1 Corintios 13

1 Xne tunu recaa rnia xitse bee dialu rene nú rni bee bene iliulabe cuna nú rni bee ángele liñibe, pero tunu la zeca bee saêa che necatsia xi neca tucu icuê nú rquiee urre xi neca tucu platillo nú chiquiê fuerte nza biêi. 2 Nu tunu liêá neca profeta, nu tunu aluêcua elliebacuê para nú riêá beyaê ye elliebacuê nú enta lu Diose nú lascaê riêi bee bene beyaê, urre aluêcua elliebacuê nú chiquiê reca urre tunu chiquiê nzeli arquia Diose hasta nú aca nia lu tucu dañi nú llunaêe luhuare elu nzucune, nu zucune stucu luhuare pero tunu la zecaa bee saêa lecaxi zibiê nú rriêá scua che. 3 Nu leêca tunu ritsia ye nú rluêcua lubee bene enu seca elitsi nu zelaa nú tsiquiê bee bene liêá, pero tunu la zecaa bee saêa, lecaxi zibiê nu rriêá scua che. 4 Eluseca neca nú rluêcu bene paciencia saêbene, nu rriêi nzeêca bene lusaê bene, nu la yea arquiê bee bene, nu la zucuê aya bene liêilla, nu la aca nelliñia bene. 5 Nu lacalla bene enu grosero, nu lacalla bene enu rriêitsia elliebacuê lu cuendaê eêcutsia nu lacalla bene enu nelachi nu la riêilla nú biñi arquiêlla lubeelá bee bene. 6 Nu lacalla bene enu xilaê chenu nuê xi seca saêlla sino que xilaêlla chenu nehuañi nzeêcalla. 7 Eluseca neca, nú rriquiê bene saêbene, nu nzeli arquiê bene nú rni saêbene, nu la tsu chiucu arquiê bene lusaê bene, nu la llacaê bene saê bene. 8 Eluseca, lecaxi bichia nú laxue, pero bee profeta enta bichia nú laxu beella nu leêca enta bichia nú laxu bee bene enu rni stucu dialu rene, cuna nú laxu nú reca elliebacuê bene. 9 Xne nee tunu rriaêahua beyaê lleêna, pero huaxiscaêlá rriêi nú riaêahua beyaê nu tunu necaêahua profetaê Diose leêca huaxiscaêlá rriêi para nú riaêahua beyaê equie cuendaênu. 10 Pero chenu riña bichia nú riaêahua beyaê yeene, che lecaê xi zibiê lunú recaêahua nee. 11 Chenu ungaa enduê unia xi rni bee enduê nu uriêá elliebacuê xi rriêi bee enduê elliebacuê, nu neca elliebacua xi neca elliebacuê bee enduê. Pero chenu uruêcua utsana arquia lunú necaa enduê. 12 Leêca scua la riaêahua beyaê yeene, xi neca chenu la lañiê nzeêcaêahua lu tucu huana, pero chenu riña bichia nú riñaêahua elu nzucu Diose che riaêahua beyaê yeene. Nee lleênatsia beenú rriêá beyaê pero chenu riña bichia nú riñaa elu nzucu Diose che chuluanu xi nuêlunu liêá. 13 Nuê chuna beenú leca bichia nú laxu: Tucue neca nú nzeli arquiê bene Diose, nu stucue neca nú nzucu luaêahua nú xi liquiê Diose luaêahua, nu stucue neca nú seca bene saêbene, pero lu yuna bee nucuaê máse neca equie nú seca bene saêbene.