2 Corintios 6

1 Orzeê como tublaazh la ricy den riiñ ni Ãgyoozh, de̱ ya̱ rnishba̱a̱ de̱ lo der nu cueê zaan der nu leew la nap gyicy nu Ãgyoozh der. 2 Gun lat de riidz nim nam: Tiem nu rlagy ñi zuub gyidaga̱ ni der. Nunu dzi nu gruu mbañ der, ya̱ locyuuba̱ der, nam. Na na la, tiem nu bzat mi zeê. ¡Dzi na la dzi nu gruu mbañ der zeê! 3 Wagyicy de̱ ni tub la coz nu gyicy ñi nu gadza mbecy, gun orzeê cueê nu gnii zi mbecy ni riiñ nu ricy de̱, 4 sinu gyicy de̱ tub mod par nu gabe nu nac de̱ mbecy nu ricy coz nu rlagy Ãgyoozh. Gun ornu rzac zi̱ de̱, nu pase̱z ragye̱e̱ de̱. Ornu ricy falt la coz ne̱ de̱, orzeê ragye̱e̱ de̱. Ornu deet rac, orzeê niê ziêl ragye̱e̱ de̱. 5 Ornu rgaaz dey de̱ ya̱, orzeê ragye̱e̱ de̱. Ornu yet lag de̱ nañ yuê gyiib, orzeê ragye̱e̱ de̱. Ornu ryach mbecy, orzeê ragye̱e̱ de̱. Ornu fers ricy de̱ riiñ, orzeê ragye̱e̱ de̱. Ornu rach pcaal de̱, orzeê ragye̱e̱ de̱. Ornu ran de̱, orzeê ragye̱e̱ de̱. 6 Ricy de̱ nu gabe nu nac de̱ mbecy nu ricy coz nu rlagy Ãgyoozh nu nac de coz nu ricy de̱. Rded de̱ nu gyel cacy. Nap yet lag de̱ cuen de coz rishli ni Ãgyoozh. Ricy cup de̱ pase̱z nu losa̱ê. Yet lagy de̱ losa̱ê. Nac du̱ de̱ Espiriit Yon ni Ãgyoozh. Nunu rishli rca̱ de̱ losa̱ê. 7 Rshaal de̱ de riidz rishli ni Ãgyoozh. Nunu Ãgyoozh coz ily ricy mi nu nac de̱ ya̱. Nu nac nu byanap de̱ par lo Ãgyoozh, cyiiñ de̱ nu chuco̱o̱ nu de losaê yuum. Gac shet ya̱a̱ de̱ yu. Nunu gac ca̱ de̱ uba̱. 8 Yuê nu rca lagy mbecy lo de̱. Zeê yuê gaê nu rgüii tañ dey lo de̱. Yuê nu nap rnii dey nu nac de̱. Zeê yuê gaê nu shiñ rnii dey nu nac de̱. Ricy dey de̱ ya̱ par mbecy rguu, mas rne̱e̱ de̱ coz rishli. 9 Mas nap yuê lo dey de̱ ya̱, tees ricy dey de̱ ya̱ par mbecy nu a̱ê yuê lo dey. Mas bi yuê de̱ nu gata̱, tees gabee mbañ de̱. Mas rbic dey cashtig ne̱ de̱, tees wacut dey de̱ ya̱. 10 Rlyu nu ricy shni de̱, tees dub laa tiem nap zu lagy de̱. Rlyu nu gyel zi zu̱ de̱, tees ricy de̱ nu yaguaniêñ zig mbecy nu nac coz ni Ãgyoozh. Rlyu nu sacaê la coz ne̱ de̱, tees ricy cup de̱ dela coz nu ricy ñi presis. 11 Orzeê de ru bicy na nu yuê Corinto, de̱ ya̱ naal la mne̱e̱ lo der. Pshaal de̱ dela coz nu yuê nañ lardo̱o̱ lo der. 12 Rila wagyicy zet lagy de̱ lo der, sinu de ru ricy zet lagy der lo̱ de̱ ya̱. 13 Orzeê ya̱ rne̱e̱ lo der gal nu rnii tub mbecy nuy iêñ yu. “O” nii der ne̱ de̱ ya̱, gal nu de̱ ya̱ “O” ne̱e̱ de̱ ni de ru. 14 Cueê gyicy losaê der mbecy nu wayicy cup consuel lo Crisht. Gun mbecy nu nap ricy, wac gac losaêy mbecy nu shiñ ricy. Nunu tub zeê nu yuê yaa wac gac losaêñ zeê nu cow. 15 Gun Crisht walab tub ziêl shcab ricy cup mi nu nuras. Niê ziêl de mbecy nu ricy cup consuel lom reñaê na shcab ricy cup yu par mbecy nu a̱ê ricy cup consuel lom. 16 Nunu yuê wedz ni Ãgyoozh wangyap ñi nu gyicy cup ñi nab. Gun de ub na nac naa yuê wedz ni Ãgyoozh, biñ nu rbic gyel mbañ. Gal nu ub mi mniim: Ya̱ zu̱ lat dey, nunu chesa̱ du̱ dey. Ya̱ naca̱ Ãgyoozh ni dey. Nunu de yu zeê gac dey mbecy ne̱. 17 Orzeê bruu der lat mbecy cyi, nunu bruu chu der lat dey, na Ãgyoozh, Shuaan den. Cueê gyicy cuen der cushtom ni mbecy cyi. Orzeê ya shet ica̱ nu gyechaê der lo̱. 18 Nunu ya̱ gaca̱ uz der. Zeê de ru gac der iêñ gyeeya̱ nu iêñ fiñ mña̱a̱. Ni na Ãgyoozh Shuaan den, biñ nu gac gyicy dela coz.