2 Corintios 11

1 T’e̱en kjo̱ndaà, ti̱ná’ya jngoò tjòâná; k’oa̱á s’ín tìchjàko̱ânò koni jngoò xi̱ta̱ xi mì ndaà tíjna kjo̱hítsjeènâla̱. Kàtas’eânò kjoa̱tsejta. 2 Koni s’ín makájnoâla̱ Nainá, ‘a̱n, k’oa̱á ti̱s’ín makájnoâna i̱t’aà tsa̱jòn nga mì kj’ei̱í xi̱ta̱ ko̱nguít’aàâlà. Ta jngoó x’i̱n tsibìndaàjiìnâko̱ânò nga siìnga̱tsjaânò, jè Cristo. ‘A̱n mejènâna nga tsjeè siìnga̱tsjaânò Cristo koni jngoò tsòti xo̱ngó. 3 Ta̱nga tsakjoònâná tsà k’oa̱s’ín ko̱mat’ioòn koni komàt’in Eva nga kiskoòna̱cha̱nâla̱ jè ye̱, tsà ya̱ ki̱ts’ónâjiìn kjo̱hítsjeènânò nga ki̱nchat’aàxìnâlá jè kjoa̱tjòcha kixi̱ xi tjínânò ko̱ Cristo nga mì ti̱ tíjngoòâne takòn nga onguít’aàâlà. 4 Nga biì’ndeâlà nga kj’ei̱í xi̱ta̱ bijchókonânò xi kj’ei̱í tsò ‘én xi okóyaânò i̱t’aà ts’e̱ Jesús koni tsò ‘én kixi̱ xi ji̱n bèno̱jmíânòje̱n, ko̱ mokjeiínânò nga chjoétjò jngoò ini̱ma̱ xi kj’ei̱í xi mìtsà jè Ini̱ma̱ Tsjeèâla̱ Nainá xi jye kichjoétjò. Ti̱koa̱, mokjeiínânò nga kj’ei̱í tsò ‘én ndaàâla̱ Nainá xi kjoa̱ ts’e̱ Cristo xi béno̱jmíânò koni tsò xi kòkjeiínânò nga sa̱ ítjòn. Nga ndaà sasénânò nga jñà na’yàâlà xi̱ta̱ koi. 5 ‘A̱n, mìtsà ìsa̱ nangui tìjna̱âla̱ jñà xi̱ta̱ xi ‘mìâlà jñò nga ìsa̱á ’nga títsa̱jnaâla̱ jñà xi̱ta̱ xi tsibíxáyaâla̱ Cristo. 6 ‘A̱n, na̱s’ín mìkiì ndaà maâna chjà, ni̱mé kjo̱hítsjeèn chijat’aàâna xi i̱t’aà ts’e̱ ‘énâla̱ Nainá. Jñò, jyeé ndaà ‘yaà, ‘a̱n, ni̱ta̱ ñánda nga tìjna̱a, k’oa̱á s’ín tsakoòânò. 7 ¿A ch’oó kis’iaàn nga tsakoòyaânò ‘én ndaàâla̱ Nainá nga ni̱mé kisìkíchjíânò? Nangui tsohóti̱jnako̱ânò skanda kisìhi̱ma̱âná yijoâna̱ méâne jñò ìsa̱ ’nga kisìkítsa̱jnaânò. 8 Jñà xi̱ta̱ na̱xa̱ndáâla̱ Cristo xi xìn i̱’ndeâla̱ kisìchját’aàâna nga tsachrjekàjnoâla̱ to̱n méâne komà kisìxáko̱ânò nga tsibeno̱jmíânò ‘én ndaàâla̱ Nainá xi kjoa̱ ts’e̱ Cristo. 9 K’e̱ nga tsohóti̱jnako̱ânò, ni̱yá xi kisìjtiâla̱ mé xi kichijàt’aàâna. K’e̱ nga mé tsojmì xi kjòchjeénâna, jñà xi̱ta̱ ’ndseé xi j’iìâne nangui Macedonia kitsjaàâna. Nga majìnâna nga chjá ko̱maânò. Na̱chrjein xi fìâìsa, tákó k’oa̱á s’iaàn. 10 Nguì ko̱ó kjoa̱kixi̱âla̱ Cristo koni tìxanânò nga mì yá xi ko̱tichjoàâna kóho̱kji nangui Acaya nga ndaà síkíjna yijoâna̱ kjoa̱ xi tìs’iaàn nga mì to̱n kisìjéânò. 