Gálatas 4

1 Ti̱koa̱á kèno̱jmí jngoòânò kjo̱tíxoma: Jngoò ti, k’e̱ nga tákó i̱tsé kji, k’oa̱á ngayaâla̱ koni tsà chi̱’nda tíjna nga kj’eè tsà jè be mé tsojmì xi tjínâla̱ na̱’ènâla̱ na̱s’ín k’e̱ nga ko̱ma i̱skan jè tjoéâla̱ tsojmì xi tjín. 2 Nga xi̱ta̱á síkinda̱ skanda k’e̱ nga majchínga, ko̱ tjín xi̱ta̱ xi síkinda̱ jñà tsojmìâla̱ skanda k’e̱ nga ki̱chóya na̱chrjeinâla̱ koni s’ín tsibíjna chi̱ba̱ na̱’ènâla̱. 3 Jñá xi xi̱ta̱ ‘mìâná, k’oa̱á ti̱s’ín komàt’iaán koni mat’in jñà i̱xti k’e̱ nga ti̱kj’eè mokjeiínâná i̱t’aà ts’e̱ Cristo nga jñà kjo̱tíxoma xi tjín i̱sò’nde ‘ñó tsatíxomaâná koni s’ín mat’in jñà xi chi̱’nda títsa̱jna’ñó nga mìkiì tjí’ndeâla̱ nga kítsa̱jnandei̱í. 4 Ta̱nga k’e̱ nga kichóya na̱chrjein koni s’ín tjíndaàâla̱ Nainá, jè Nainá kisìkasén ki’ndíâla̱ i̱ i̱t’aà nangui; ko̱ i̱t’aà ts’e̱ chjo̱ón kits’iìn koni s’ín ts’iìn xi ta̱xki̱ xi̱ta̱ i̱sò’nde. Ko̱ ya̱á kjòjchájiìn kjo̱tíxoma ts’e̱ xi̱ta̱ judío. 5 K’oa̱á kis’iìn Nainá, méâne nga jè Jesucristo si̱ìkítsa̱jnandei̱í jñà xi̱ta̱ xi ya̱ títsa̱jnajiìnâ‘ñó kjo̱tíxoma ko̱ méâne nga ngásòn skoétjòâná Nainá nga i̱xtiâla̱ ko̱maá. 6 Koií kjoa̱âla̱ nga jye i̱xtiâla̱ maá, Nainá kisìkasén Ini̱ma̱ Tsjeèâla̱ xi ts’e̱ Ki’ndíâla̱ ya̱ i̱jiìn ini̱ma̱âná. K’e̱ nga nokjoát’aàâlá Nainá, k’oa̱á tsò Ini̱ma̱ Tsjeèâla̱: “Ndí a̱pa”, tsòâné. 7 K’oa̱á maâne nga i̱’ndei̱ mìtsà ti̱ xi̱ta̱ chi̱’nda titsa̱jnaá; jyeé i̱xtiâla̱ Nainá ‘mìâná; ko̱ ti̱koa̱á tsjáâná Nainá ngats’iì kjo̱tjò xi jñá tjoéâná nga i̱xtiâla̱ ‘mìâná. 8 Jñò k’e̱ nga sa̱ kjòtseé, k’e̱ nga ti̱kj’eè yaxkon xi nguì jè sobà Nainá, chi̱’nda’ñó tsitsa̱jnaà nga kjo̱’ñóâné nga jñà tsanguìt’aàâlà xi mìtsà kixi̱ kjoa̱ nga Nainá. 9 Ta̱nga i̱’ndei̱ nga jye yaxkoòn xi nguì jè sobà Nainá, (ta̱nga xi nguì kixi̱ kjoa̱, jè Nainá xi jye ndaà beèxkonânò), ¿méâne k’oa̱s’ín nìkítsjeènânò nga jñà onguít’aà ìjngoò k’aâlà jñà kjo̱tíxoma i̱ma̱ xi tjínânò, jè xi tsjìnâla̱ nga’ñó, ko̱ xi ni̱mé chjíâla̱? ¿A mejènânò nga ya̱ si̱ìkítsa̱jna’ñó ìjngoò k’aânò? 10 Jñò, tákó ‘ñó yaxkón na̱chrjein ts’e̱ s’eí, ts’e̱ sá, ko̱ ts’e̱ nó. 11 ‘A̱n, makájnoâna̱ jè xá xi kis’iaàn nga kisìxájiìnânò tsà tà kjo̱tjòâne. 