1 Corintios 14

1 Ulaênahua nú zecahua bee saêhua nu chiquiê unaêcuhua lu Espíritu Santo para nú liquiênu xi riala riêihua pero máse naêcuhua lunu nú liquiênu nú riêihua beyaê para nú zeteêhua stichiaênu lubee bene. 2 Bene enu rni stucu dialu nú la riêi bee bene beyaê xi rni, nzeêta bedichiaê cuaê lu cuendaê Espíritu Santo. Nu tucutsia Diose rdichiaênulla bedichiaê cuaê nu lecati bene rriêi beyaê nú rnilla. 3 Pero bee bene enu rixiuleêe Stichiaê Diose lubee bene, rriêilla elietsa lubee bene para nú xneca riala nú chenala bene inziuê Diose, nu rduêlla ana arquiê bee bene, nu saalalla arquiê bee bene enu nehuana seca. 4 Bene enu rni stucu dialu nú la riêi bee bene beyaê xi rni, rriêi nucuaê elietsa lu liêitsialla. Pero bee bene enu rixiuleêe Stichiaê Diose lubee bene, rriêilla elietsa lubee beneê Diose para nú xneca chenala beella inziuê Diose. 5 Alaê niarquia nú yehua nihua stucu dialu, pero máse neca nzeêca tunu ixiuleêehua Stichiaê Diose lubee bene. Xne máse neca equie nú ixiuleêe bene Stichiaê Diose lubee bene luquela nú ni bene stucu dialu nú la riêi bene beyaê xi rni. Urre tunu acalla ixiuleêella lubee bene xi rni dialu nú unilla para nú zibiê lunú unilla lu ye bee bene, 6 xi neca tunu nzelabiêya liêihua bee saêa enu nzeli arquiaêahua Jesucristo nu nia luhua tucu dialu nú la riêihua beyaê xi rni che lecaxi zibiê nucuaê luhua luhuare nú nia luhua Stichiaê Diose, luhuare nú nia luhua lunú ulubeê Diose lua nú nia luhua urre luhuare nú zeteahua lunú recaa, urre luhuare nú zeteahua lunú riala zeteahua. 7 Xi neca tucu bee icuê musica, flauta, urre arpa tunu la ula nzeêca benene la riêi bene beyaê xi instrumento bee nucuaê. 8 Leêca scua tunu la bixia nzeêca tucu sundado trompeta lu xuu, xneca riêi beei beyaê para nú nucuaêa tsiñiala beei para nú chue beei lu xuu. 9 Nu nee leêca scua tunu liêihua nihua lubee bene cuna tucu dialu nú la riêi bee bene beyaê xi rni, ¿xneca riêi beella beyaê xi rnihua lubeella? Nu che lia xleêe unihua lubeella. 10 Liêihua nediyaêhua nú nuê huaxi bee dialu lu iliulabe, pero yeene nuê xi rnii. 11 Pero tunu tucu bene ni lua tucu dialu nú la nia nu la riêá beyaê xi rni, che necaa tucu bene istu para bene zeêe, nu neca bene zeêe tucu bene istu para liêá. 12 Enzeêe scua tucu nú chiquiê niarquiêhua nú luêcuhua elliebacuê nú enta lu Diose cuna elietsaê Espíritu Santo chiquiê unaêcuhua lu Diose para nú liquiênu elliebacuêhua nú riêihua lunú xi riala riêihua para nú xneca chenala bee beneê Diose inziuênu. 13 Enzeêe bene enu rni tucu dialu nú la riêi bee bene beyaê rquiêña nú nacuêlla lu Diose para nú riêinu elietsa lulla para nú acalla ixiuleêella lubee bene xi rni lunú unilla. 14 Xne tunu liêá nacua lu Diose cuna stucu dialu rene nu la riêá beyaê xi rni che tucutsia espíritua nediyaê xi rnia pero liêá niê la riêá beyaê xi rnia che. 15 Enzeêe lunú rquiêña riêá neca nú nacua lu Diose cuna espíritua, nu riêá beyaê xi rnia. Leêca scua chenu rulaa lu Diose rquiêña nú tsiêa bee nucuaê nu riêá beyaê lunú xi rulaa. 