San Lucas 10

1 Lulá bee nucuaê, ucañi Jesuse setenta bee beneênu, nu uxeêlanu chiucua chiucua beella nú riculu beella lunu, nú chue beella lubee eyeche cuna lubee ranchu elu chanu. 2 Nu uninu lubeella: âNeli nú nucuaêa huaxi bee bene enu niarquiê yeneê Stichiaê Diose, pero leca huaxi bee bene enu zeteê liêibeei. Enzeêe unaêcuêhua lu Diose para nú xeêlalánu bee bene enu zeteê liêibeei. 3 Uquiahua, liêá xeêla liêihua xi neca chenu nza bee sanchi leta bee bichiu. 4 La uyaêhua biti, nú nuê steneêhua niê dimi, niê steinza lucuhua nu la cuaêa xehua lubee bene lu inziu. 5 Chenu riñahua niêi tucu bene, rluti uriêihua saludar bene zeêe nú nihua lulla: “Diose liquiê nú nzuxe arquiêhua." 6 Nu tunu niêi zeêe nucuaêa bee bene enu riala nú nzuxe arquiê riaêna nú nzuxecuaê cuna bee bene zeêe che, pero tunu la yala bee bene niêi zeêe nucuaê, benchilaê zeca nucuaê cuna liêihua. 7 Uyaênatsiahua niêi zeêe, nu la yaênahua niêi por niêi bee bene, udacuhua nu hueêhua lunú liquiê beella luhua, xne bee bene enu rriêi riñaê rquiêña nú aculla. 8 Chenu riñahua tucu eyeche elu zela bee bene nú riaênahua, udacuhua nú liquiê beei luhua, 9 uriyecahua bee bene enu riti nucuaêa zeêe, nu uniêhua lubeei: “Nzeêta riñala lunú rnibiyaê Diose luhua." 10 Pero tunu riñahua tucu eyeche elu la zela bee bene nú riaênahua, uchiuêhua lu inziu nu nihua lubeei: 11 “¡Hasta yuu beêcha lachihua nú uquie cuchiuêru uriêquiru xi neca tucu seña nú né yucu arquiêhua Stichiaê Diose! Pero uriêihua beyaê nú nzeêta axula lunú rnibiyaê Diose luhua." 12 Nia luhua nú bichia nú laxu iliulabe, bee eyeche elu lá zela bee bene, nú ayaênahua, zeca beei castiya nú mase juerte, lunú zeca bee bene enu ucuaêa eyeche Sodoma. 13 ‘¡Cueêhua bee bene eyeche Corazín! ¡Nu cueêhua bee bene eyeche Betsaida! Xne tunu eyeche Tiro cuna eyeche Sidón aca bee milagro nú unga lachihua, xi tiembu achili arquiê bee bene zeêe Stichiaê Diose, nu leêca autu beei laquie natsa para nú lubeê nú nehuana nzu arquiêbeei nu aricuê beei tí equie beei xi neca seña nú ucheêe arquiêbeei lu stula beei. 14 Pero bichia chenu laxu iliulabe, másela juerte castiya nú zecahua lunú zeca bee bene eyeche Tiro cuna eyeche Sidón. 15 Leêca esquie liêihua bee bene Capernaum, la riêihua elliebacuê nú riala chuêuhua liñibe xne liêihua rialahua hasta elu mase aquié rquiê ebila. 16 ‘Nu chu ubiêyanu lubee beneênu nu uninu: âBene enu rriêi caso lunú rnihua, rriêi bee nzeêe caso liêá, nu bene enu rluachu liêihua liêá rluachu nzeêe, nu bene enu rluachu liêá rluachu nzeêe Diose enu uxeêla liêá. 17 Chenu ubenchilaê zeca setenta bee beneê Jesuse enu uxeêlanu lubee eyeche, chiquiê ñia nzu arquiêbeella nu necachi uni beella lunu: â¡Detá, hasta bee benechiquiê sucuê stichiaêru chenu rniru lunú leelu! 18 Nu uni Jesuse lubeella: âNelíêhua nucuaê, liêá ulañia nú xi neca chenu riaêla lee esquie uniti lunú rnibiyaê bezeêlu. 19 Liêá uliquia lunú rnibiyaêa luhua, para nú mase nú taêhua equie bee beêla cuna equie bee nañi lliqui, nu leêca para nú riêihua ana lunú rnibiyaê bezeêlu, nu lecaxi zecahua. 20 Pero la llilaê arquiêhua nú sucuê bee benechiquiê stichiaêhua, mejora ullilaêhua nú nzucu ichila nú leehua lu ichiê liñibe. 21 Hora zeêe chiquiê ñia utsu arquiê Jesuse equie cuendaê Espíritu Santo, nu uninu: âPaa liêilu enu rnibiyaê liñibe cuna lu iliulabe, zucu ayáa liêilu xne uzeteêlu bee bene enu lecaxi reca lunú ucachiêlu lubee bene enu reca cuna lubee bene enu rriêi beyaê. Paa scua ungae, xne scua riuê arquiêlu nú acane. 