1 Corintios 12

1 Nee nia luhua lunú rliquiê Diose lu cada tucuaêahua lunú riala riaêahua equie cuendaê Espíritu Santo, xne la niarquia nú huañiaêahua sin nú riêihua beyaê equie cuendaê bee nucuaê. 2 Liêihua nediyaêhua nú chenu lascaê chuluhua Stichiaê Diose, chiquiê uyanalahua bee enu rni bee bene luhua nú neca diose nu la ni. 3 Enzeêe nee niarquia nú riêihua beyaê, nú titse bene enu nii nú lecaxi sibiê Jesucristo, tunu rni bene scua nucuaê rlubeê nú la nzu Espíritu Santo cuna liêilla. Nu leêca niêtucu bee bene leca modo nii: “Jesucristo neca enu rnibiyaê lua.” Tunu la nzu Espíritu Santo cuna liêilla. 4 Nuê yelu beenú utsula Diose liaêahua nú riaêahua, liaêahua enu nzelila arquiaêahua Jesucristo, pero enu rliquiê nucuaê luaêahua neca tucutsia Espíritu Santo. 5 Mase urene urene riñaê nú uliquiê Diose lu cada tucuaêahua nú rriaêahua, pero lu tucutsia liêinu sibiaêahua. 6 Mase urene urene lunú recaêahua rriaêahua pero tucutsia Diose neca enu rriêi elietsa luaêahua. 7 Lu cada tucuaêahua rlubeê Diose lunú xi recaêahua cuna elietsaê Espíritu Santo para nú riaêahua elietsa lubee saêahua. 8 Xne cuna elietsaê Espíritu Santo nuê bee bene enu ungutiêlaê elliebacuê para nú ni lubee bene, leêca nuê bee bene enu ungutiêlaê elliebacuê para nú riêilla beyaê nú xneca zeteêlla bee bene. 9 Nu equie cuendaê elietsaê Espíritu Santo nuê bee bene enu la nzuchiucu arquiê lunú nzeli arquiê Diose. Nu leêca nuê bee bene enu ungutiêlaê poder nú rluêcu Diose para nú riêi yecalla bee bene enu riti. 10 Nu leêca nuê bee bene enu udeteêla Espíritu Santo poder lu para nú riêilla yelu clasiaê bee milagro. Nu leêca nuêbee bene enu udeteêla Espíritu Santo elliebacuê nú reca, para nú ixiuleêella Stichiaê Diose lubee bene, nu nuê bee saêahua enu udeteêla Espíritu Santo nú reca elliebacuê para nú riêilla beyaê tunu neli urre laca neli lunú rni bene enu rni nú rixiuleêe Stichiaê Diose. Leêca nuê beella enu udeteêla Espíritu Santo elliebacuê para nú ni yelu clasiaê dialu, nu leêca nuê beella enu udeteêla Espíritu Santo elliebacuê para nú ixiuleêe xi rni tucu dialu cuaê nu xi rni stucue. 11 Pero tucutsia Espíritu Santo rriêi elietsa lubee bene nú rriêi bee bene ye beenú rriêi bee bene, nu Espíritu Santo nediyalaê xi riala deteênu riêi cada tucu bee bene. 12 Cuerpoê bene mase nú tucutsia necane pero huaxi parte rluêcune. Leêca scua liaêahua enu nzeli arquiaêahua Jesucristo mase nú huaxi necaêahua pero neca tucutsiaêahua cuna liêinu. 13 Xne yeêahua urinzaêahua equie cuendaê tucutsia Espíritu Santo, para nú aca tucu necatseêahua cuna beelá bee saêahua, mase nú necaêahua bene Israel urre lacaêahua bene Israel, mase nú necaêahua esclavo urre lacaêahua esclavo, pero neca tucu necatselaêahua xne yeêahua nzula Espíritu Santo cuna liaêahua. 