2 Corintios 7

1 Jñò ndí ’ndsè xi matsjake̱ânò, k’oa̱á tjín kjo̱ndaà xi tsjáâná Nainá koni s’ín kitsjaà tso’ba. K’oa̱á maâne ki̱nchat’aàxìnâlà ngats’iì kjoa̱ xi tjé tjín xi síkits’ón yijoâná ko̱ ini̱ma̱âná, méâne tsjeè ki̱tsa̱jnaá nga nguixko̱n Nainá. Ndaà jcha̱xkoán Nainá méâne nga kjit’aà na̱chrjein ìsa̱ tsjeè si̱jchá yijoâná. 2 Chjoétjòânáje̱n nga ko̱ ini̱ma̱ânò. Ngaje̱n, ni̱yá xi̱ta̱ xi ch’o nìko̱âje̱n; ni̱ sa̱á yá xi̱ta̱ nìkí’onâje̱n, ni̱ sa̱á jngoò xi̱ta̱ chona̱cha̱nâla̱je̱n. 3 K’e̱ nga k’oa̱s’ín tìxanânò, mìtsà mé kjoa̱ xi ch’o tjín tìhonèânò; jyeé k’oa̱ kixanânò nga sa̱ ítjòn, kjit’aá na̱chrjein nga matsjachaânòje̱n, na̱s’ín ki̱yá ko̱ tsà titsa̱jnakoaán, ko̱ó ini̱ma̱âna̱je̱n nga matsjachaânòje̱n. 4 Nguì ‘én kixi̱í xi tìchjàko̱ânò; ‘ñó matsjaâla̱ ini̱ma̱âna̱ i̱t’aà tsa̱jòn. ‘Ãó tjínâna̱ kjo̱jetakòn ko̱ ta̱xki̱ tsjaá maâla̱ ini̱ma̱âna̱, na̱s’ín tse kjo̱’in tjínânaje̱n. 5 K’e̱ nga j’iìâje̱n i̱ nangui Macedonia, ni̱mé xi komà kinìkjáyaâje̱n. ‘Ãó kinìkájnoâje̱n; xki̱ xi ján kis’eânaje̱n kjoa̱siì, koa̱ ya̱ i̱jiìn ini̱ma̱ânaje̱n ‘ñó kisinchaàxkón. 6 Ta̱nga Nainá síjehikonâné xi̱ta̱ xi indaà tjín ikon; kisìjehikònânaje̱n k’e̱ nga j’iì Tito. 7 Mìtsà tà koi kjoa̱âla̱ nga j’iì Tito, jèâné nga jè, ti̱koa̱á tsja tjínâla̱ xi i̱t’aà tsa̱jòn. Tsibéno̱jmíânaje̱n nga jñò, ‘ñó mejènânò nga jcha̱xkonânáje̱n. K’oa̱á ti̱ kitsòânaje̱n nga ba titsa̱jnaà koa̱ makájnoânò i̱t’aà ts’a̱n. K’e̱ nga ki’nchrè ‘én koi, ‘a̱n, ìsa̱á ndaà kjòtsjaâna. 8 Jñò, na̱s’ín tà kjoa̱ba tsohotsjìânò k’e̱ nga kisìkasén ítjònânò xo̱jo̱n, i̱’ndei̱, mì ti̱ kiì tìsìkájnoâna. Nga sa̱ ítjòn kisìkájnoa nga kisìkasén jngoòânò xo̱jo̱n, koií kjoa̱âla̱ nga kisibaá chiba na̱chrjeinânò. 