2 Corintios 3

1 Chenu rniru scua lazaê arquiêhua nú sucuê ayaru leêcatsia liêiru. Liêihua nediyaêhua nú la quiêña nú lubeêru tucu ichiê luhua para nú riêihua beyaê tiru, urre nacuêru tucu ichiê luhua nú riêi elietsa nú riêi bee bene beyaê nú tiru, tucu nú rriêi beelá bee bene. 2 Xne mismo liêihua necahua tucu carta para liêiru, carta nú nequie liñi arquiêru nú rlañiê bee bene nu rriêi beella beyaêe. 3 Neca xi neca nú liêihua necahua tucu cartaê Jesucristo nú uquieêeru, pero lá quieêerune cuna tinda, sino que cuna Espíritu Santoê Diose enu nehuañi, tucu carta nú la nequie lu tucu quiee xata sino que nequiene liñi arquiê bene. 4 Lunú rluêcuru confianza lu Diose equie cuendaê Jesucristo, 5 nu la riêiru elliebacuê nú nuê nú recaru rriêiru equie cuendaê liêitsiaru xne ye nú rriêiru, rriêirune cuna elietsaê Diose. 6 Nu liêinu uliquiênu nú recaêahua para nú rixiuleêahua lubee bene equie cuendaê inziu nú necuqui, nú riña bee bene lu Diose, tucu inziu cuqui nú la quiêña chenala bee bene ley nú nequie lu ichiê, sino que equie cuendaê Espíritu Santo riña bene lu Diose. Nu ley riñitsiae bee bene, pero Espíritu Santo rliquiê elunehuañiê bee bene. 7 Nu tunu ley nú riñi bee bene, ley nú udeteê Diose lu Moisés lu tucu quiee xata, nu uyuêu nú rulu siquiê lu Moisés chenu uyucu cuendalla ley cuaê, hasta nú lá acaê alañiê bee bene Israel lulla lunú chiquiê rulu siquiê lulla nu lleêna lleênaa uniti nú rulu lulla. 8 Xne tunu chenu uriña ley cuaê scua unga, nu nee. ¡Mase ñia neca nú yeneê bee bene equie inziu cuqui nú rlubeê Espíritu Santo lubee bene, nu rluêcula bee bene nú xa modo riña bee bene lu Diose! 9 Xne chenu uyuêu ley nú udeteê castiya bee bene, chiquiê ñia uriñae nu rulu siquiê uriñae, nu nee masescaêlá chiquiê ñia neca nú yeneê bee bene nú la luêcuaê bee bene dula ante Diose. 10 Xne mase nú chiquiê ñia unga chenu uriña leyê Diose lu iliulabe quieê, nu lia xi nucuaê luquelá nú chiquiê ñia neca inziuê Diose nú rluêcula bee bene nú xneca modo riña bee bene lu Diose. 11 Nu tunu ley nú la zibiê diqui tiembu chiquiê ñia ubeêtae, pero nee masescaêlá chiquiê ñia neca lu cuendaê bedichiaê nzeêcaê Jesucristo nú rixiuleêe nú xneca tsilaêa bee bene, bedichiaê nzeêcaênu nú lecaê xunga laxu. 12 Nu liaêahua nediyaêahua nú leca xunga laxu bee bedichiaê nzeca cua, enzeêe sin nú lliquiru rixiuleêeru bee bedichiaê cuaê lubee bene. 13 Nu la riêiru tucu nú uriêi Moisés nú utsacuêlla tucu laquie lulla para nú la lañiê bee bene Israel nú rulu siquiê lulla, nu che lleênaa lleênaa uniti nú rulu lulla. 14 Nu la neca nú lutsia Moisés uyacuê xi uyacuê, sino que leêca uyacuê lunú rriêi bee bene zeêe beyaê. Xne hasta bee bichia quieê chenu rula beella Stichiaê Diose nú uquieêe Moisés la riêi beella beyaê xi rnii, xne tunu chili arquiêbeella Jesucristo che yaêla elliebacuê beella nu riêi beella beyaê xi rnii. 15 Nu hasta bee bichia quieê chenu rula beella nú uquieêe Moisés, la riêili beella beyaê xi rnii nu nacuê elliebacuê beella. 16 Pero chenu sanaê arquiê bene stula bene nu nzeli arquiê bene Jesucristo liêinu xaêlanu elliebacuê beella para nú riêi beella beyaê xi rni stichiaênu. 17 Xne tucutsia neca Jesucristo cuna Espíritu Santo, nu elu nehuañi bee bene cuna Espíritu Santo lecaê xi nibiyaê lubee bene. 18 Enzeêe yeêahua lecaê xi nacuê luaêahua tucu nú ulleêca Moisés, xne liaêahua necaêahua xi neca tucu huana elu achee nú ñia neca equie cuendaê Jesucristo. Nu chabea chabea recaêahua rriaêahua tucu nú niarquiê Jesucristo nú acaêahua, nu bichia por bichia achee nú xneca rduê llieêenu arquiaêahua equie cuendaê Espíritu Santoênu.