Hebreos 12

1 Nga ‘ñó kjìn maâne xi̱ta̱ xi títsa̱jnandiìâná xi ndaà mokjeiínâla̱, k’oa̱á maâne nga ti̱koa̱á jñá, jngoò k’a si̱kítsa̱jnaá ngats’iì kjoa̱ xi sí’inâná ko̱ kjoa̱ ts’e̱ jé xi tsobà’ñóâná nga kona̱cha̱nâná; mochjeénâné nga k’oa̱ s’ín s’e̱én koni jngoò xi̱ta̱ xi ongachikon nga chíkjoa̱ko̱âla̱ nga ki̱jchò skanda ñánda nga tjínânèâla̱ nga ki̱jchò. 2 Ndaà chítsejènâlá Jesús; jè tsibíts’ia̱ ítjòn koni s’ín mokjeiínâná ko̱ jè síjngoò kjoa̱ koni s’ín mokjeiínâná. Jesús nga jye tíjiìnâla̱ nga ko̱ma i̱skan s’e̱éâla̱ kjo̱tsja, k’oa̱á maâne nga kichìkjoa̱ ko̱âla̱ kjo̱’in i̱t’aà krò, mìkiì kjòsobàâla̱ koni s’ín k’en; i̱kjoàn tsibíjnat’aà chrja kixi̱âla̱ Nainá nga ya̱ tíhotíxoma. 3 Ti̱kítsjeèn i̱t’aà ts’e̱ Jesús; kichìkjoa̱ ko̱óâla̱ kjo̱’in xi tsibínèâla̱ jñà xi̱ta̱ jé, méâne jñò mìkiì ki̱jtaânò ko̱ mìkiì sìkàjeènâlà takòn. 4 Koni s’ín titsa̱bixkànâko̱o kjoa̱ ts’e̱ jé, kj’eè tsà yá xi̱ta̱ xi tsò ikon nga sík’enânò. 5 ¿A jye kijchàajiìnânò koni tsòânò Nainá nga i̱xtiâla̱ tsòânò? K’oa̱á s’ín tíchja̱ xo̱jo̱n xi tjít’aà ‘énâla̱ Nainá nga tsò: Nga ki’ndíâna̱ xanâlè, kì nachrjekànguiâjèn k’e̱ nga síkixi̱yaâlè Na̱’ènâná, ko̱ kì nìkjajenâla̱ takoìn k’e̱ nga síkakáâlè. 6 Na̱’ènâná síkixi̱yaâné jè xi̱ta̱ xi tsjakeè, tsjáâla̱ kjo̱’in ngats’iì xi kjoétjò nga ki’ndíâla̱ tsòâla̱. 7 Nainá k’oa̱á s’ín beèhikonânò nga ki’ndíâla̱ tsòânò; ti̱kjioón k’e̱ nga kjo̱’in tsjáânò. Ngats’iì xi Na̱’èn ma, tsjáâla̱ kjo̱’in i̱xtiâla̱ nga síkixi̱ya. 8 Ta̱nga tsà Nainá mìkiì si̱ìkixi̱yaânò koni s’ín síko̱ ngats’iì xi i̱xtiâla̱ ma, mìtsà kixi̱ kjoa̱ nga nguì i̱xtiâla̱ Nainá maà. 9 K’e̱ nga sa̱ i̱xtiaá, jñà xi̱ta̱ jchíngaâná xi tjín i̱ i̱t’aà nangui, kisìkixi̱yaâná koa̱ ndaà kiyaxkoán. ¿A mìtsà ìsa̱ ndaà jcha̱xkoán Na̱’ènâná xi tíjna ngajmiì, méâne nga kàtas’eâná kjoa̱binachon? 10 Xi̱ta̱ jchíngaâná i̱ i̱t’aà nangui tsjáâná kjo̱’in nga síkixi̱yaâná koni s’ín mejènâla̱, na̱s’ín ta chiba na̱chrjein titsa̱jnaá. Ta̱nga Nainá síkixi̱yaâná xi kjo̱ndaà tsa̱ján méâne nga tsjeè ki̱tsa̱jnaá koni jè Nainá nga tsjeè tíjna. 11 Kixi̱í kjoa̱, tsjìn kjo̱’in xi kjo̱tsja tsjá, tà kjoa̱ba tsjá nga ‘on maâla̱ yijoâná, ta̱nga komà i̱skanâne s’e̱éâná kjoa̱ kixi̱ xi ’nchán tjín nga ndaà ki̱tsa̱jnakoa̱á Nainá ngats’iaá xi biì’ndeé nga tímakixi̱yaá. 12 K’oa̱á maâne nga tjiìâlà nga’ñó yijoânò, chjímiì’ngaà ndsa̱a xi mìkiì ma síkjaníyá, ko̱ xkó ndso̱koò xi tsjìnâla̱ nga’ñó; 13 ti̱nchátsjioò xi ndi̱yá kixi̱ nga kàtandaàâne ndso̱koò xi tsá’yá kji, méâne nga mìkiì ìsa̱ ndaà ko̱tsó’ño̱âne. 14 ‘Nchán ti̱tsa̱jnako̱o ngats’iì xi̱ta̱; tsjeè ti̱tsa̱jna nga nguixko̱n Nainá. Nga ni̱jngoò xi̱ta̱ skoe̱xkon Nainá tsà mì tsjeè tíjna. 15 Ndaà chítsejèn nga ni̱jngoò xi̱ta̱ ko̱si̱jnat’aàxìnâla̱ kjo̱ndaàâla̱ Nainá, méâne nga mì k’oa̱á s’ín ko̱mat’ioòn koni tsà jngoò xka̱ ijñá ki̱so̱ xi tsja i̱ma̱âla̱ xi síkits’ón xi̱ta̱ nga tsjá ch’inâla̱. 