2 Corintios 8

1 Na der bicy na, rlagya̱ nu gad lagy der la coz guc lat de mbecy ni Crisht nu yuê de gyedz ni Macedonia nu nac nu Ãgyoozh nap bicy num dey. 2 Mas tonaê la deet bzac dey nu nac de preb, tees tonaê la nap zu lagy dey. Nunu mas tonaê la gyel zi zu dey, tees wansi laa dey briic yu gun. Bicy dey gal nu ricy mbecy guaniêñ. 3 Ya̱ rishli rne̱e̱ lo der nu dub gal rii la lagy dey briic yu ca na la nu gac cuic yu. Nunu sheñ zir briic dey par nu tantaê bloo lo dey. 4 Nunu tonaê la mnishbaa dey lo de̱ nu grica̱ rishbeey nu locyuub dey deê zir yu nu rbic gun ni de mbecy ni Ãgyoozh. 5 Nap zir bicy dey par mod nu brish lo̱ lo dey. Nu loga la briic dey ub yu par nu gyicy yu de coz nu rlagy Shuaan den Jesuuz. Nu cyup briic dey ub yu par nu gyicy yu de coz nu rlagy de̱ ya̱. Ni bicy dey gun ndeê coz nu rlagy Ãgyoozh. 6 Ndeê nu bdu̱ê de̱ riiñ yaa Tito nu teêy gun zeê lat de ru, gun nu rbic der nu nac nu dzi rcar losaêr, como laab Tito, yu zeê yu nu bzuub gyiê riiñ zeê. 7 Gun de ru nap ricy der nu dela coz nu ricy ru. Nap ricy cup der consuel lo Crisht. Nap rshaal der de riidz nim. Nap rad lagy der de coz nim. Dub gal rii la lagy der ricy ru riiñ nim. Nunu nap rca der de̱ ya̱. Orzeê niê ziêl rlagy ñi nu nap gyicy der riiñ ni gun zeê nu nac nu rca der losaêr. 8 Walab nu ricya̱ mandaar lo der nu ni gyicy ru. Nomaas nu ya̱ rlagya̱ rlyu̱u̱ ni der de mod nap nu ricy deê zir mbecy, gun orzeê rica̱ tub mod nu gyicy der nu gabe nu rishli rca der losaêr. 9 Gun de ru rad lagy der de coz nap nu bicy Shuaan den Jesucrisht. Mi zeê guaniêñ mi nu nac de coz ni Ãgyoozh, tees byac mi mbecy zi nu nac de ru. Gun nu nac nu byac mi mbecy zi, orzeê de ru byaguaniêñ der nu nac de coz ni Ãgyoozh. 10 Orzeê na rica̱ consef ni der nu nac gun zeê. Ãaên bded de ru mbecy loga la nu pteê de gun zeê. Tees walab nu tub lo ziêl nu de ru nac der mbecy loga nu briic, sinu niê ziêl nu dub gusht la briic der ñii. 11 Orzeê na bzaê lo der riiñ nu bzuub der gyiê zeê dub gal nu gac ni der. Nunu dub gusht la bzaê lo der ñii gal nu bicy der nu loga la ornu mnii too der nu gyicy ruñ. 12 Gun benu tub mbecy rishli gaal rlagy yu cuic yu tub gun, orzeê Ãgyoozh “O” niim gyash mi ñii dub gal nu gac cuic yu. Gun Ãgyoozh rniim nu cuic der coz nu yuê nir, walab nu rniim nu cuic der de coz nu sac nir. 13 Walab nu rlagya̱ nu nu zac zi der par nu cuic der coz nu cyiiñ ni reñaê mbecy. 14 Sinu rlagya̱ nu gal gaa la chuê nu der deê zir mbecy. Na na la ricy cup der coz nu ricy falt ni dey. Orzeê gac locyuub der dey. Zeê ornu ruu su tuubaê tir, orzeê de yu zeê gyicy cup dey coz nu gyicy falt ni de ru. Orzeê gac locyuub dey de ru. Orzeê benu locyuub der losaêr, orzeê tub ziêl mod zu der nu de yu zeê. 15 Gun i mod za de riidz ni Ãgyoozh: Mbecy nu pteê sheñ, wanrusub sheñ niy. Nunu mbecy nu pteê ñumiiñ, wangyicy falt ñi niy. Ni rniiñ lat de riidz ni Ãgyoozh. 16 Ya̱ drica̱ gras ni Ãgyoozh, gun bicy mi nu ca ic Tito de ru gal nu ya̱ ca ica̱ der. 17 Gun walab nu tub lo ziêl nu bet lagy yu ornu bdu̱ê riiñ yaay nu cyid güiiy de ru, sinu niê ziêl bi bruu lardooy nu cha güiiy der, como nil ca ic yu de ru. 18 Nunu gzuu nez de̱ Tito tublaazh la nu tub mbecy nu nap yuê lo dela mbecy ni Crisht nu nac de riiñ nu bicy yu nu ptush las yu de riidz nu sac ni Crisht. 19 Nunu yu zeê tub mbecy nu pcui dela de mbecy ni Crisht nu cha nuy de̱ ya̱ byaj ornu cha zeeña̱ de gun zeê. Gun orzeê nu nac ndeê ca lagy mbecy lo Shuaan den Jesuuz, nunu gabe nu yet lagy den nu rlocyuub na losaên. 20 De̱ ya̱ rlagy de̱ yub de̱ tub mod nu cueê nii zi mbecy ne̱ de̱ nu nac mod nu rte̱ê de̱ de gun zañ zeê. 21 Gun ryub de̱ mod nu nap, walab tub lo ziêl par lo Shuaan na Jesuuz, sinu niê ziêl par lo de mbecy. 22 Nunu tublaazh la zuu neza̱ de yu zeê nu tuubaê bicy na nu nac Crisht. Bicy de̱ preb yu zañ tir, nunu zañ mod bicy yu nu rabee nu nac yu mbecy nu zu fert. Nunu fert zir zuy nu nac nu tonaê la ricy cup yu consuel lo der. 23 Zeê benu grusu tub mbecy nu cugyiê Tito, ben cyu nac yu, orzeê mnii loy nu yu zeê losa̱ê. Ricy nuy ya̱ riiñ ornu ricy de̱ coz nu cyiiñ par de ru. Zeê benu grusu tuubaêy nu cugyiê cyu nac deê zir de bicy na zeê, orzeê mnii lo dey nu de yu zeê mbecy nu bzuu nez de mbecy ni Crisht. Nunu ca lagy mbecy lo Crisht nu nac de yu zeê. 24 Orzeê gyicy der tub mod nu gad lagy de mbecy ni Crisht nu rishli rca der de yu zeê. Orzeê gad lagy dey nu nap ricy de̱ ornu driib zily de̱ de ru.