Mukanda kwena bisi Hebelu Hebelu 2

1 Yi hakana betu tufweti simbidila buna bufwani ku musamu wuna twaÌyuka, hanga twaditotisa nana nzila. 2 Kikuma, honi musamu wuna kaÌzonza Nzambi mu nzila ya banzyo wawu waÌlungila, amana wosu wuna waziÌtisawoku kondi loni waleÌmvukilawoku, kabonga ndola yina yilungini. 3 Amana abweti twalenda mu kuhenga ndola yina ho twalewula luhulusu lwa mbuta lwaluna? Yandi-meni Pfumu watekilalwa samuna. Amana phi, babana baÌyuka mu kuzonzila luhulusu meni lwenina kwena Pfumu baÌtukwikisalwa. 4 Nzambi waÌsikununa kimbangi kya bawu ni kya kyedika muna nzila ya bidimbu, muna bithondu, yi mu biphadi bya mutindu wosu, yi muna kabu dina kaÌtyakila Kitembu Kyatoma kwena mosi-mosi wa bawu muna luzolu lwandi. 5 Kikuma, heku ni kwena banzyo kaÌhana Nzambi, kiyeka kya tsi yina yakwiÌsa yina tubati zonzila. 6 Kinga, mutu mosi kaÌzimbula muna Masonuku: «Nati kenina mutu ndangu ngeyi wamuyubukaka? Nati kenina mwana wa mutu ndangu ngeyi wamukebaka? 7 Muna tangwa dya khunda, ngeyi wamusila mutu muna sina dya banzyo, waÌmuvwatisa mu khembu yi luzitu, 8 wasya byosu muna sina dya bitambi byandi.» Yuka ni Nzambi kaÌhana kiyeka kya bima byosu kwena mutu, disongila, kaÌsisaku kima kina kimutadiku. Kinga buthwena, tubatiku mona ni byosu mu kiyeka kya mutu byenina. 9 Kaasi tumoni ni Yesu baÌmukitula koma, muna sina dya banzyo mu tangwa dimosi bwabu, amana waÌvwata mukhonzi wa khembu yi luzitu kikuma kya lufwa luna kaÌnyokukina. Amana muna buweti bwa Nzambi, kisa fwila kikuma kya batu boosu. 10 Kikuma muna nzila ya yandi Nzambi yi mwena yandi byosu byisi zingila, kaÌzola mu kunatisa ku khembu bana balawu. KaÌhanga bwabuna mu kumukitula Yesu mutu walungila muna nzila ya minyanga myandi, yandi wenina kisina kya luhulusu lwa bawu. 11 Mukuma, Yesu wisi semisa batu ku masumu ma bawu amana babana benina ba kasemi boosu kwena Tata mosi batukini. Yi hakana yandi keku yi tsoni za kubatedila baleki bandi. 12 Tangwa kazimbudini Yesu: «YisaÌmuna zina dyaku kwena baphangi bama, yikuÌtsikisa hana kati dya kimvuka.» 13 Wuzimbudi phi: «Yisya mbundu yama mwena Nzambi.» Amana phi: «Awu meni, meni yi bana babana kaphekini Nzambi.» 14 Kikuma bana babana boosu benina kima kimosi yi yandi muna menga yi mu lutu, yandi phi luzingu lumosi kaÌzinga yi bawu. Yi hakana ni muna lufwa lwandi waÌtusuna kiphidi-mutu, wuna wakala simbidila ngolu za lufwa, 15 amana waÌkula boosu babana meni baÌkala bakwatama mu kihika kya bweya bwa lufwa muna luzingu lwa bawu lwosu. 16 Kikuma, kyedika ka kwena banzyo ku kisi kwisa mu kusadisa, kaasi ku butuka dya Bulahami kisi kwisa sadisa. 17 Yi hakana kaÌlunga mu kukituka kitesu kimosi mu moosu kwena baphangi bandi. Bwabuna ndangu kakituka mbuta-nganga mosi wabasa yi buweti yi kuhwila mwani muna kisalu kya Nzambi, kikuma kya kulolula masumu ma batu. 18 Mukuma bwosu kaÌnyokuka yandi-meni tangwa kaÌhita mu kimeka, wulungini mu kuyakidila babana benina mu kimeka.