11 ¿Méâne k’oa̱ xanâna nga chjà? ¿A koiâné nga mìkiì matsjake̱ânò? Tíbeè Nainá, ‘a̱n ‘ñó matsjake̱ânò. 12 Ta̱nga tákó k’oa̱á s’iaàn koni kisìko̱ânò nga sa̱ ítjòn nga ni̱mé kisìjéânò méâne nga mìkiì tsjaà’ndeâla̱ nga ki̱tso̱ jñà xi̱ta̱ xi mejènâla̱ nga jeya síkítsa̱jna yijoâla̱ nga k’oa̱á ti̱s’ín nchis’ín koni ngaje̱n. 13 Xi̱ta̱ koi, xi̱ta̱ ndisoâné. Mìtsà kixi̱ kjoa̱ nga xi̱ta̱ xi jè Cristo tsibíxáyaâla̱. Ta kona̱cha̱nâné nga síkjatjìyaâla̱ yijoâla̱ koni tsà jè Cristo tsibíxáyaâla̱. 14 Kjoa̱ koi, mìtsà kjoa̱ xi̱tse̱; ti̱jèâne xi̱ta̱ nei̱í síkjatjìyaâla̱ yijoâla̱ koni jngoò àkja̱le̱âla̱ Nainá xi ote kji. 15 Mìtsà xkón tjín, xó k’oa̱á ko̱maâne nga jñà xi̱ta̱ xi síxáâla̱ jè xi̱ta̱ nei̱í, k’oa̱á s’ín síkjatjìyaâla̱ yijoâla̱ koni tsà xi̱ta̱ xi béno̱jmí ‘én kixi̱âla̱ Nainá. Xi̱ta̱ koi k’e̱ nga kjoe̱het’aà na̱chrjeinâla̱, k’oa̱á s’ín ko̱mat’in koni s’ín tjín kjoa̱ ch’o xi nchis’ín. 16 Ãjngoò k’a k’oa̱ tìxanânò, kì k’oa̱á s’ín nìkítsjeèn nga mìkiì ndaà tjín kjo̱hítsjeènâna̱. Tsà k’oa̱s’ín sìkítsjeèn, tjiì’ndeâná nga ‘a̱n, k’oa̱ ti̱s’ín ndaà síkíjna i̱tsé yijoâna̱ koni s’ín xi̱ta̱ xi i’nga xi mì ndaà tjín kjo̱hítsjeènâla̱. 17 K’e̱ nga ko̱s’ín tìchjà, mìtsà k’oa̱s’ín chjà koni s’ín sasénâla̱ Na̱’ènâná, k’oa̱á s’ín tìchjà koni jngoò xi̱ta̱ xi mì ndaà tjín kjo̱hítsjeènâla̱ nga ti̱’a̱n ndaà síkíjnaâna yijoâna̱. 18 Koni s’ín kjìn ma xi̱ta̱ xi ti̱jñà ndaà síkítsa̱jnaâne yijoâla̱ i̱t’aà ts’e̱ kjoa̱ xi s’ín, ‘a̱n k’oa̱á ti̱s’ín mejènâna nga ti̱’a̱n ndaà síkíjnaâna yijoâna̱. 19 Jñò, bixónânó nga xi̱ta̱ chji̱ne̱ânò, ta̱nga, ¿méâne biì’ndeâlà jñà xi̱ta̱ xi mì ndaà tsò kjo̱hítsjeènâla̱? 20 Jñò, nìkjeiínâlà xi̱ta̱ xi kjo̱’ñó s’ínânò nga chi̱’nda ’nèâlà, xi̱ta̱ xi maâla̱ síkjehejnoânò tsojmì xi tjínânò, xi̱ta̱ xi jñò beètoònânò, xi̱ta̱ xi ochrjekànguiânò, koa̱ nìkjeiínâlà xi̱ta̱ xi síjts’iìnâ‘a i̱sénânò. 21 Jñò, ¿kó s’ín nìkítsjeèn? ¿A masobàâna nga indaàkjoa̱ kinìko̱ânòje̱n nga mì k’oa̱á s’ín kinìko̱ânòje̱n koni kisìko̱ânò jñà xi̱ta̱ xi i’nga? Tsà tjín i’nga xi ‘ñó ts’e̱n s’ín nga chja̱, ‘a̱n ti̱koa̱ ts’e̱én tìs’iaàn koni s’ín ‘ñó tìchjàko̱ânò. Ta̱nga ta k’oa̱á s’ín tìchjà koni tsà mìkiì ndaà tjín kjo̱hítsjeènâna̱. 22 Jñà xi̱ta̱ koi, tsà kixi̱ kjoa̱ nga xi̱ta̱ hebreoâné, ‘a̱n, ti̱koa̱á xi̱ta̱ hebreoâná. Tsà xi̱ta̱ Israelâné, ‘a̱n, ti̱koa̱á xi̱ta̱ Israelâná. Tsà tje̱âla̱ Abrahamâné, ‘a̱n, ti̱koa̱á tje̱âla̱ Abrahamâná. 