Izehhiden 137
LTI1 Ɣar iɣezran n Babil, dinni i tuɣa nettɣima, nru ɛawed xmi tuɣa nettidar Ṣihyun. 2 Nuyeř řgambriyat nneɣ ɣar iṣefṣafen i iǧan di řwest nnes. 3 Maɣar inni d aneɣ iḥebbsen ttaren zzayneɣ dinni ad nɣennej awařen n ijj n yezři, inni d aneɣ iḥeṣṣaren ttaren ca n řḥajjet issefraḥen. Nitni nnan: “Ɣennjem zeɛma ijj zeg izřan n Ṣihyun i neccin!" 4 Mammec nzemmar ad nɣennej ijj n yezři n SIDI di temmurt n midden? 5 Mařa necc ttuɣ cem, a Urcalim, ejj xenni ad ittu ufus afusi ixef nnes. 6 Ejj ad ayi iřṣeq iřes inu x waneɣ inu, mařa war cem ttidareɣ, mařa war ssɛuǧiɣ Urcalim x řefraḥet inu tameqqrant qaɛ. 7 A SIDI, ɛqeř x ayt n Idum, deg wass n Urcalim, inni iqqaren: “Ɛarram tt, ɛarram tt, ař dsas nnes!" 8 A yeǧis n Babil, cem tenni ittwassḥuzen i wareddeǧ, sseɛd n yinni d am i ɣa ixeǧṣen tameggit iɛeffnen i dayneɣ teggid. 9 Sseɛd n wenni i ɣa iṭṭfen iḥenjiren nwem imeẓyanen, ad ten iřbez x teṣḍart.