar nu la Arabia. Niê ziêl mi zeê yaruum mbecy gyedz Jerusaleeng gal mod nu yuê dey na. De mbecy nu yuê gyedz zeê nac dey moz por fers la ni de leey zeê. 26 Zeê biñ mñaa nu a̱ê nac moz zeê, mi zeê nu la Sara. Mi zeê yaruum gyedz Jerusaleeng, zeê nu riib ic Ãgyoozh, nunu de ub na nac dun trat nu yaruuñ Sara. 27 Gun Ãgyoozh mniim tub riidz nu sñuu ga saap ñi de nu ndeê ornu nam: Bet lagy ru biñ mñaa nu wagac gaal mdoo. Brish ti la nu nac nu dzi yet lagy ru, ru biñ nu rila wangad lagy lac rac ni güii ni mdoo. Gun biñ mñaa nu byeeñ ub zi, dzi zir chuê iêñ mi gazeê biñ mñaa nu zu ñgyee. 28 Na de ru bicy na, de ru nar gal nu na Isaac, iêñ biñ mñaa nu a̱ê nac moz, gun nac der iêñ Ãgyoozh par nu nac de riidz nu mniim nu segur la gyicy mi. 29 Gulas yu nu gul mod ni cualcyer la mbecy zeê bicy ras nuy yu nu bicy Espiriit ni Ãgyoozh nu gul. Niê ziêl rac tiem na. 30 Tees ¿lac rniiñ lat de riidz ni Ãgyoozh? Orzeê rniiñ: “Cyuu nur biñ mñaa nu nac moz por fers la zeê nu iêñ lam. Gun iêñ mi zeê wac gyash yu de gyel nap ni uz yu, sinu iêñ biñ mñaa nu a̱ê nac moz zeê, yu zeê gyash yu de gyel nap ni uz yu”, rniiñ lat de riidz ni Ãgyoozh. 31 Orzeê der bicy na, de ub na a̱ê nac naa iêñ moz por fers la zeê, sinu nac naa iêñ biñ mñaa nu a̱ê nac moz zeê.