16 Jñò, ni̱jngoò xi xi̱ta̱ chijngui ko̱ma, kì nachrjekànguioò tsojmì xi tsjeè; kì k’oa̱á s’ín ’nè koni kis’iìn Esaú nga tà jngoò chroba tsojmì xi ma chine tsatíjnaâne xi jè tjínâne nga ko̱ko̱âla̱ koni ki’ndí tjòn. 17 Jñò jyeé tíjiìnânò, k’e̱ nga jye komà i̱skan, Esaú k’e̱ nga kjòmejènâla̱ nga si̱ìchikonât’in na̱’ènâla̱, kinachrjekànguiâné, mì ti̱ kiì komà kjòchikonât’inâne, na̱s’ín ta̱kó ‘ñó kiskindàya. 18 [Koni s’ín komàt’in xi̱ta̱ Israel nga kjìn kjo̱xkón kijtseè], jñò, mìtsà ko̱s’ín ya̱ ijchò kinchat’aàâlà nindoò xi ma nìko̱, jè nindoò ñánda títì ni’ín jnga̱, ñánda skanda mì ti̱ kiì kjòtsejènâne nga jñò choòn ko̱ ñánda tí’ba tjo̱ xkón. 19 Mìkiì kina’yàâlà jta̱âla̱ chrjo, ti̱koa̱ mìkiì kina’yàâlà jta̱âla̱ Nainá k’e̱ nga kiìchja̱. Jñà xi kiì’nchréâla̱ Nainá, tsibítsi’baâne nga majìnâla̱ nga ki̱chja̱âìsa, 20 koií kjoa̱âla̱ nga mìkiì kichìkjoa̱âla̱ koni s’ín tjín kjo̱tíxoma xi kisinèâla̱ nga tsò: “Jè xi̱ta̱ xi ko̱sìjna jngoò ndso̱ko̱ ya̱ i̱t’aà nindoò, na̱s’ín jngoò cho̱, nda̱jo̱ó ki̱yáâne ko̱ tsà majìn ki̱cha̱á ko̱tosìkjá yijoâla̱." 21 ‘Ãó xkón tjín kjoa̱ xi ki’yaâla̱, skanda ti̱jèâne Moisés kitsò: “Tsakjoòn jchánâná skanda chi̱ba̱âla̱ tíhotséâná." 22 Ta̱nga jñò, ya̱á ijchò kinchat’aàâlà nindoò Sión, jè na̱xa̱ndáâla̱ Nainá xi tíjnakon, xi ti̱jèâne Jerusalén xi ts’e̱ ngajmiì, ñánda kjìn jmiì àkja̱le̱ títsa̱jna xi nchisítsjako̱ Nainá nga jeya nchisíkíjna, 23 ñánda títsa̱jnajtín i̱xtiâla̱ Nainá xi tjoéâla̱ kjo̱tjò xi ts’e̱ i̱xtitjòn xi tjít’aà ‘ínâla̱ xo̱jo̱n ts’e̱ ngajmiì. Ijchò kinchat’aàâlà Nainá xi xi̱ta̱xá tíjna nga jè bíndaàjiìnâla̱ ngats’iì xi̱ta̱. Ti̱koa̱á ijchò kinchat’aàâlà ini̱ma̱âla̱ xi̱ta̱ kixi̱ xi Nainá jye kisìtsjeè nga ni̱mé chijat’aàâla̱. 24 Ijchò kinchat’aàâlà Jesús xi osìjnajiìnâná jngoò kjoa̱ xi̱tse̱ ko̱ jè jníâla̱ xi kixíxteèn [nga kisìtsjeèâná] xi ìsa̱ ndaá chja̱âná mì k’oa̱áâne koni ts’e̱ Abel [xi síjé nga sindaàjiìn]. 25 Jñò, t’e̱en kinda̱ yijoânò. Kì nachrjekànguioò jè xi tíchja̱âná. Jñà xi̱ta̱ jchínga kjòtseé xi tsachrjekàngui koni s’ín kinokjoàâla̱ i̱ i̱t’aà nangui nga kinìkakáâla̱, mìkiì tsajnoâla̱ nga kitjoéâla̱ kjo̱’in. Jñá, ìsa̱á ‘ñó ‘in tjín tsà ki̱nachrjekànguiaá Nainá k’e̱ nga skanda ján ngajmiì chja̱âná nga síkakáâná; mìkiì ko̱jnoâná nga tjoéâná kjo̱’in. 26 Jè na̱chrjein jè, jta̱âla̱ Nainá, skanda jè nangui kisìjtiyaâla̱, ta̱nga na̱chrjein i̱’ndei̱, k’oa̱á tsò: “Ãjngoò k’a siìjtiyaâla̱, mìtsà tà jè nangui siìjtiyaâla̱ ko̱ó ngajmiì." 27 Jè ‘én, k’e̱ nga tsò “ìjngoò k’a siìjtiyaâla̱”, k’oa̱á s’ín machi̱yaâná nga tjáxìn tsojmì xi xó kisindaàâne, jñà xi ma oníyáâla̱, méâne nga kítsa̱jnaâne xi mìkiì ma oníyáâla̱. 28 I̱t’aà ts’e̱ Nainá tsjáâná o̱kixi̱ nga ya̱ ko̱ti̱xomakoa̱á ya̱ i̱’nde ñánda mìkiì ma oníyáâla̱. Ndaà chjíâla̱ Nainá jñà kjoa̱ koi. Jeya si̱kíjnaá ko̱ jcha̱xkoán koni s’ín sasénâla̱ jè. 29 Nga “jè Nainá, k’oa̱á ngayaâla̱ koni ni’ín xi síkjehesòn yije ni̱ta̱ mé xi tjín."