12 ‘A̱n nga jye tsohósi̱jnat’aàxìnâla̱ jè kjo̱tíxoma, ti̱koa̱á ya̱á kisìngásònâko̱ânò, nga jñò, mìkiì tíjiìnânò i̱t’aà ts’e̱ kjo̱tíxoma. I̱’ndei̱ k’oa̱á s’ín tìsìjéânò nga ti̱nchat’aàxìnâlà kjo̱tíxoma koni ‘a̱n jyeé tsohósi̱jnat’aàxìnâla̱. Nga sa̱ ítjòn ni̱mé kjoa̱ tjín xi ch’o kinìko̱âná. 13 Jyeé tíjiìnânò k’e̱ nga sa̱ kiaà ítjoàn nga kichjàyajiìnânò ‘én ndaàâla̱ Nainá xi kjoa̱ ts’e̱ Cristo, koií kjoa̱âla̱ nga ch’in tjínâla̱ yijoâna̱. 14 Jñò, mìkiì kinachrjenguiâná ni̱ mìtsà xìn kinìkíjnaâná, na̱s’ín kjoa̱ tsohótsjiânò nga ch’in tjínâla̱ yijoâna̱. Tà sa̱á kichjoétjòâná koni jngoò àkja̱le̱âla̱ Nainá, koni tsà jè sobà Cristo Jesús. 15 ¡Nga sa̱ ítjòn, ‘ñó tsja tjínânò! I̱’ndei̱, ¿mé xi komàânò? K’oa̱á xanânò, skanda jñà xkoòn mejèn kinachrje nga ‘a̱n kits’iìâná. 16 I̱’ndei̱, ¿a kondra̱á kóti̱jnako̱ânò, tà koií kjoa̱âla̱ nga ‘én kixi̱ beno̱jmíânò? 17 Jñà xi̱ta̱ [xi mejènâla̱ nga kjo̱tíxoma si̱kitasòn], ‘ñó bínèâla̱ yijoâla̱ i̱t’aà tsa̱jòn, ta̱nga mìkiì ndaà tjín kjo̱hítsjeènâla̱. Tà jè xi mejènâla̱ nga ko̱chrjet’aàxìnânò i̱t’aà tsa̱je̱n méâne nga jñà ko̱nguít’aàâlà. 18 Jñò, ndaà tjín k’e̱ nga ‘ñó bínèâlà yijoânò i̱t’aà ts’e̱ kjoa̱ xi mejènânò tsà ndaà tjín kjo̱hítsjeènânò ko̱ tsà kjit’aà na̱chrjein k’oa̱s’ín s’e̱en, mìtsà tà k’e̱ nga ‘a̱n tìjna̱ko̱ânò. 19 Jñò xi koni tsà ndí i̱xtiâna̱ xanânò, ‘a̱n, k’oa̱á s’ín tímat’ian koni jngoò chjo̱ón xi ki’ndí tí’beé; tseé kjo̱’in tìsìkjiaán xi kjoa̱ tsa̱jòn. Jè kjo̱’in xi tìsìkjiaán skanda k’e̱éâla kjoe̱het’aà k’e̱ nga k’oa̱s’ín si̱jchá yijoânò koni Cristo. 20 Mejènâna nga ya̱ kóti̱jnako̱ânò jè hora jè, méâne nga kj’ei̱í tsò ‘én xi kichjàko̱ânò. Jyeé mì ti̱ kiì beâna kós’ín sìkítsjeèn i̱t’aà tsa̱jòn. 21 Jñò xi mejènânò nga kjo̱tíxoma si̱kitasòn, ¿a kj’eè na’yàâlà kó tsò ‘én xi tjít’aà kjo̱tíxomaâla̱ Moisés? 