22 ‘Uliquiêla Diose Pa liñibe ye nú nibiyaêa lu ye beenú nuê. Lecati nediyaê ti neca Jesucristo Lliêñi Diose, Diose tsia nediyaê nucuaê, leêca tucutsia Jesucristo cuna bee bene enu nzeli arquiê liêinu nuêlu Diose. 23 Chequie ubiêyanu lubee beneênu, nu uninu lu liêitsia beella: âÃia nza lu cuendaê bee bene enu rlañiê lunú rlañiêhua, 24 xne nia luhua nú huaxi bee profeta cuna bee arre uniarquiê beella nú lañiê beella lunú rlañiêhua, pero né lañiê beella nucuaê. Nu uniarquiê beella nú yeneê beella nú rieneêhua pero né yeneê beella nucuaê. 25 Che utsuli tucu ulaxcuela enu reca leyê Moisés nu unilla lu Jesuse para nú riêilla preo liêinu: âMaestro, xi riala riêá para nú lucua elunehuañi nú leca xunga laxu liñibe. 26 Nu ucuaqui Jesuse lulla: â¿Xi rni leyê Moisés? ¿Nu xa rriêilu beyaê nú rnii? 27 Chequie uni ulaxcuela zeêe, rni ley: â“Uzeca liêinu enu neca Dioseêlu diquinuê arquiêlu, cuna diquinuê lunú necalu, cuna diquinuê juerzalu, cuna diquinuê elliebacuêlu, nu uzeca bee bene tucu nú secalu liêilu." 28 Che uni Jesuse lulla: âUcuaqui nzeêcalu, tunu riêilu scua, luêculu eluhuañilílu liñibe. 29 Pero ulaxcuela zeêe niarquiêlla nú yaêna nzeêcalla lunú unidichiaêlla lu Jesuse, che unilla lunu: â¿Ta bene zecaa tucu nú seêca liêá che? 30 Chequie uni Jesuse tucu ejemplu lulla: âTucu bene Israel uchiuêulla eyeche Jerusalén nu nzalla eyeche Jericó, che unaêtse bee huanaê liêilla inziu nu udiñi beei liêilla, nu ucachiê beei ye bee steneêlla hasta xuculla. Nu utsaêna beei liêilla xi neca tucu bene enu unguti. 31 Che udete tucu uleêya inziu zeêe, pero chenu ulañiê uleêya zeêe nú nuxu bene zeêe, udete chechulla nu chu nzalla. 32 Leêca enza zeêe udete tucu levita enu rriêi elietsa lubee uleêya, nu chenu ulañiê levita cuaê nú nuxu bene zeêe, udete chechulla nu chu nzalla. 33 Chequie udete tucu bene Samaria inziu zeêe, chenu ulañiêlla bene enu nuxu lu inziu zeêe, uhuaêa arquiêlla bene zeêe. 34 Nu chu uyabicalla elu nuxu bene zeêe nu uriêilla remedio elu nediêqui bene zeêe cuna aceite cuna biñu, nu ullicaêcuulla elu nediêqui bene zeêe cuna laquie. Nu chu uricuêlla bene zeêe equie burruêlla nu unguyaêlla bene zeêe elu neca posada, zeêe ubiêyalla bene zeêe. 35 Chenu uyeêe lu yuu stucu bichia nú rquiene bene Samaria nú nzialla, che udixiulla lu bene enu neca stene posada lunú seca chiucu bichia riñaê bene nu unilla lu bene zeêe: “Ubiêya benequieê, tunu riêilu huaxilá gasto lu cuendaêlla, liêá ixiua nucuaê chenu benchilaê zecaa." 36 Che uni Jesuse lu ulaxcuela enu reca leyê Moisés: ¿Taa lu chuna bee bene enu udete lu inziu zeêe uzeca bene enu udiñi bee huanaê? 37 Nu ucuaqui ulaxcuela zeêe nú unilla: âBene enu uhuaêa arquiê bene zeêe. Che uni Jesuse lulla: âUquia nu scua uriêi lu stucu bee bene. 38 Diqui nú nze riêi Jesuse seidu inziuênu uriñanu tucu eyeche, zeêe uyanu niêi tucu unaêa enu lee Marta. 39 Marta quieê rluêcunchu tucu belanchu enu lee María, nu uzucu María lu Jesuse para nú yeneênchu lunú rninu. 40 Pero Marta chiquiê rlialaênchu rriêinchu beenú rriêinchu, nu uyabicanchu lu Jesuse nu uninchu lunu: âDetá, ¿Xieê la chenu arquiêlu nú tucutsia liêá utsaêna belaa ye bee riñaê nú riêá la? Alaê uniêi lunchu nú riêinchu elietsaa. 41 Nu ucuaqui Jesuse lunchu nú uninu: âMarta, Marta, chiquiê nzenu arquiêlu lu huaxi bee riñaêlu, 42 pero nuê tucu nú máse neca equie. Maria ucañi nú máse neca equie, nu lecati caa nucuaê lunchu.