Hebreos 6

1 Koií ko̱s’ín mochjeénâne nga chíta’yà ‘énâla̱ Cristo xi ìsa̱ ndaà ko̱jchíngakoa̱á kjoa̱ ts’e̱ Nainá méâne nga ni̱mé chi̱jat’aàâná nga xi̱ta̱âla̱ Cristo maá. Mì ti̱jñà ti̱jñà ‘én chíta’yàâaná xi kichìta’yá nga sa̱ ítjòn i̱t’aà ts’e̱ Cristo. Mì ti̱jñà ti̱jñà ‘én si̱kítsjeènâyaâná kó s’ín ma nga nìkájnoaá jé xi tjínâná xi kjoa̱biyaà fìko̱âná. Ko̱ ti̱koa̱á mì ti̱jñà ti̱jñà ‘én si̱kítsjeènâya ìjngoò k’aâná kó s’ín kòkjeiínâná i̱t’aà ts’e̱ Nainá 2 ko̱ kós’ín ma bautizar xi̱ta̱, ko̱ kós’ín oyijòsònâlá ndsa̱á jñà xi̱ta̱ xi mokjeiínâla̱ i̱t’aà ts’e̱ Cristo. Ko̱ ti̱koa̱á mì ti̱jñà ti̱jñà ‘én si̱kítsjeènâya ìjngoò k’aâná kó s’ín kjoa̱áyaâla̱ jñà xi̱ta̱ xi jye k’en, ko̱ kós’ín s’i̱in Nainá nga ki̱ìndaàjiìnâla̱ xi̱ta̱ mé xi ok’ìnâla̱ nga tsjáâla̱ ni̱ta̱ kjéâne. 3 Mochjeénâné nga chíta’yà ‘én xi ìsa̱ ndaà ko̱jchíngakoa̱á kjoa̱ ts’e̱ Nainá; tsà Nainá tsjá’nde nga ko̱s’ín ko̱ma, k’oa̱s’ín s’e̱én. 4 Nga jñà xi̱ta̱ xi jye kjòhiseènâla̱ kjo̱hítsjeènâla̱, xi jye kisaseènâtakòn kjo̱ndaà xi tsjá Nainá, xi ti̱koa̱ jye ngásòn kitjoéâla̱ Ini̱ma̱ Tsjeèâla̱ Nainá, 5 xi jye kisaseènâtakòn ‘én ndaàâla̱ Nainá ko̱ nga’ñóâla̱ i̱sò’nde xi sa̱ kjoi̱í, 6 tsà ìjngoò k’a xìn ndi̱yá kjoi̱, tsà tsjìn takòn ‘énâla̱ Nainá, mì ti̱ kiì ko̱ma ko̱ndaàyaâne kjo̱hítsjeènâla̱ nga ko̱ófat’aà ìjngoò k’aâla̱ Nainá; nga jñà xi̱ta̱ koi, kjoa̱ xi nchis’ín, k’oa̱á ngayaâla̱ koni tsà krò nchihót’aà ìjngoò k’a jè Ki’ndíâla̱ Nainá nga tsjáâla̱ kjo̱sobà nga nguixko̱n ngats’iì xi̱ta̱. 7 K’oa̱á s’ín ngayaâla̱ koni jè nangui, k’e̱ nga ‘ba jtsí, ma’nchi̱’ndeâné. Tsà ndaà xka̱ xi bisò xi mochjeénâla̱ xi̱ta̱ xi síxáko̱ nangui, jè Nainá síchikonât’in nangui. 8 Ta̱nga tsà na’yá chi̱ni̱ ko̱ na’yá xanchroò bisò, ni̱mé chjíâla̱, mìtsà nangui ndaà nga nguixko̱n Nainá; ki̱jchò na̱chrjein nga tà ki̱ti̱âné. 9 Jñò ndí ’ndsè, xi matsjachaânòje̱n, na̱s’ín k’oa̱s’ín nokjoàâje̱n, k’oa̱á s’ín tíjngoò takònâje̱n nga tjoéânò kjoa̱ xi ‘ñó ndaà tjín, ngats’iì kjo̱ndaà xi tjínâla̱ xi̱ta̱ xi jye itjokàjiìn kjo̱’in. 10 Nga Nainá, xi̱ta̱ kixi̱âné, mìkiì síjchàajiìn xáânò xi jye ki’nè ko̱ kjoa̱tjòcha xi tjínânò nga nìchját’aàâlà xi̱ta̱ na̱xa̱ndáâla̱ Cristo, koni s’ín titsa̱’nè skanda na̱chrjein i̱’ndei̱. 