16 Xne tunu rnilu bedichiaê nzeêca lu Diose cuna tucu dialu nú la riêilu beyaê xi rni che leca modo ni bene enu nzu cuna liêilu “Amén” chenu ulaxu udeteêlu cheêtsa lu Diose. Equie nú lá riêilla beyaê xi unilu. 17 Mase nú ñia udeteêlu cheêtsa lu Diose, pero lecaxi uriêi nucuaê elietsa lu bene enu nzu cueêtselu para nú riêilla beyaê xneca chenalalla inziuê Diose. 18 Rdetea cheêtsa lu Diose nú liêá reca huaxi dialu lu yehua. 19 Pero mase nú scua necane chenu nzua elu rieteêsaê bee saêahua enu nzeli arquiê Jesucristo para nú nia lubeella, nu para liêá máse nza nzeêcae tunu nia masia ayuê bedichiaê lubeella bee bedichiaê nú rriêi beella beyaê para nú zibiêi lubeella nu zeteê beellae lu stucu bene, luhuare nú nia lubeella chiêi mili bee bedichiaê nú la riêi beella beyaê xi rni. 20 Bee saêa enu nzeli arquiaêahua Jesucristo la riaêahua elliebacuê xi rriêi bee enduê llaêna elliebacuê. Pero acahua xi neca bee enduê nú la riêi beei beenú necha neca, pero chenu rriêihua elliebacuê uriêihua elliebacuê xi rriêi bene uxu elliebacuê lunú unguxulahua. 21 Lu ichiê Stichiaê Diose rni: “Xeêla bee bene enu rni stucu dialu, bee bene enu laca bee bene caêa para nú nibeella lubee benequieê. Pero niê scua la zucuê beella stichiaêa uni Diose." 22 Enzeêe lunú rni bene huaxi dialu, necane tucu seña para lubee bene enu la chili arquiê Stichiaê Diose para nú scua chili arquiêbeella Diose. Nu la neca nucuaê tucu seña lubee bene enu nzelila arquiê Diose. Pero lunú rixiuleêe bene lunú neca cuendaê Diose neca nucuaê tucu seña para lubee bene enu nzelila arquiê Diose. Nu laca nucuaê tucu seña para lubee bene enu lachili arquiê Diose. 23 Pero niê scua chenu rieteêsaêhua para nú yeneêhua Stichiaê Diose nu che quixie yehua nú nihua yelu clasiaê dialu nú lecati rriêi beyaê xi rni, nu tunu nucuaêanuhua bee bene enu apenatsia uchili arquiê Stichiaê Diose urre bee bene enu la chili arquiê stichiaênu, ¿che xieê la riêi bee benecuaê elliebacuê nú tala vese ichia lucu secahua la? 24 Pero tunu yehua rixiuleêehua Stichiaê Diose elu rieteêsaêhua nu nucuaêanuhua bene enu apenatsia uchili arquiê Diose, urre bene enu la chili arquiê Diose zeêe, che chenu yeneêlla xi rnihua, che riêilla beyaê nú necalla tucu bene enu rluêcu dula, nu che leêcatsia liêilla riêilla beyaê nú ti necalla. 25 Nu scua riêilla beyaê nú xneca nehuañilla nu tsulliquilla nacuêlla lu Diose, nu leêca nilla nú neli nú nzu Diose cuna liêihua. 