2 Corintios 12

1 Ni̱mé xi sìkijne nga ndaà síkíjna yijoâna̱. Ta̱nga mochjeénâné nga k’oa̱ xánânò kjoa̱ xi tsakóâna Nainá k’e̱ nga tsohóko̱âna, jè kjoa̱ xi Nainá kisìkichi̱yaâna. 2 Beèxkonâná jngoò xi̱ta̱ xi fìt’aàâla̱ Cristo. Tjínâla̱ te ñijòn nó nga kiìko̱ Cristo skanda jè ngajmiì xi maâne jàn [ñánda tíjna Nainá]. Mìkiì be tsà k’oa̱á s’ín kiìko̱ nga yijo, a xi tà ini̱ma̱á kiìko̱. Jè Nainá tíjiìnâla̱. 3 Ta̱nga beâná nga jè xi̱ta̱ jè, kiì. A yijoâné, o a tà ini̱ma̱á kiì, tà jngoò Nainá tíbeè. 4 Kiì skanda ján i̱’nde ñánda ndaà jchán choòn ján ngajmiì ñánda tíjna Nainá. Kiì’nchré ‘én xi ‘ñó xkón tjín, xi ni̱jngoò xi̱ta̱ ko̱ma s’e̱no̱jmíâla̱. 5 Koni komàt’in xi̱ta̱ jè, jèâné xi ok’ìnâla̱ nga ndaà kíjna. Ta̱nga i̱t’aà ts’a̱n mìkiì ok’ìnâna nga ‘a̱n ndaà síkíjna yijoâna̱. Ta̱jngoò tsà jñà kjoa̱ xi mahindaàjñaà ndaà síkíjna. 6 Tsà ndaà síkíjna yijoâna̱ [koni tjín kjoa̱ xi ‘a̱n kìjtseè ngajmiì], mìtsà ‘én ská beno̱jmiá, ‘én kixi̱í chjà. Ta̱nga majìnâna nga ndaà síkíjna yijoâna̱ i̱t’aà ts’e̱ kjoa̱ xi kìjtseè méâne nga ni̱jngoò xi̱ta̱ ìsa̱ ’nga si̱ìkíjnaâna ta nga̱tjìâla̱ kjoa̱ koi. Ko̱s’ín kàtasíkinda̱âna kó s’iaàn, kó s’ín chjà, ko̱ kó s’ín tìsìjchá yijoâna̱. 7 Méâne nga mì ‘a̱n ndaà kóti̱jnaâna i̱t’aà ts’e̱ kjoa̱ xi ‘a̱n tsakóâna Nainá xi jeya jchán tjín, kiskaàt’aà jngoòâna ch’in, k’oa̱á ngayaâla̱ koni tsà na’yá nchajiìn yijoâna̱. Jè xi̱ta̱ nei̱í kijtseètoònâna nga kisìkasénâna kjo̱’in. 8 Ko̱ jàn k’a bítsi’baâla̱ Na̱’ènâná nga kàtjaàxìnâna̱ kjo̱’in jè. 9 Ta̱nga jè Nainá ta̱ k’oa̱á tsòâna: “Jè kjo̱ndaàâna̱ ya̱á tíjnako̱âlè. Ya̱á okoaà yije nga’ñóâna̱ k’e̱ nga tsjìnâlè nga’ñó.” K’oa̱á maâne jè kjoa̱ xi mahindaàjñaà, jè xi ndaà síkíjnaâna yijoâna̱, méâne nga jè nga’ñóâla̱ Cristo kíjnako̱âna. 10 Koií kjoa̱âla̱ matsjaâna k’e̱ nga ma indaàjñaà. Ti̱koa̱á matsjaâna k’e̱ nga chja̱’onâko̱âna xi̱ta̱, k’e̱ nga mé tsojmì xi chijaâna, k’e̱ nga fìtji̱ngui kondra̱âna xi̱ta̱, k’e̱ nga mé kjoa̱ xi ‘iín maâna síkjiaán i̱t’aà ts’e̱ Cristo. K’e̱ nga ma indaàjñaà, k’e̱é ìsa̱ ndaà s’e̱âla̱ nga’ñó ini̱ma̱âna̱ [nga jè Cristo tsjáâna]. 11 ‘A̱n, k’oa̱á s’ín kichjà, koni s’ín chja̱ xi̱ta̱ ‘én xi ni̱mé chjíâla̱. Ta̱nga jñò ki’nèâná kjo̱’ñó. Jñò xi tjínèânò nga ndaà si̱ìkíjnaâná. Nga ‘a̱n mìtsà ìsa̱ nangui tìjna̱âla̱ jñà xi̱ta̱ xi ‘mìâlà jñò nga ìsa̱ ’nga títsa̱jnaâla̱ jñà xi̱ta̱ xi tsibíxáyaâla̱ Cristo; na̱s’ín ‘a̱n nìmé chjíâna. 