14 Cuerpoê bene laca tucutsiae sino que huaxi parte rluêcune. 15 Nu tunu ni cuchiuê bene: “Lacaa tucu parte cuerpoê bene xne lacaa ya bene.” Pero laca equie cuendaê nucuaê nú lacaêe tucu parte cuerpoê bene. 16 Nu leêca esquie tunu ni diaca bene: “Lacaa tucu parte cuerpoê bene xne lacaa iêculu bene”, laca equie cuendaê nucuaê nú lacaêe diaca bene. 17 Xne tunu diqui cuerpoê bene necatsia iêculu bene, ¿chequie xneca yeneê bene che? Nu tunu diqui bene unga diaca bene, ¿xneca liaê bene che? 18 Pero nediyalaê Diose cá riala zucu ye lunú neca cada tucua parte cuerpoêahua, tucu nú niarquiênu nú acane. 19 Xne tunu tucutsia parte neca diqui cuerpo lacane tucu cuerpo che. 20 Pero tucu nú unilá luhua mase nú huaxi parte neca cuerpoêahua pero tucutsia neca diqui cuerpoêahua. 21 Leca modo ni iêculu bene luya bene: “La quiêñalu.” Nu leêca leca modo ni lluca equie bene lu cuchiuê bene: “La quiêñiahua." 22 Mase nú huaxi bee parte cuerpoêahua nú seêcaêahua nú lleênatsia sibiê, pero bee nucuaê neca nú máse sibiê. 23 Nu bee parte cuerpoêahua nú rtuaêahua mase la aca achee lu cuerpoêahua bee nucuaê neca nú máse rriêi ucuaêahua xne rlaênaêahua nú xi utuaêahua para nú lecaxi naêahua. 24 Nu bee parte cuerpoêahua nú ache, bee nucuaê neca nú la chenu xeêtaê arquiaêahua equie cuendaê. Pero máse rquiêña nú chenu arquiaêahua equie cuendaê bee parte cuerpoêahua nú la achee para nú lecaxi lluaêahua, nu scua urecheê Diose liaêahua. 25 Para nú la riaêahua elliebacuê nú nuê parte cuerpoêahua nú la zibiê sino que diqui cuerpoêahua rriêi elietsa lu saêe. 26 Chenu rcuu tucu parte cuerpoê bene, che diqui cuerpoê bene siê nú rcu, nu chenu tucu parte cuerpoê bene ñia seca che diqui cuerpoê bene ñia seca. 27 Nu nee leêca scua lunú neca tucu necatseêahua cuna Jesucristo, che yeêahua necaêahua xi neca tucutsia cuerpo para liêinu, nu cada tucuaêahua necaêahua xi neca tucu parte cuerpo zeêe. 28 Letaêahua enu nzeli arquiê Jesucristo ucañi Diose rluti bee apóstol, che chu ucañinu bee profeta, luzeêela ucañinu bee ulaxcuela enu seteê stichiaênu, nu cuna bee bene enu rriêiyeca bee bene enu riti, nu cuna bee bene enu rriêi bee milagro nu cuna bee bene enu rriêi elietsa lubeela bee bene. Leêca ucañinu bee bene enu nibiyaê lubee bene enu nzeli arquiê stichiaênu, leêca ucañinu bee bene enu rni huaxi dialu. 29 Laca ye bee bene neca apóstol nu leêca laca ye bee bene neca profetaê Diose nu leêca laca ye bee bene reca seteê Stichiaê Diose lubee bene, nu laca ye bee bene reca rriêi bee milagro. 30 Leêca laca ye bee bene reca rriêiyeca bee bene enu riti, nu leêca laca ye bee bene reca rni ye clasiaê bee dialu, nu leêca laca ye bee bene reca rixiuleêe xi rni tucu dialu urre stucue. 31 Pero laênahua nú lubeê Diose luaêahua ta nú mase neca nzeêca riala riaêahua, liêá rlubea luhua tucu inziu nú máse neca nzeêca.