26 Bee saêa enu nzeli arquiaêahua Jesucristo ye beenú rnia luhua rnine luhua para nú riêihua beyaê nú chenu rieteêsaêhua para nú yeneêhua Stichiaê Diose, yehua riêihua lunú recahua rriêihua, ti enu rula canto lu Diose, nu ti bee enu seteê Stichiaê Diose lubee bene, nu ti bee enu rixiuleêe lubee bene nú xi ulubeê Diose lulla, nu bee enu rni stucu dialu nú la riêi ye bee bene beyaê, nu ti bee bene enu rixiuleêe xi rni dialu nú uni benecuaê, pero luye nú rriêihua rquiêña nú zibiêi nu riêi elietsa lubeelá bee saêhua nú xneca chenala beella Stichiaê Diose. 27 Tunu nuêhua enu rni dialu nú la riêi ye bee bene beyaê, rquiêña nú ni chiucu chunatsiahua dialu cuaê bee enu recatsiae, nu tucua tucuahua nihuane, nu rquiêña nú nuê enu ixiuleêe lubee bene nú xi rni dialu nú unibeella. 28 Pero tunu leca bene enu ixiuleêe lubee bene xi uni bee bene enu uni dialu cuaê, che máse neca nzeêca nú la nibeellá dialu cuaê lubee bene. Mejora liêitsia beella nediyaê beella cuna Diose xi rni nú unacuê beella lunu cuna dialucua. 29 Nu bee bene enu ixiuleêe lubeelá bee bene xi ulubeê Diose lubeella rquiêña nú chiucutsia beella urre chunatsia beella ixiuleêe beella lubeelá bee bene, cada chenu rieteêsaêhua nu beelahua saca tunu neli lunú rni beella. 30 Pero tunu tucu bene enu nzucu zeêe saca, nu hora zeêe lubeê Diose lulla tucu nú lubeê Diose lulla, che rquiêña nú zaca bene enu rni para nú aca ixiuleêella lubee bene xi ulubeê Diose lulla hora zeêe. 31 Yehua nuê beyaê ixiuleêehua Stichiaê Diose lubee bene, lunú ulubeê Diose luhua, pero tucua tucuahua rquiña nú riêihua scua para nú aca beella, nu chuêu ana arquiêbeella, liêibeella enu rieneê nú rnihua. 32 Uluêcu cuendahua nú bee profeta, la yala nú nibeella chenu la yala nibeella, sino que nibeella chenu riala nibeella. 33 Xne Diose niarquiê nú xcuaêa xcuaêa riêi bee bene para nú huañi nzeêca bene cuna saêbene. Scua tucu nú recae ye bee luhuare elu rieteêsaê bee bene enu nzeli arquiê Jesucristo. 34 Hora nú rieneêhua Stichiaê Diose, leca modo nú nuêxi ni bee unaêa tucu nú uni Diose nú riêi beenchu hasta huaêtu. 35 Tunu nuê xila niarquiêhua nú riêihua beyaê, mejora nú niêhua nu unedichiaêhua lu niyuêhua, xne netue tunu nedichiaê tucu unaêa hora nú rieneê ye bee bene Stichiaê Diose. 36 Ulluêcuê arquiêhua nú la neca liêihua enu primero uriêi beyaê Stichiaê Diose, nu leêca la neca liêitsiahua bee enu primero nediyaê Stichiaê Diose. 37 Tunu nuêhua enu seca nú necala profeta, urre seca nú Espíritu Santo udeteêla elliebacuêlla, nu che chu riêilla beyaê lunú rnia lu cartaquieê nu necane tucu nú unibiyaê Diose nú riêihua. 38 Pero tunu la chili arquiê profeta quieê lunú rnia luhua lu carta quieê, leêca la chili arquiêhua lunú rnilla luhua. 39 Scua tucu nú unila luhua bee saêa enu nzeli arquiaêahua Jesucristo, unaêcuhua lu Diose para nú liquiênu elliebacuêhua para nú ixiuleêehua stichiaênu lubee bene, nu la cahua tunu ni tucu bee saêhua tucu dialu nú la riêihua beyaê. 40 Pero lu ye nú rriêihua uriêi nzeêcahua, uriêihua tucu nú riala riêihua chenu rieteê saêhua, para nú yeneêhua Stichiaê Diose.