Mukanda kwena bisi Hebelu Hebelu 1

1 Muna tangwa dya khulu, Nzambi kakala zonza kwena batata betu mbala za lawu amana mu mitundu mya lawu muna nzila ya bambikudi, 2 kaasi buthwena, mu bilumbu byabi bya tsuka, kaÌtuzonzila mwena Mwana wandi mosi wuna kaÌsikununa swana wa byosu, muna nzila ya yandi wuna kaÌhangila tsi. 3 Mwana meni wuna kenina mutsyenzya wa khembu ya Nzambi amana kenina kifwani kya mukwandi kya buna kenina Nzambi, amana ndinga ya yandi ya hamu yisi zyamisa tsi. Ku manima ma kusemisa batu ku masumu ma bawu, waÌzakala kuna koku dya kitata dya kipfumu kya Nzambi, muna bisoka bya mazilu. 4 Bwosu kaÌkituka mbuta kwena banzyo Nzambi waÌmuheka zina dihitini dina dya bawu. 5 Mu kyedika, keti kwena mosi wa banzyo Nzambi kaÌzimbwala kedi: «Ngeyi wenina Mwana wama, tuka lelu dyadi, meni yikubutini.» Amana khaniku kazimbula kwena wanzyo mosi: «Tata yikaÌla kikuma kya yandi amana kakaÌla Mwana kikuma kya meni.» 6 Kaasi mu tangwa kaÌhitika Mwana wandi wa tsomi muna tsi, wuzimbudini: «Banzyo ba Nzambi boosu bamufukamina.» 7 Kikuma kya banzyo, kaÌzimbula: «Nzambi, banzyo bandi, kisi bakitula bitembu amana basadi bandi kisi bakitula mileku mya mbawu.» 8 Kaasi Nzambi kaÌzimbula kikuma kya Mwana wandi: Wenina Nzambi, «Kiti kyaku kya luyalu kyaÌsikila mvula yi mvula. Koka dya masonga maku dyenina koka dya luyalu lwaku. 9 Wisi zola masonga, amana waÌmenga mbi, yi hakana Nzambi, Nzambi waku, kaÌkusodila mu kukusita mafuta ma thumbama, amana waÌkusola kuhita bakwenu khunda.» 10 KaÌzimbula hika: «Ngeyi, Pfumu, waÌtunga tsi muna luyandiku, amana mazilu menina muhangu wa moku maku. 11 Byosu byabina byaziÌluka, kaasi ngeyi wenina. Tsi yi zilu byakuÌlwakila hanga miledi mya khulu; 12 wavuÌngabya hanga muzaka wumosi, amana byasoÌba hanga muledi wumosi phi. Kaasi ngeyi wenina phila mosi kaka, amana luzingu lwaku lweku yi tsuka.» 13 Amana Nzambi kaÌzimbulaku kedi keti kwena mosi wa banzyo bandi: «Awisa sikuka ku kitata kyama, yi kuna yikiÌtwala bambeni baku kidyatilu kya bitambi byaku.» 14 Aketi banzyo benina bitembu, bana byenina mu kisalu kya Nzambi: Nzambi kisi batuma kikuma kya kusadisaka batu babana bakwisa vwa luhulusu.