12 K’e̱ nga tsohóti̱jnako̱ânò kis’eâna̱ kjoa̱tsejta nga tsakoòânò kjoa̱xkón xi okó chi̱ba̱ ko̱ xi okó kjoa̱ jeyaâla̱ Nainá ko̱ nga’ñóâla̱. Kjoa̱ koi okó nga kixi̱ kjoa̱ nga ‘a̱nâná xi tsibíxáyaâna Cristo. 13 ¿Jñò, mé xi ìsa̱ nangui kisìkítsa̱jnaânò koni jñà na̱xa̱ndáâla̱ Cristo xi kj’ei̱í? ¿A koií majtiânò nga mì jñò kisìjtiânò k’e̱ nga mé tsojmì xi kichijàt’aàâna? Ti̱jchàat’aàâná nga ni̱mé kisìjéânò. 14 Jyeé tìjna̱ndaà xi maâne jàn k’a nga kjíkonânò. Tákó k’oa̱s’ín s’iaàn, mìtsà mé xi siìjéânò. Mìtsà koi otsjià mé tsojmì xi tjínânò; kjo̱ndaà tsa̱jòn xi otsjià. Nga jñà xi̱ta̱ jchínga tjínèâla̱ nga koi̱ìtjò to̱n xi ko̱chjeénâla̱ i̱xti, mìtsà jñà i̱xti tjínèâla̱ nga koi̱ìtjò to̱n xi ko̱chjeénâla̱ xi̱ta̱ jchínga. 15 Matsjaáâna nga sìkjèya yije mé xi tjínâna, skanda tìsìkjè yijoâna̱ kjoa̱ ts’e̱ ini̱ma̱ânò. Nga ìsa̱ ndaà matsjake̱ânò, jñò, ¿a ìsa̱á chiba matsjachaâná? 16 Kixi̱í kjoa̱, ‘a̱n, ni̱mé tsojmì xi kisìjéânò. Ta̱nga tjín i’nga xi̱ta̱ xi tsò: “’Ãó maña̱ nga kona̱cha̱nâla̱ xi̱ta̱." 17 Ta̱nga, ¿mé xi kiskoòna̱cha̱nânò k’e̱ nga kisìkasén i’ngaânò xi̱ta̱? 18 Tsibítsi’baâla̱ Tito nga kiìkonânò ko̱ jè ’ndsè xi ìjngoò. Jè Tito, ¿a kiskoòna̱cha̱ánânò? ¿A mìtsà ngásòn ti̱koiâne kjo̱hítsjeèn tjaàjiìnâje̱n, ti̱koa̱ ti̱koiâne ndi̱yá kixi̱ tjaàyaâje̱n? 19 ¿A k’oa̱á s’ín nìkítsjeèn nga yijoânaje̱n titsa̱nokjoàtjiâje̱n? Majìn, tíbeè Nainá koi ‘én xi titsa̱nokjoàâje̱n nga Cristo titsa̱jnako̱âje̱n. Jñò ndí ’ndsè xi ‘ñó matsjake̱ânò, ngats’iì kjoa̱ koi, kjo̱ndaà tsa̱jònânò nga ìsa̱ tse nga’ñó kàtas’eânò. 20 Makájnoâna tsà k’e̱ nga kìjchokonânò tsà mì k’oa̱á s’ín titsa̱’nè koni s’ín mejènâna. Koa̱ ‘a̱n tsà mì k’oa̱ s’ín tìs’iaàn koni s’ín mejènânò jñò. Koií makájnoâna tsà koií na̱chrjeinâla̱ titsa̱bixkànâkjoò, tsà kjoa̱xìtakòn tjínânò, tsà kjoa̱jti tíjiìn ini̱ma̱ânò, tsà jò tsà jàn ya titsa̱jnaâlà xinguio̱o, tsà ‘én ndiso titsa̱bìnèâlà xinguio̱o, tsà xinguio̱o titsa̱nokjoájnoâlá, tsà ’nga takòn titsa̱’nè ko̱ tsà mìkiì ndaà titsa̱jnako̱o xinguio̱o nga jngoò ìjngoò. 21 Ti̱koa̱á makájnoóâna k’e̱ nga kìjchokon ìjngoò k’aânò tsà Nainá si̱ìsobàâna nga nguixkoòn jñò. Tsà Nainá si̱ìkjindáyaâna xi kjoa̱ tsa̱jòn nga kjìn maânò xi jye kjòtseé binchaàtsjioò jé nga mìkiì nìkájno jéânò kjoa̱ tjé xi ’nè ko̱ kjoa̱ chijngui xi ’nè ko̱ ngats’iì kjoa̱ ch’o xi ’nè.