Hebreos 13

1 Jñò, ti̱tsjacha xi̱ta̱ xinguio̱o xi ’ndsè chibá xi i̱t’aà ts’e̱ Cristo. 2 Kì nìjchàajioòn jñà xi̱ta̱ xi bijchókonânò ni’yaânò, ti̱s’inâlà nga kàtasíkjáya. K’oa̱á komàt’in i’nga xi̱ta̱, kiskoétjò xi̱ta̱ xi mìkiì beèxkon, ta̱nga àkja̱le̱âné. 3 Ti̱kítsjeèn jñà xi̱ta̱ xi nda̱yá títsa̱jna; k’oa̱s’ín t’èâlà takòn koni tsà ngásòn kjo̱’in titsa̱jnaà. Ti̱kítsjeèn jñà xi̱ta̱ xi tíyatoòn koni tsà jñò xi ti̱koa̱ k’oa̱s’ín tíyatoònânò. 4 Jñò xi jye chixàn, ngásòn jcha̱xkón xinguio̱o. Kì ch’o bitsa̱jnako̱o xinguio̱o. Nga jñà xi kjoa̱chijngui s’ín, Nainá tsjáâla̱ kjo̱’in. 5 Kì to̱ón ‘ñó matsjacha; kàtajngoò takòn koni kji tjínânò. Nainá k’oa̱á tsò: “Mìkiì tsjeiìn takònânò, ko̱ mìkiì ta̱jngoò siìkíjnaânò." 6 K’oa̱á maâne nga ma k’oa̱s’ín kixoán: Jè Na̱’ènâná ko̱si̱ko̱âná, mìkiì ki̱skoán mé kjoa̱ xi si̱ko̱âná xi̱ta̱. 7 Ti̱kítsjeèn jñà xi̱ta̱ xi chincha ítjòn nga tsakóyaânò ‘énâla̱ Nainá; ti̱kítsjeèn kó s’ín kisìjchá yijoâla̱ xi̱ta̱ koi ko̱ k’oa̱á s’ín chjínguìâlà koni s’ín kòkjeiínâla̱. 8 Jesucristo mìkiì fatjìya, ti̱jèâne ngojña̱, ti̱jèâne na̱chrjein i̱’ndei̱, ko̱ ti̱jèâne ni̱ta̱ mé na̱chrjeinâne. 9 Kì kiì nìs’inâlà kjo̱hítsjeèn xi kj’ei̱í tsò ko̱ xi mìkiì yaxkonâla̱ nga xìn ndi̱yá fìko̱âná. Ãsa̱á ndaà tjín nga jè ini̱ma̱âná s’eâla̱ nga’ñó i̱t’aà ts’e̱ kjo̱ndaàâla̱ Nainá mì k’oa̱áâne koni ts’e̱ tsojmì xi ma chine; nga jñà tsojmì xi ma chine, ni̱mé nga’ñó kitsjaàâla̱ jñà xi k’oa̱ tjín kjoa̱ kisìs’inâla̱. 10 Jñá, tjín jngoòâná i̱’nde tsjeè [ñánda kitsjaà kjo̱tjò yijoâla̱ Cristo nga k’en], ta̱nga jñà no̱’miì xi tákó ya̱ síxá i̱t’aà ts’e̱ kjoa̱ jchínga ya̱ Ni’ya xi nikje, mìkiì tjí’ndeâla̱ nga tjoéâla̱ kjo̱ndaà nga ya̱ ko̱kje̱n. 11 Nga̱ jè yijoâla̱ cho̱ xi sík’en jñà no̱’miì, [mìkiì tjí’ndeâla̱ nga tjoéâla̱ nga ski̱ne̱]; ta jè jníâla̱ cho̱ fìko̱ jè no̱’miì ítjòn ya̱ i̱’nde tsjeèâla̱ Nainá xi kjoa̱ ts’e̱ jé. Ta̱nga jè yijoâla̱ cho̱, i̱t’aà xìn i̱’nde fìko̱ nga tì. 12 K’oa̱á ti̱s’ín komàt’in Jesús, i̱t’aà xìnâla̱ na̱xa̱ndá kisìkjeiín kjo̱’in, méâne nga kisìtsjeèâne na̱xa̱ndá i̱t’aà ts’e̱ xi nguì jní ts’e̱. 