2 Corintios 8

1 Ndí ’ndsè ko̱ tichjaá, mejènâna nga kàtasijiìnânò kjo̱ndaàâla̱ Nainá xi okó i̱jiìn na̱xa̱ndáâla̱ Cristo xi títsa̱jna ya̱ nangui Macedonia. 2 Na̱s’ín ‘ñó tse kjo̱’in nchihotojiìn ti̱koa̱ tí’yaâla̱ nga ‘ñó matsjaâla̱. Na̱s’ín ‘ñó xi̱ta̱ i̱ma̱, jñà tsojmì xi tsjá kjo̱tjòâla̱ Nainá, ko̱ó ini̱ma̱âla̱ tsjá koni tsà ‘ñó xi̱ta̱ nchi̱ná. 3 ‘A̱n, tíbeâná nga ko̱ó kjo̱tsjaâla̱ tsjá to̱n xi kjo̱tjò ts’e̱ Nainá koni kji bijchó nga’ñóâla̱, saà k’oa̱á skanda tsjásònâné koni kji bijchó nga’ñóâla̱. 4 Jñà xi̱ta̱ koi, ‘ñó tsibítsi’baânaje̱n nga mejènâla̱ nga ti̱koa̱ si̱ìkasénâla̱ to̱n kjo̱tjò jñà xi̱ta̱ na̱xa̱ndáâla̱ Cristo jè i̱’nde ñánda ko̱chjeénâla̱. 5 Jñà xi̱ta̱ koi, ìsa̱á tsato kitsjaà koni s’ín titsa̱chiñáâla̱je̱n. Ãtjòn nangui kisìkítsa̱jnaâla̱ Nainá ini̱ma̱âla̱, i̱kjoàn, k’oa̱á ti s’ín kis’iìn i̱t’aà tsa̱je̱n koni s’ín mejènâla̱ Nainá. 6 K’oa̱á maâne bítsi’baâla̱je̱n Tito koni s’ín tsibíts’ia̱ko̱ xá xi kitjoéâla̱ k’e̱ nga sa̱ ítjòn, k’oa̱á ti̱s’ín kàtasíkjehet’aàâne nga kàtíxkó to̱n kjo̱tjò xi jñò ‘bioò. 7 Ta̱nga jñò, ‘ñó ndaà ’nèânò ngats’iì kjoa̱ xi ’nè nga ndaà mokjeiínânò, nga ndaà nokjoà, nga ndaà tjínânò kjoa̱ chji̱ne̱, nga titsa̱jnandaà nga mejènânò si̱chját’aà ni̱ta̱ mé kjoa̱âne, nga tjínânò kjoa̱tjòcha nga i̱t’aà tsa̱je̱n komàânò. Koni s’ín ’nè yije kjoa̱ koi, k’oa̱á ti̱s’ín ti̱katonèâlà jè kjo̱tjò xi ‘bioò. 8 Mìtsà k’oa̱s’ín tìxanânò koni tsà jngoò kjo̱tíxoma tìtsjaânò. Jè xi mejènâna nga skoeè a nguì kixi̱í kjoa̱ nga tjínânò kjoa̱tjòcha koni s’ín tjínâla̱ xi̱ta̱ xi kj’ei̱í nga titsa̱jnandaà nga tsjá kjo̱tjòâla̱. 9 Jñò, jyeé ‘yaà kjo̱ndaàâla̱ Jesucristo xi otíxomaâná. Xi̱ta̱ i̱ma̱á kis’iìn yijoâla̱ xi kjo̱ndaà tsa̱jòn, na̱s’ín ts’e̱ yijeâné ngats’iì tsojmì xi tjín, méâne jñò tjoéânò kjoa̱ nchi̱ná xi tjínâla̱. 10 Tsjaà jngoòânò kjo̱hítsjeèn i̱t’aà ts’e̱ kjoa̱ jè. Ko̱chjeénânò nga ndaà si̱kitasòn koni s’ín tsibìts’ia̱ko̱o jè nó xi tsato nga kits’ioò to̱n xi kjo̱tjò ts’e̱ Nainá. K’oa̱s’ín ki’nè nga ko̱ kjo̱tsjaânò kits’ioò. 11 I̱’ndei̱, tákó k’oa̱á s’ín t’e̱en koni s’ín tsibìts’ia̱ko̱o. K’oa̱á s’ín ti̱kjehet’aà koni s’ín kjòmejènânò nga sa̱ ítjòn. K’oa̱á kji tjioò koni kji bijchó nga’ñóânò. 