22 K’oa̱á tsò nga jè Abraham, jò komà i̱xtiâla̱, jngoò ts’e̱ chjo̱ón chi̱’ndaâla̱; jè xi ìjngoò, ts’e̱é xi nguì chjo̱ónâla̱ xi mìtsà chi̱’nda tíjna. 23 Jè ki’ndíâla̱ xi chjo̱ón chi̱’nda k’oa̱á s’ín kits’iìn koni s’ín ts’iìn ngats’iì ndí i̱xti. Ta̱nga jè ts’e̱ xi nguì chjo̱ónâla̱ xi mìtsà chi̱’nda tíjna, k’oa̱á s’ín kits’iìn nga tsitasòn koni s’ín kitsjaàâla̱ tso’ba Nainá Abraham. 24 Kjoa̱ ts’e̱ íchjín koi, k’oa̱á ngayaâla̱ koni jñà kjoa̱ xi jò tsibíndaàjiìn Nainá. Jè chjo̱ón Agar, jè ngayaâla̱ kjoa̱ xi kisindaàjiìn ya̱ nindoò Sinaí k’e̱ nga kitjoéâla̱ kjo̱tíxoma Moisés. Ngats’iì xi̱ta̱ tje̱âla̱ chi̱’ndaá tsibìtsa̱jna. 25 Jè chjo̱ón Agar, jè ngayaâla̱ nindoò Sinaí xi síjna ján Arabia, ko̱ na̱chrjein i̱’ndei̱ jè mangásònâko̱ na̱xa̱ndá Jerusalén, nga jñà xi̱ta̱âla̱ chi̱’nda’ñó títsa̱jna nga tákó kjo̱tíxoma sís’inâla̱. 26 Ta̱nga jè Jerusalén xi kijna ngajmiì, tíjnandei̱íâné ko̱ ya̱á nokjoáâná ya̱ na̱xa̱ndá jè; k’oa̱á ngayaâla̱ koni tsà nea̱âná ma. 27 K’oa̱á tsò Xo̱jo̱nâla̱ Nainá nga tsò: Kàtatsjaâlè ngaji̱ xi chjo̱ón ’ndi̱ ‘mìâlè nga tsjìnâlè i̱xti. ‘Ãó chìhindáyi nga ko̱ kjo̱tsjaâlè nga mìkiì ‘yi kós’ín ma nga ts’iìn i̱xti. Nga jè chjo̱ón xi kijnei takòn, ìsa̱á kjìn ko̱ma i̱xtiâla̱ mì k’oa̱âne jè xi tjínâla̱ x’i̱n. 28 Isaac k’oa̱á s’ín kits’iìn koni s’ín kitsjaà tso’ba Nainá. Jñò ti̱koa̱á i̱xtiâla̱á maá xi̱ta̱ jchíngaâla̱ Isaac koni s’ín kitsjaàâla̱ tso’ba Nainá. 29 Jè ki’ndí xi tà k’oa̱s’ín kits’iìn koni ts’iìn yije xi̱ta̱ i̱sò’nde, kiìtji̱ngui kondra̱âla̱ jè xi i̱t’aà ts’e̱ Ini̱ma̱ Tsjeèâla̱ Nainá kits’iìnâne. Koni s’ín komà jñà na̱chrjein koi, tákó k’oa̱á s’ín ma skanda na̱chrjein i̱’ndei̱. 30 Ta̱nga, ¿kó tsò Xo̱jo̱nâla̱ Nainá? K’oa̱á tsò: “Ti̱yótji̱nguiâla̱ jè chjo̱ón chi̱’nda ko̱ ki’ndíâla̱; nga jè ki’ndíâla̱ ni̱mé kjo̱tjò tjoéâla̱, tà jè tjoéâla̱ kjo̱tjò jè ki’ndíâla̱ xi mìtsà chjo̱ón chi̱’nda." 31 Jñò ndí ’ndsè ko̱ ndí tichjaá, k’oa̱á s’ín tjín, jñá mìtsà i̱xtiâla̱ chjo̱ón chi̱’nda maá, jñáâná xi i̱xtiâla̱ chjo̱ón xi mìtsà chi̱’nda tíjna.