1 Juan 3

1 Ndaà kàtasijiìnânò, ‘ñó ndaà matsjakeèâná Nainá xi Na̱’ènâná ma, k’oa̱á maâne nga i̱xtiâla̱ tsòâná. Ko̱ nguì kixi̱í kjoa̱ nga i̱xtiâla̱ Nainá ‘mìâná. K’oa̱á maâne nga jñà xi̱ta̱ i̱sò’nde, mìkiì mokjeiínâla̱ tsà i̱xtiâla̱ Nainá ‘mìâná, koií kjoa̱âla̱ nga̱ jñà xi̱ta̱ koi, mìkiì mokjeiínâla̱ i̱t’aà ts’e̱ Nainá. 2 Jñò ndí ’ndsè xi matsjake̱ânò, i̱’ndei̱ jyeé ki’ndíâla̱ Nainá ‘mìâná. Ta̱nga kj’eè tsà ndaà okóâná Nainá kó kjoàn ko̱maá nga ko̱ma i̱skan. Ta̱nga jyeé tíjiìnâná nga k’oa̱ ti̱ kjoàn ko̱maá koni kji jè Jesucristo k’e̱ nga ki̱jchò na̱chrjein nga jè xi kjoi̱í ìjngoò k’aâne; nga̱ k’oa̱á s’ín jcha̱xkoaán koni kji jè. 3 Ngats’iì xi̱ta̱ xi k’oa̱s’ín nchikoña nga k’oa̱á s’ín kjoàn ko̱ma koni kji jè Jesucristo, na̱chrjein nchijònâné nga tsjeè nchisíjchá yijoâla̱ koni s’ín nga xi̱ta̱ tsjeè jè Jesucristo. 4 Ngats’iì xi̱ta̱ xi ótsji jé, kondra̱á fìâla̱ kjo̱tíxomaâla̱ Nainá. K’e̱ nga jé binchaàtsjiaá, jè kjo̱tíxomaâla̱ Nainá tìnáchrjenguiaá. 5 Jñò, jyeé tíjiìnânò nga jè Jesucristo koií xá j’iìâne nga jè faáxìnâná jñà jé xi tjínâná. Ko̱ ‘yaânò nga jè Jesucristo, ni̱mé jé tsohótsji. 6 Ngats’iì xi̱ta̱ xi Cristo títsa̱jnako̱, mìtsà jé ótsji; ta̱nga jñà xi̱ta̱ xi ótsji jé, kj’eè kiì beèxkon ko̱ ti̱koa̱ mìkiì tíjiìnâla̱ yáâné xi ‘mì Jesucristo. 7 Jñò, xi ndí i̱xtiâna̱ xanânò, kì kiì biì’nde tsà yá xi skóna̱cha̱nânò. Jè xi̱ta̱ xi kjoa̱ kixi̱ s’ín nga nguixko̱n Nainá, xi̱ta̱ kixi̱âné, koni xi̱ta̱ kixi̱ jè Cristo. 8 Ta̱nga jè xi̱ta̱ xi kjit’aà na̱chrjein tíhótsji jé, ts’e̱ xi̱ta̱ nei̱íâné. Nga̱ jè xi̱ta̱ nei̱í, k’oa̱á s’ín tíhótsji jé skanda ti̱sa̱ tàts’enâla̱ kjoa̱. Ko̱ koií xá j’iìâne Jesucristo xi Ki’ndíâla̱ Nainá nga jè sikixòña jñà kjoa̱ ch’o xi s’ín jè xi̱ta̱ nei̱í. 9 Ngats’iì xi̱ta̱ xi jye Nainá kisìkjatjìyaâla̱ nga ki’ndíâla̱ Nainá ma, mìtsà ti̱ya̱ títsa̱jnajiìnâne jé. Nga̱ jyeé ya̱ tíjnajiìn ini̱ma̱âla̱ jè Ini̱ma̱ Tsjeèâla̱ Nainá. Ko̱ mì ti̱ kiì ma ko̱hótsjiâjéâìsa, nga̱ jyeé ki’ndíâla̱ Naináâné. 10 K’oa̱á s’ín maâne nga yaxkonâla̱ yáâné xi i̱xtiâla̱ Nainá ko̱ yáâné xi i̱xtiâla̱ xi̱ta̱ nei̱í; ngats’iì xi̱ta̱ xi mìkiì síkitasòn kjoa̱ kixi̱âla̱ Nainá, ti̱koa̱ mìkiì tsjakeè beè xi̱ta̱ xíkjín xi ti̱koa̱ i̱t’aà ts’e̱ Cristo mokjeiínâla̱, mìtsà ki’ndíâla̱ Nainá ma. 11 Nga̱ k’oa̱á s’ín tíchja̱ jè ‘én xi jye kina’yà k’e̱ nga ti̱sa̱ kòkjeiínânò nga sa̱ ítjòn nga tsò: Ngásòn ngáya tsjacha s’e̱én xinguia̱á. 12 Mìkiì k’oa̱s’ín s’e̱én koni kis’iìn jè xi̱ta̱ xi ki’mì Caín nga jè xi̱ta̱ nei̱í kiìt’aàâla̱ nga kisìk’en ’ndse̱. ¿Méâne kisìk’enâne ’ndse̱? Tà koií kjoa̱âla̱ nga jè ’ndse̱, xi̱ta̱ kixi̱âné nga nguixko̱n Nainá ko̱ jè Caín ch’oó tjín kjoa̱ xi s’ín. 13 K’oa̱á maâne k’oa̱s’ín tìxanânò jñò ndí ’ndsè, kì maxkónânò tsà si̱ìjtikeèânò xi̱ta̱ i̱sò’nde xi mìkiì mokjeiínâla̱ ‘énâla̱ Nainá. 