12 K’e̱ nga jngoò xi̱ta̱ xi tíjnandaà nga ko̱ ini̱ma̱âla̱ mejènâla̱ tsjá, k’oa̱á kji kàtatsjá koni kji ma xi s’ín, mìtsà tsato tínìjéâla̱. Nainá mìtsà tsato síjé koni kji ma xi ’nè. 13 Mìtsà koi kjoa̱âla̱ nga kjo̱’in s’e̱ânò nga si̱chját’aàâlá xi̱ta̱ xi kj’ei̱í, jèâné nga ngásòn ngáya s’e̱âná mé xi mochjeénâná. 14 I̱’ndei̱, jñà xi̱ta̱ koi, tsjìnâla̱ mé xi mochjeénâla̱, ta̱nga jñò, tjínânò. K’e̱ nga kj’ei̱í na̱chrjein, jñà xi̱ta̱ koi, s’e̱éâla̱ mé xi mochjeénâla̱, ko̱ jñà ko̱si̱ko̱ânò k’e̱ nga jñò tsjìnânò. K’oa̱á s’ín ngásòn ngáya s’e̱âná mé xi ko̱chjeénâná. 15 K’oa̱á s’ín tíchja̱ Xo̱jo̱nâla̱ Nainá nga tsò: “Jè xi kjìn tsibíxkó, ni̱mé tsininguiâla̱, koa̱ jè xi chiba tsibíxkó, ni̱mé kisìchjaàt’aàâla̱." 16 Ndaà chjíâla̱ Nainá nga k’oa̱s’ín tsibíjiìn ini̱ma̱âla̱ jè Tito nga ti̱koa̱ kisìkájno i̱t’aà tsa̱jòn koni s’ín ‘a̱n kisìkájnoa. 17 Kixi̱í kjoa̱ jè Tito kòkjeiínâla̱ koni s’ín tsibit’ínâla̱; ti̱koa̱ jè, ‘ñó mejènâla̱ nga kiìkonânò; ikoón xi kitsò nga kji̱konânò. 18 Jè Tito tífìko̱ jngoò ’ndseé xi ndaà síkíjna ngats’iì xi̱ta̱ na̱xa̱ndáâla̱ Cristo xi tjín ni̱ta̱ ñándaâne; nga jè ’ndseé ndaà chja̱ya ‘én ndaàâla̱ Nainá xi kjoa̱ ts’e̱ Cristo. 19 Mìtsà tà koi kjoa̱ koi, ti̱koa̱á jñà na̱xa̱ndáâla̱ Cristo jaàjiìn jè ’ndseé nga koa̱hijtako̱âna̱je̱n nga onguíko̱âje̱n to̱n kjo̱tjòâla̱ Nainá xi ngaje̱n titsa̱bíxkóâje̱n méâne jè Na̱’ènâná jeya kíjna, ti̱koa̱ skoe̱ jñà xi̱ta̱ nga ko̱ó ini̱ma̱âna̱je̱n síchját’aàâla̱je̱n xi̱ta̱. 20 K’oa̱á maâne nga mì yá xi̱ta̱ ki̱chja̱jnoânaje̱n kós’ín ko̱chjeén to̱n xi tse tímaxkó. 21 K’oa̱á s’ín bìnèâla̱je̱n yijoâna̱je̱n kjoa̱ xi ndaà tjín nga nguixko̱n Nainá ko̱ ti̱koa̱ nguixko̱n xi̱ta̱. 22 Tito, ti̱koa̱á báhijtako̱ ìjngoò ’ndsè xi xki̱ xi ján ki’yaâje̱n nga ‘ñó bínèâla̱ yijoâla̱ nga kjìn xá maâla̱. Tjín kixi̱âné i̱’ndei̱, ìsa̱á ndaà bínèâla̱ yijoâla̱ nga síchját’aàânò nga ìsa̱ ndaà beè takònânò. 23 Jè Tito, amigo ts’a̱nâná nga ‘a̱án síxáko̱âna̱ xi kjo̱ndaà tsa̱jòn. Jñà xi̱ta̱ ’ndseé xi i’nga, jñà na̱xa̱ndáâla̱ Cristo xi tjín nangui Macedonia jñà kisìkasén; nga i̱t’aà ts’e̱ xi̱ta̱ ’ndseé koi, jè Cristo jeya bìjna. 24 Ta̱kóâlà xi̱ta̱ koi kjoa̱tjòcha xi tjínânò, ta̱kóâlà kjo̱ndaà xi tjínânò koni s’ín jye o̱kixanâla̱ jñà xi̱ta̱ ’ndseé koi, méâne nga skoe̱âne jñà na̱xa̱ndáâla̱ Cristo xi i’nga nga kixi̱ kjoa̱.