2 Corintios 4

1 Enzeêe tucu nú uhuaêa arquiê Diose liêiru nú ucañinu liêiru para nú dixiuleêeru stichiaênu lubee bene, enzeêe la llacaêru nú rriêiru scua. 2 Liêiru la riaêaru lunú netu neca nú aêchi rriêi bee bene. Nu la zequienuru bee bene, nu la cheêeru lunú neca Stichiaê Diose. Liêiru rnitsiaru Stichiaê Diose tucu nú necane. Nu leêca rriêi bee bene beyaê nú neli neca nú rriêiru ante Diose. 3 Pero nuê bee bene enu para liêibeei lecaxi seca bedichiaê nzeêcaê Jesucristo nú rixiuleêeru lubee bene, nu leêca lecaxi zibiêi para liêibeei xne la chenala beei inziuê Diose. 4 Nu bezeêlu enu rnibiyaê lu iliulabe quieê utsacuêla elliebacuê beei, liêibeei enu la niarquiê chili arquiê Jesucristo, para nú la duêllieêe bedichiaê nzeêcaênu arquiêbeei nu laca lañiêbeei lunú recanu rriêinu, liêinu enu iguale neca cuna Diose. 5 La dixiuleêeru lunú necatsia stichiaêru, liêiru rixiuleêeru lunú neca bedichiaê nzeêcaê Jesucristo lubee bene, liêinu enu rnibiyaê luaêahua. Liêiru nediyaêtsiaru nú sibiêru luhua equie cuendaê nú seêcaru Jesucristo. 6 Xne leêca liêi Diose enu unibiyaê nú chuêu ellieêe lu iliulabe chenu urecheênue, leêca liêinu uxaêlanu elliebacuaêahua para nú riaêahua beyaê xneca neca elu rnibiyaênu, elurnibiyaê nú rriaêahua beyaê equie cuendaê Jesucristo. 7 Pero luye nú recaru cuna elurnibiyaê nú rluêcuru, rluêcurune añinzuca nú necatsiaru xineca etsuyuu para nú aca achee nú ye elurnibiyaê nzeêtae lu Diose nu la yeêta elu rnibiyaêcuaê lu cuendaê liêitsiaru. 8 Nu añinzuca nú ye clasiaê dixi seêcaru pero la tsu nehuana arquiêru, añinzuca nú seêcaru nú la llela arquiêru xa riêiru, pero chu xelaêru xneca riêiru. 9 Añinzuca nú xitse rriêinu bee bene liêiru, pero la tsanaê arquiê Diose liêiru. Mase nú richiu bee bene liêiru lu yuu, pero lá atiru. 10 Catse elu nzaêaru nehuana rriêinuu bee bene liêiru, tucu nú nehuana uriêinuu bee bene Jesucristo. Pero scua rlubeêru nú nehuañi Jesucristo xne lá tsanaê arquiênu liêiru. 11 Diqui nú nehuañiru, yebee bichia nzucutsia luru nú uti bee bene liêiru equie nú necaru beneê Jesucristo nu scua rlubeêru lubee bene poder nú rluêcu Jesucristo nú leêca rluêcuru, mase nú necatsiaru bene enu ati. 12 Liêiru nzucutsia luru nú atiru equie nú rixiuleêeru stichiaê Jesucristo, pero liêihua rluêcuhua elunehuañi ante Diose lunú ubeneêlaêhua stichiaênu. 13 Lu ichiê Stichiaê Diose rni: “Lunú nzeli arquia, enzeêe unia lunú unia”, nu nee equie nú leêca nzeli arquiêru Stichiaê Diose enzeêe rixiuleêerune. 14 Xne liaêahua nediyaêahua nú Diose uriêi nú uhuañi zeca Jesucristo lu eluti, leêca liêinu riêinu nú huañi zecaêahua lu eluti tucu nú uriêinu cuna Jesucristo. Che riêi Jesucristo nú junto riñaêahua elu nzucu Diose. 15 Xne ye lunú rriêiru nu seêcaru, seêcarune para nú riêiru elietsa luhua para nú dalalá bee bene enu chili arquiê Jesucristo. Che scua huaxila bee bene enu deteê cheêtsa lu Diose, nu huaxila bee bene enu zucuê aya liêinu. 16 Enzeêe la llacaêru xne mase nú ulaxu juersaêru equie nú rriêiru lunú rriêiru, pero espírituêru yeyeêe rduê Diose juersaêe. 17 Nu liaxi nú nehuana seêcaêahua lu iliulabe quieê xne chu rlaxue nu equie nú nehuana secahua scua che atiaêahua eluxene nú liquiê Diose luaêahua liñibe, eluxene nú máse seca nu lecaê bichia nú laxu. 18 Xne liaêahua la laênaêahua bee eluxene nú nuê lu iliulabe quieê sino que liaêahua rcuaênaêahua beenú la lañiê bee bene, xne beenú rlañiê bee bene lu iliulabe quieê enta bichia nú laxu bee nucuaê, pero beenú la lañiaêahua nee, lecaê bichia nú laxue.