14 Jñá jyeé tíjiìnâná nga jyeé itjokàjñaá ya̱ ndi̱yá kjoa̱biyaà xi ya̱ tjaáyaá kjòtseé ko̱ jyeé tjínâná kjoa̱binachon xi mìkiì fehet’aà ni̱ta̱ kjéâne. Nga̱ jyeé k’oa̱s’ín ndaà matsjachaá jñà xi̱ta̱ xinguia̱á xi ti̱koa̱ i̱t’aà ts’e̱ Cristo mokjeiínâla̱. Jè xi̱ta̱ xi mìkiì matsjakeè xíkjín, ndi̱yá kjoa̱biyaá tsóhoya jè ini̱ma̱âla̱. 15 Ngats’iì xi̱ta̱ xi majtikeè xi̱ta̱ xíkjín, k’oa̱á s’ín ngayaâla̱ koni tsà xi̱ta̱ sík’en. Jñò, ndaá tíjiìnânò, jè xi̱ta̱ xi xi̱ta̱ sík’en, mìtsà kjoa̱binachon xi mìkiì fehet’aà tísíjchájiìn yijoâla̱. 16 Jñá, k’oa̱á s’ín ‘yaâná mé xi ‘mì kjo̱tsjacha k’e̱ nga jè Jesucristo kitsjaà kjo̱tjò yijoâla̱ nga k’en ngajoâná. Jñá k’oa̱á ti̱s’ín mochjeén nga s’e̱én i̱t’aà ts’e̱ xi̱ta̱ xinguia̱á koni kis’iìn jè Cristo. 17 Tsà tjín jngoò xi̱ta̱ xi tjínâla̱ tsojmì xi tímochjeén kjit’aàâla̱, tsà skoe̱ jngoò xi̱ta̱ xíkjín xi ti̱koa̱ i̱t’aà ts’e̱ Cristo mokjeiínâla̱ nga tsjìnâla̱ tsojmì xi mochjeénâla̱, tsà mìkiì maâla̱ nga ko̱si̱ko̱ jè xi̱ta̱ xíkjín xi i̱t’aà ts’e̱ tsojmì xi tsjìnâla̱, mìtsà kixi̱ kjoa̱ nga kjo̱tsjachaâla̱ Nainá tíjnajiìn ini̱ma̱âla̱. 18 Jñò xi ndí i̱xtiâna̱ xanânò, ti̱tsjacha xinguio̱o, kì tà ‘én nokjoà; nguì ndaá kàta’yaâla̱ kós’ín matsjacha xinguio̱o nga ti̱si̱ko̱ò mé tsojmì xi mochjeénâla̱ méâne nga kàta’yaâla̱ nga kixi̱í kjoa̱ nga ndaà matsjacha xinguio̱o. 19 K’e̱ nga k’oa̱s’ín titsa̱’né, k’e̱é jcha̱âná nga kixi̱í kjoa̱ nga k’oa̱á s’ín titsa̱nìjchá yijoâná koni s’ín tjín kjoa̱ kixi̱âla̱ Nainá ko̱ ’nchán nìkíjnaá ini̱ma̱âná nga nguixko̱n Nainá. 20 Na̱s’ín jè ini̱ma̱âná jé tíbínèâná, ta̱nga jè Nainá, ìsa̱á ndaà tíjiìnâla̱ mì k’oa̱âne koni jè ini̱ma̱âná. Nga̱ jè Nainá ìsa̱á ndaà tsejèn yijeâla̱ ngats’iì kjoa̱ xi titsa̱’né. 21 Jñò ndí ’ndsè xi matsjake̱ânò, tsà jè ini̱ma̱âná mìtsà ti̱ mé kjoa̱ ch’o tíbínèâná, ‘ñó tjín takoán nga nguixko̱n Nainá. 22 Tsà mé xi si̱jéâlá Nainá, maáâla̱ tsjá yijeâná ni̱ta̱ mé kjo̱ndaàâne; nga̱ nìkitasoán kjo̱tíxomaâla̱, ko̱ k’oa̱á s’ín ’né koni s’ín sasénâla̱ Nainá. 23 Jè kjo̱tíxomaâla̱ Nainá, jéâné nga ndaà kàtakjeiínâná i̱t’aà ts’e̱ Jesucristo xi Ki’ndíâla̱ ma, ti̱koa̱ ngásòn ngáya ko̱tsjachaá xinguia̱á koni s’ín jye tsatíxomaâná Cristo. 24 Jè xi̱ta̱ xi síkitasòn kjo̱tíxomaâla̱ Nainá, ya̱á tíjnako̱ Nainá, ko̱ jè Nainá ya̱á tíjnajiìn ini̱ma̱âla̱ xi̱ta̱ jè. K’oa̱á maâne nga ‘yaá nga Nainá ya̱ tíjnako̱âná, koi kjoa̱âla̱ nga̱ jye kitsjaàâná jè Ini̱ma̱ Tsjeèâla̱.