13 K’oa̱á maâne jñá, ki̱tjokàjñaá na̱xa̱ndá. Jè kji̱tji̱nguiâlá Jesús nga si̱kjiaánâkoa̱á kjo̱’in xi jè kisìkjeiín. 14 Nga i̱ i̱t’aà nangui tsjìnâná na̱xa̱ndá xi nguì jngoò k’a tíjna ni̱ta̱ kjéâne; jè titsa̱chiñáâlá na̱xa̱ndá xi i̱skan ko̱tsejèn. 15 Koi kjoa̱âla̱ mochjeénâné nga kjit’aà na̱chrjein jeya si̱kíjnaá Nainá i̱t’aà ts’e̱ Jesucristo koni jngoò kjo̱tjò xi ‘bìâlá Nainá, ‘én xi nguì tso’baá bitjoâne nga bèno̱jmiá yáâné jè. 16 Kì nìjchàajioòn nga ndaà t’e̱en, tjiì i̱tséâlà xinguio̱o mé xi tjínânò; k’oa̱á tjín kjo̱tjò xi sasénâla̱ Nainá. 17 Ti̱kitasònâlá jñà xi̱ta̱ xi jncha ítjònânò, ti̱ná’yañijonâlà. Nga̱ jñà síkinda̱ânò nga mì jchi̱ja ini̱ma̱ânò koií kjoa̱âla̱ nga tjínèâla̱ nga tsjáâla̱ kinda̱ Nainá. Ti̱kitasònâlà koni s’ín ki̱tso̱ânò méâne nga nguì ko̱ kjo̱tsjaâla̱ si̱ìxáâne nga mì ba s’e̱âla̱; tsà ba s’e̱âla̱, ni̱mé kjo̱ndaà s’e̱ânò. 18 Ti̱jét’aàâlà Nainá i̱t’aà tsa̱je̱n, nga k’oa̱á s’ín tíjngoò takònâje̱n nga ndaà tjín kjo̱hítsjeènâna̱je̱n, mejènâna̱je̱n nga ndaà s’e̱nâje̱n ni̱ta̱ mé kjoa̱âne. 19 Ãsa̱á ndaà síjéânò nga ti̱jét’aàâlà Nainá xi i̱t’aà ts’a̱n, méâne nga kàtatsjá’ndeâna nga ni̱to̱n kjíkonânò. 20 Jè Nainá xi tsjá kjoa̱’nchán xi kisìkjaáyaâla̱ i̱t’aà ts’e̱ kjoa̱ biyaà Na̱’ènâná Jesucristo, xi paxtò ítjònâla̱ ts’e̱ orrè, jè xi ko̱ jníâla̱ tsibí’ñóâne jngoò kjoa̱ xi̱tse̱ xi mìkiì kjoe̱het’aà ni̱ta̱ kjéâne, 21 kàtasíkixi̱yandaàânò ngats’iì kjoa̱ xi ndaà tjín, méâne nga kàtitasònâne koni s’ín mejènâla̱ Nainá; i̱t’aà ts’e̱ Jesucristo, k’oa̱s’ín kàtasíko̱âná koni s’ín sasénâla̱ Nainá. ¡Jeya kàtìjna Cristo ni̱ta̱ mé na̱chrjeinâne! K’oa̱á s’ín kàtama. 22 Bìtsi’bàânò ndí ’ndsè, ndaà chjoétjò ‘én xi tìkjiìânò koni s’ín tìbìnèânò nga̱ ta chiba ‘én tìkjiìânò. 23 Kàtasijiìnânò jè ’ndseé Timoteo jye tíjnandei̱íâne xi kjoa̱ ts’e̱ kjo̱’in; tsà kjoi̱í ni̱to̱n, kjíko̱âná k’e̱ nga kjián katsejènânò. 24 Ti̱ixat’aà yije jñà xi̱ta̱ xi jncha ítjònânò ko̱ ngats’iì xi̱ta̱âla̱ Cristo. Jñà xi Italia ts’e̱ nchisíhixat’aàânò. 25 Ngats’ioò, jè kàtìjnako̱ânò kjo̱ndaàâla̱ Nainá.