9 Ta̱nga i̱’ndei̱, matsjaâla̱ ini̱ma̱âna̱, mìtsà koi nga kjoa̱ba kis’eânò kjoa̱ ts’e̱ xo̱jo̱n, koiâné nga i̱t’aà ts’e̱ Nainá kinìkájno jéânò nga mì ti̱ jé chinchaàtsjiânò. Jñò, k’oa̱á s’ín kjòbaânò koni s’ín mejènâla̱ Nainá. K’oa̱á maâne nga ni̱mé kjoa̱ ch’o kisakòânò i̱t’aà tsa̱je̱n. 10 Jè kjoa̱ba xi s’eâná koni s’ín mejènâla̱ Nainá, jè síxájiìn ini̱ma̱âná nga nìkájnoaá jéâná nga mì ti̱ jé binchaàtsjiâná méâne nga ko̱ma ki̱tjokàjñaá kjo̱’in; ko̱ mìtsà mé xi i̱skan si̱kájnoaá. Ta̱nga jè kjoa̱ba xi tsjáâná i̱sò’nde nga mìkiì mokjeiínâná i̱t’aà ts’e̱ Nainá, jé síxájiìn ini̱ma̱âná nga kjoa̱ biyaà fìko̱âná. 11 Ta̱nga ti̱kítsjeèn ngats’iì kjo̱ndaà xi ki’nè ta koi kjoa̱âla̱ nga kjoa̱ba kisakòânò i̱t’aà ts’e̱ Nainá. I̱’ndei̱ titsa̱jnandaàânò nga s’e̱en kjoa̱ xi tjínèânò nga si̱kitasòn; k’oa̱á s’ín titsa̱hokoò yijoânò nga ni̱mé jé tjínânò; majtichaânò kjoa̱ ts’e̱ jé; i̱’ndei̱ tsakjoònâchaà Nainá; mejènânò nga jcha̱xkonâná; makájnoóânò i̱t’aà ts’a̱n; k’oa̱á komàâne nga kits’iìâlà kjo̱’in jè xi̱ta̱ xi tsohótsji jé. Ngats’iì kjoa̱ koi koni s’ín ki’nè, k’oa̱á s’ín ‘yaâla̱ nga mìtsà ngats’ioò tjínânò jé. 12 ‘A̱n, koni s’ín kiskiìânò xo̱jo̱n carta xi kisìkasénânò, mìtsà jè tìsìkítsjeèn i̱t’aà ts’e̱ xi̱ta̱ xi tsohótsji jé; ni̱ mìtsà i̱t’aà ts’e̱ xi̱ta̱ xi kitsì’on kisìkasénânò xo̱jo̱n. Jèâné nga ti̱jñò ki’yaânò nga nguixko̱n Nainá nga kixi̱í kjoa̱ nga tjòcha ‘yaânáje̱n. 13 Maje takònânáje̱n ngats’iì kjoa̱ xi ki’nè. Mìtsà ta koií kjoa̱âla̱ nga maje takònâje̱n i̱t’aà ts’e̱ kjoa̱ koi; ìsa̱ ‘ñó matsjaânaje̱n nga ki’yaâje̱n Tito nga ‘ñó tsja tjínâla̱, koií kjoa̱âla̱ nga ngats’ioò kinìtsjako̱o. 14 ‘A̱n, jyeé ko̱s’ín ndaà kisìkítsa̱jnaânò nga nguixko̱n Tito koni kixanâla̱. Jñò, ni̱mé kjoa̱ tjín xi ch’o kinìkíjnaâná. Koni s’ín nga ngats’iì ‘én xi ki’mìânòje̱n, nguì ‘én kixi̱âné, k’oa̱á ti̱s’ín kixi̱ itjo koni tsò ‘én xi kixanâla̱ Tito nga ndaà kisìkítsa̱jnaânò. 15 Tito, ìsa̱á ‘ñó ndaà matsjakeèânò k’e̱ nga bítsjeènâla̱ nga ngats’ioò ndaà kinìkitasònâlà ko̱ ndaà kichjoétjò k’e̱ nga ijchòkonânò, koa̱ ‘ñó ndaà kiyaxkón. 16 I̱’ndei̱, i̱t’aà tsa̱jòn ma’ñót’aà takoàn ni̱ta̱ mé kjoa̱âne, k’oa̱á maâne nga matsjaâla̱ ini̱ma̱âna̱.