23 ¿A chi̱’ndaâla̱ Cristoâné? ‘A̱n, ìsa̱á ndaà síxáâla̱ Cristo. (K’e̱ nga ko̱s’ín chjà, k’oa̱á ngayaâla̱ koni jngoò xi̱ta̱ xi mìkiì ndaà tjín kjo̱hítsjeènâla̱.) ‘A̱n ìsa̱á ‘ñó síxáâla̱. Ãsa̱á ko̱ kjìn k’a óti̱jnaya nda̱yá, ìsa̱ ko̱ kjìn k’a síki’onâna̱ xi̱ta̱, ti̱koa̱ ko̱ kjìn k’a nga jye kjo̱meè sík’enâna̱ xi̱ta̱. 24 Jñà xi̱ta̱ judío, ‘òn k’a kitsjaàâna kjo̱’in nga tsakajáâna xo̱x’ín xi s’e̱âla̱ kohòyo̱ xi kaàn chrj’oòn ñijòn tjínâne nga jngoò ìjngoò k’a. 25 Jàn k’a kits’iìnâna kjo̱’in nga tsajáâna xka̱jnchra̱ jñà xi̱ta̱; jngoò k’a tsibínèâna nda̱jo̱ xi̱ta̱ nga mejènâla̱ si̱ìk’enâna; jàn k’a kiskaàjiìnândáko̱âna chitso ya̱ i̱jiìn ndáchikon; jngoò na̱chrjein ko̱ jngoò ni̱tje̱n tsohóti̱jnajñaà i̱jiìn ndáchikon. 26 Ni̱ta̱ ñánda nga ojmeè, ta̱ kjo̱xkón tjín kjit’aàâla̱. Tjín kjo̱xkón ya̱ xa̱jngá nandá ñánda nga otoa. Tjín kjo̱xkón ts’e̱ xi̱ta̱ chijé. Tjín kjo̱xkón i̱t’aà ts’e̱ xi̱ta̱ xinguia̱a judío koa̱ tjín i̱t’aà ts’e̱ xi̱ta̱ xi mìtsà xi̱ta̱ judío. Tjín kjo̱xkón ya̱ i̱jiìn na̱xa̱ndá, koa̱ ya̱ i̱’nde i̱t’aà xìn ñánda tsjìn xi̱ta̱. Tjín kjo̱xkón ya̱ i̱jiìn ndáchikon, koa̱ ya̱ i̱jiìnâla̱ xi̱ta̱ xi tsò nga xi̱ta̱âla̱ Cristo ma ta̱nga mìtsà kixi̱ kjoa̱. 27 Kjìn jchán xá kisinèâna xi ‘ñó tjín, sà k’oa̱á skanda mìkiì ójna̱fè. Kisìkjiaán kjinchrá. Sà k’oa̱á tsjìnâna nandá xi ma ‘yò, sà k’oa̱á skanda mìkiì tsoókje̱en, kisìkjiaán ’nchán nga tsjìnâna nikje xi ójna̱kjá. 28 Mìtsà tà jñà kjoa̱ koi xi komàt’ian. Tjín ìsa̱ xi kj’ei̱í xi ìsa̱ ‘ñó tjín. Na̱chrjein nchijòn makájnoâna kjoa̱ xi tímat’in kóho̱tjín na̱xa̱ndáâla̱ Cristo xi ‘a̱n sìkinda̱. 29 Tsà yá ’ndseé xi ma indaàjiìn, ti̱koa̱á ‘a̱n, ma indaàjiìnâná. Tsà yá xi mejènâla̱ ótsji jéâla̱ jngoò xi̱ta̱ xi kj’ei̱í, ‘a̱n ma jtike̱âná. 30 Tsà mochjeén nga ti̱ yijoâna̱ ndaà síkíjnaâna, jè ndaà síkíjna yijoâna̱ i̱t’aà ts’e̱ kjoa̱ xi mahindaàjñaà. 31 Jè Nainá xi Na̱’ènâla̱ Jesucristo xi otíxomaâná, jeya kàtìjna ni̱ta̱ kjéâne, tíbeèâne nga ‘én kixi̱í xi tìchjà. 32 K’e̱ nga tsohóti̱jna ján na̱xa̱ndá Damasco, jè xi̱ta̱ xi gobernador tíjna nga jè kitsjaàâla̱ xá jè xi̱ta̱xá ítjòn xi ‘mì Aretas, kitsjaàâla̱ o̱kixi̱ nga kisìkinda̱ xotjoa̱âla̱ na̱xa̱ndá nga mejènâla̱ tsobà’ñóâna. 33 Ta̱nga jñà xi̱ta̱ kisìchját’aàâna nga kisìkíjnayaâna ni̱si̱yá, i̱kjoàn ya̱ tsachrjeâna ñánda ti̱x’á chrjó nda̱jo̱ xi tjíndiìâla̱ na̱xa̱ndá nga kiskinìjenât’aàâna skanda i̱t’aà nangui. K’oa̱á s’ín komàâne nga mìkiì komà kitsobà’ñóâna.