11 Ta̱nga ngaje̱n, k’oa̱á s’ín mejènânaje̱n nga kjit’aà na̱chrjein nguì ko̱ó kjo̱tsja nga ko̱s’ín ti̱xá nga jngoò ìjngoò skanda k’e̱ nga kjoe̱het’aà na̱chrjeinânò méâne nga ki̱tasònâne kjoa̱ xi titsa̱chiñáâla̱á. 12 Majìnânaje̱n nga ts’eè s’e̱en. Chjínguìâlà jñà xi̱ta̱ xi jye nchitjoéâla̱ kjo̱tjò koni s’ín kitsjaà tso’ba Nainá koií kjoa̱âla̱ nga ndaà mokjeiínâla̱ ko̱ tjínâla̱ kjoa̱tsejta. 13 Nainá k’e̱ nga kitsjaàâla̱ tso’ba Abraham, k’oa̱á s’ín kitsjaà kixi̱ ‘énâla̱ nga ti̱jè tsasènâne nga mì ti̱ yá tjínâne xi ìsa̱ ’nga tíjna koni jè; k’oa̱á s’ín kiìchja̱, 14 nga kitsò: “‘A̱n, ‘ñó ndaà sichikonât’inâlè, ti̱koa̱ ‘ñó ko̱kjìnâya jñà i̱xtiâlè." 15 K’oa̱á s’ín komàâne Abraham kiskoòñàkjoa̱, i̱kjoàn kitjoéâla̱ koni s’ín kitsò Nainá. 16 Jñà xi ta̱xki̱ xi̱ta̱, k’e̱ nga tsjá ‘énâla̱, síkjeén jngoò ‘ínâla̱ jngoò xi ìsa̱ ’nga tíjna méâne nga síkixi̱yaâne ‘én xi tsjá. Ko̱ tà ya̱á fehet’aà kjoa̱. 17 K’oa̱á s’ín maâne k’e̱ nga jè Nainá k’oa̱á s’ín kjòmejènâla̱ nga kitsjaà kixi̱âla̱ ‘én jñà xi̱ta̱ xi tjoéâla̱ kjo̱tjò nga si̱ìkitasòn koni s’ín kitsjaà tso’ba, kitsjaà jngoò ‘én xi ‘ñó xkón tjín nga ni̱mé xi ma kjoa̱tjìya. 18 Jñà ‘én koi xi jò maâne xi mìkiì ma fatjìya, nga mìkiì ko̱ma skóna̱cha̱nâná Nainá, ya̱á ‘ñó sakóâla̱ nga’ñó ini̱ma̱âná, jñá xi mejènâná nga Nainá ko̱si̱ko̱âná nga nguì jè kjit’aà takoán nga titsa̱chiñáâlá jè kjoa̱ kixi̱âla̱ xi jè jye kitsjaàâná. 19 Jè kjoa̱ kixi̱ xi titsa̱chiñáâlá, k’oa̱á s’ín síkíjna kixi̱ ini̱ma̱âná koni jngoò ki̱cha̱ xi sit’aà’ñóâne chitso, ko̱ jè kjoa̱ kixi̱ xi o̱kji skanda maá jahas’en ya̱ i̱’nde tsjeè ñánda tjo̱bájtoò nikje cortina, 20 ya̱ ñánda jahas’en Jesús nga tsohójnandaàâná ndi̱yá, nga no̱’miì ítjòn tíjna ni̱ta̱ mé na̱chrjeinâne koni jè Melquisedec.