2 Corintios 7

1 Orzeê der bicy na, como Ãgyoozh bi mniim zañ riidz nu segur la gyicy mi, ndeê nu rlagy ñi nu chuê den nu gyel cacy. Rlagy ñi nu ruu chu den lo de coz nu gyicy ñi nu gabag cuerp nin nunu tant espiriit nin. Nunu rlagy ñi nu zu chu den ub na par nu gyicy na coz nu rlagy Ãgyoozh ziêl nu nac nu rca lagy den lom. 2 ¡“O” mnii der ne̱ de̱ nañ lardoor! Gun rila wangyicy de̱ coz a̱ê nap nu ni tub la mbecy. Ni wangyicy de̱ nu gat lo ni tub la mbecy. Ni wanguu de̱ ni tub la mbecy. 3 Walab nu ni rne̱e̱ lo der nu riiba̱ cyi ic der. Gun tonaê la rca̱ de̱ ru. Ndeê nu rlagya̱ cyiiña̱ tublaazh nu de ru, nunu ornu gat de ru, orzeê niê ziêl rlagya̱ gata̱ tublaazh nu de ru. 4 Ya̱ tonaê la ricy cupa̱ consuel lo der, nunu yet lagya̱ nu nac der. Lat dela gyel deet nu rzac de̱, ya̱ ricy cupa̱ baloor nunu dub gal rii la lagya̱ yet lagya̱. 5 Nese lat nu bri̱ de̱ lo de yu ni Macedonia, rila wangad nu zu lagy de̱, sinu dela lugaar nu gua̱ de̱ yuê gyel deet. Yuê rucoo nu mbecy de̱ ya̱ dela zeê nu rdeda̱. Orzeê yuê rdzib de̱ nañ lardo̱o̱. 6 Tees Ãgyoozh, biñ nu rbic baloor ni mbecy nu a̱ê ricy cup baloor, mi zeê briic mi baloor ne̱ de̱ nu nac nu biid Tito lo de̱. 7 Nunu walab nu briic de̱ baloor nu nac nu bri ziêl yu lo̱ de̱, sinu niê ziêl nu nac de coz nu mniiy lo̱. Mniiy nu tonaê la briic der baloor niy. Nunu mniiy lo̱ nu tonaê la rlagy der nu zac ru de̱ ya̱. Nunu mniiy nu ricy shni der nu nac de̱, nunu rsug ic der nu nac de̱. Nunu nu nac de nu ndeê yet zir lagy de̱ na. 8 Mas gyicy nu bzeeda̱ lo der bicy ñi nu bicy shni der, tees ya̱ yet lagya̱ nu bzeeda̱ ñii lo der. Gun ya̱ anzir wangyet lagya̱ nu bzeeda̱ ñii lo der, tees na yet lagya̱. Wangyet lagya̱, gun gud lagya̱ nu bicy shni der. Tees tub miiñ ziêl bicy shni der. 9 Tees na dzi yet lagya̱. Walab nu yet lagya̱ nu bicya̱ nu bicy shni der, sinu yet lagya̱, gun mneê der dela cyir ornu bicy shni der. Gun de ru bicy shnir gal mod nu rlagy Ãgyoozh. Ndeê nu walab nu shiñ bicy du̱ de̱ der. 10 Gun benu tub mbecy gyicy shniy gal mod nu rlagy Ãgyoozh, orzeê ndeê ricy ñi nu dza mod nu gyicy yu. Nunu ndeê gyicy ñi nu gruu mbañ yu. Orzeê walagy ñi nu gyicy shni zir yu. Tees benu mbecy gyicy shniy, tees benu walab gal mod nu rlagy Ãgyoozh, orzeê ndeê gyicy ñi nu gat yu par lo Ãgyoozh. 11 ¡Tees de ru bicy shnir gal mod nu rlagy Ãgyoozh! Orzeê na güii la guc. Nu nac nu bicy shni der nap gush der shcab nu nac asunt zeê. Nunu bzu fert der nu mnii der nu sac falt nir. Bicy ñi nu pchaê ic der. Nunu bicy ñi nu gudzib der. Orzeê despuees ngulagy der nzac ru ya̱. Nunu ndeê bicy ñi nu briic der cashtig ni mbecy nu shiñ bicy zeê. Nu nac de nu ndeê bicy ñi nu rabee nu rila sac falt ni der nu nac asunt zeê. 12 Orzeê ornu bzeeda̱ gyicy zeê lo der, ndeê walab par nu nac yu nu shiñ bicy, ni walab par nu nac de yu nu gutow ni. Sinu bzeeda̱ gyicy zeê lo der par nu gyicya̱ nu gabe par lo Ãgyoozh nu dzi rzu bich der nu nac de̱ ya̱. 13 Nu nac ndeê guud baloor ne̱ de̱. Nunu walab nu briic ziêl ñi baloor ne̱ de̱ ya̱, sinu niê ziêl bet lagy de̱ nu nac nu bzaac de̱ nu niê ziêl Tito bet lagy yu, gun dela der bicy ru nu guti ri añ niy. 14 Gun ya̱ byabica̱ gyel mbecy ni der lo Tito. Nunu de ru wangyicy der nu gruu gyel mbecy ne̱ ya̱. Gal nu rishli rne̱e̱ de̱ lo der, niê ziêl rishli rne̱e̱ de̱ lo Tito ornu byabica̱ gyel mbecy ni der. 15 Nunu yu zeê dzi zir rcay de ru, ornu yezaê lagy yu nu dela der rzuub gyidag ru niy, nunu nap bicy nu der yu ornu biid yu lor. 16 ¡Orzeê tonaê la yet lagya̱ nu gac gyicy cup zaê la̱ consuel lo der!