Izehhiden 138

1 N Dawud. Ad Cek qadiɣ s marra uř inu, ad Cek zehhdeɣ zzat i irebbiten. 2 Ad bendqeɣ ɣar Zzawect nnec Tameqqrant iqeddsen, ad qadiɣ Isem nnec x tmexsiwt nnec icewwaren u x řaman nnec, maɣar Cek tessemɣared awař nnec x marra min ittwafen ɛad deg Yisem nnec. 3 Deg wass řami xak dd-řaɣiɣ, tarrid-dd xafi, Cek tewcid jjehd i řeɛmar inu. 4 Marra ijeǧiden n temmurt ad Cek qadan, a SIDI, xmi ttesřan awařen zeg uqemmum nnec. 5 Ad ɣennjen x ibriden n SIDI, maɣar aɛuǧi n SIDI d ameqqran. 6 Maɣar waxxa ittwassuɛřa SIDI aṭṭas, ɛad ixezzar-dd ɣar umwaḍeɛ, maca bu-nnfaxet issen i-t zi řaggʷaj. 7 Mařa uyureɣ di řwesṭ n řeḥṣaret, ad ayi dd-tᵉttarred ɣar tudart. Cek tesswiẓẓḍed afus nnec ḍidd i weɣḍab n řɛedyan inu, afus nnec afusi issenjem ayi. 8 SIDI ad t ikemmeř i necc. A SIDI, tamexsiwt nnec icewwaren tᵉttɣima i řebda, řefɛayeř n ifassen nnec war ten tarexxud.