Izehhiden 139

1 I umeqqran n imeɣnajen. N Dawud. Azehhed. A SIDI, Cek tbeqqced ayi u tessned ayi. 2 Cek tessned aɣimi inu d ubeddi inu, zi řaggʷaj tfehhmed ixarriṣen inu. 3 Xmi ggureɣ u xmi ṭṭṣeɣ tarezzud dayi, aqa Cek tessned marra ibriden inu. 4 Minzi war din uřa d ijj n wawař x yiřes inu, u xzar, Cek a SIDI, tessned t kuřci. 5 Cek tḥeṣṣared ayi zi ḍeffar u zi zzat, tessarsed xafi tařeqqa n ufus nnec. 6 Tussna-ya d atebhet i necc, tuɛřa xafi, war zemmareɣ ad tt awḍeɣ. 7 Ɣar mani zemmareɣ ad raḥeɣ zi Arruḥ nnec, ɣar mani ɣa arewřeɣ zeg wudem nnec? 8 Mařa geɛɛdeɣ ɣar ujenna, aqa Cek dinni, mařa ggiɣ řaxart d tassut inu, xzar, aqa Cek uřa dinni, 9 Mařa ksiɣ afriwen am tfawt n řefjar, ad zedɣeɣ ɣar uneggar qaɛ n řebḥar, 10 xenni uřa dinni ad ayi indeh ufus nnec, afus nnec afusi ad ayi iṭṭef. 11 Mařa nniɣ: “Iwa taǧest, wḍa-dd xafi, xenni ǧiřet d tfawt i d ayi iquwwaren. 12 I Cek taǧest war teǧi d ṭṭřam, i Cek ǧiřet tᵉttegg tfawt am uziř, i Cek taǧest aqa-tt am tfawt. 13 Wah, Cek txeřqed-dd tiẓẓař inu, tmuded ayi deg uɛeddis n yemma. 14 Qadiɣ Cek umi dd-ttwaxeřqeɣ zeg ict n tebridt n řeɛjeb d tameqqrant. Timegga nnec d lmuɛjizat, řeɛmar inu tessen t mliḥ qaɛ. 15 Ixsan inu tuɣa war xak nnuffaren, umi ttwaggeɣ s tnuffra, ttwamudeɣ am ijj n uburḍa di řaǧaɣ n temmurt. 16 Tiṭṭawin nnec ẓrint abeddu inu iḍefṣen. Deg wedlis nnec ittwannḍen aqa marra yuran, aqa ussan i tuɣa ttwaggen, jar asen uřa d ass amezwaru n ubeddu inu. 17 Mammec ɣari ttɛizzan ixarriṣen nnec, a Arebbi, mammec imɣar ubarru nsen! 18 Mařa xseɣ ad ten ḥesbeɣ, aqa aten ktar aṭṭas zeg yejdi, u xmi faqeɣ, aqa ayi ɛad akidek. 19 A Arebbi, meɛlik i ɣa tenɣed aɛeffan, meɛlik i ɣa tejjed iryazen i issazzařen idammen ad xafi aggʷejjen, 20 inni xak issawařen s tḥraymect, řɛedyan nnec inni ineṭṭqen Isem nnec di řbaṭeř. 21 A SIDI, ma war carrheɣ inni Cek icarrhen, u ma war ttɛiffeɣ inni akidek ittemɛařan? 22 Necc carrheɣ ten s ijj n wecrah ikmeř, aqa nitni dewřen ayi d řɛedyan. 23 Arzu xafi, a Arebbi, ssen uř inu, qeǧeb ayi u ssen ixarriṣen inu. 24 Xzar-dd, ma aqa ayi di ca n webrid n řeqjaḥet u ndeh ayi ɣar webrid n řebda.