1 Juan 4

1 Jñò ndí ’ndsè xi ‘ñó matsjake̱ânò, kì ta̱xki̱ mokjeiínânò i̱t’aà ts’e̱ ngats’iì xi̱ta̱ xi tsò nga jè Ini̱ma̱ Tsjeèâla̱ Nainá síkíchi̱yaâla̱ ‘én xi chja̱ya. Ãtjòn chít’aà, a kixi̱í kjoa̱ nga jè Ini̱ma̱ Tsjeèâla̱ Nainá tísíchi̱yaâla̱ ‘én xi chja̱, a xi majìnâné. Nga̱ jñà na̱chrjein xi titsa̱jnaá i̱’ndei̱, tjín jchán xi̱ta̱ ndiso xi tjímasòn ya̱ i̱sò’nde xi tsò nga jè Nainá tsjáâla̱ ‘én xi nchibéno̱jmíya. 2 Jè xi̱ta̱ xi béno̱jmí nga jè Jesucristo, i̱í kits’iìn i̱t’aà nangui, ko̱ xi̱ta̱á komà koni jñá, jè xi̱ta̱ xi k’oa̱s’ín béno̱jmí, jèâné xi tjínâla̱ Ini̱ma̱ Tsjeèâla̱ Nainá. K’oa̱á s’ín ‘yaânò yá xi̱ta̱âne xi jè Ini̱ma̱ Tsjeèâla̱ Nainá tísíchi̱yaâla̱ ‘én xi tíchja̱ya. 3 Ta̱nga jè xi̱ta̱ xi mìkiì k’oa̱s’ín ke̱èno̱jmí nga jè Jesucristo i̱í kits’iìn i̱t’aà nangui, ko̱ xi̱ta̱á komà koni jñá, jè xi̱ta̱ xi k’oa̱s’ín tsò, tsjìnâla̱ Ini̱ma̱ Tsjeèâla̱ Nainá. Xi̱ta̱ jè, jè tísíkjeén kjo̱hítsjeènâla̱ xi̱ta̱ xi tíjna ítjòn nga kondra̱ fìâla̱ Cristo. Jñò, jyeé kina’yà nga kjoi̱íâné jè xi kondra̱ fìâla̱ Cristo, ko̱ na̱chrjein xi titsa̱jnaá i̱’ndei̱ jyeé k’oa̱s’ín tísíxá kjo̱hítsjeènâla̱. 4 Jñò xi ndí i̱xtiâna̱ xanânò, jyeé xi̱ta̱âla̱ Nainá ‘mìânò; jñò, jyeé kinìkijneâlà jñà xi̱ta̱ xi k’oa̱s’ín ‘én ndiso chja̱ya; mì ti̱ kiì ko̱maâne nga jñà skóna̱cha̱nânò, nga̱ jè Ini̱ma̱ Tsjeèâla̱ Nainá xi tíjnajiìn ini̱ma̱ânò, ìsa̱á ts’e̱ nga’ñó tjínâla̱ mì k’oa̱àâne koni jè kjo̱hítsjeèn ts’e̱ xi̱ta̱ nei̱í xi síxájiìn ini̱ma̱âla̱ xi̱ta̱ xi mìkiì mokjeiínâla̱ i̱t’aà ts’e̱ Cristo. 5 Jñà xi̱ta̱ koi, tà jñá títsa̱jnakonâne kjo̱hítsjeèn xi tjín ya̱ i̱sò’nde; k’oa̱á maâne nga k’oa̱s’ín chja̱ ko̱ jñà ’nchréâla̱ xi̱ta̱ xi ti̱koa̱ kjo̱hítsjeèn ts’e̱ i̱sò’nde síkjeén. 6 Ta̱nga ngaje̱n, xi̱ta̱âla̱ Naináânáje̱n. K’oa̱á maâne nga jñà ’nchréânaje̱n jñà xi̱ta̱ xi mokjeiínâla̱ ‘énâla̱ Nainá. Ta̱nga jñà xi mìtsà xi̱ta̱âla̱ Nainá ma, mìtsà ngaje̱n sís’inânaje̱n. K’oa̱á maâne nga ‘yaâla̱ yáâné xi nguì jè Ini̱ma̱ Tsjeèâla̱ Nainá tísíkíchi̱yaâla̱ nga nguì kjoa̱ kixi̱ ko̱ yáâné xi ini̱ma̱ ndisoâla̱ nei̱í tíkona̱cha̱nâla̱. 7 Jñò ndí ’ndsè xi ‘ñó matsjake̱ânò, mochjeénâné nga ngásòn ngáya tsjacha jcha̱á xinguia̱á, nga̱ jè xi kjo̱tsjacha, i̱t’aà ts’e̱ Nainá nchrobáâne. Ngats’iì xi̱ta̱ xi tjínâla̱ kjo̱tsjacha, ki’ndíâla̱ Naináâné ko̱ ti̱koa̱á beèâné yáâné xi Nainá. 8 Jè xi̱ta̱ xi mìkiì matsjakeè xi̱ta̱ xíkjín, kj’eè kì beè yáâné xi Nainá, nga̱ jè Nainá kjo̱tsjachaâné. 9 K’oa̱á s’ín tsakóâná Nainá kjo̱tsjacha xi tjínâla̱ xi i̱t’aà tsa̱ján nga kisìkasén ki’ndíâla̱ i̱ i̱sò’nde, jè ki’ndíâla̱ xi ta jè ta jngoò maâne, méâne nga i̱t’aà ts’e̱ ndaà ki̱tsa̱jnakoaán. 10 K’oa̱á s’ín tjín kjo̱tsjacha xi tsakó Nainá xi i̱t’aà tsa̱ján: Mìtsà koiâne nga jñá ndaà matsjachaá Nainá. Jè Nainá xi ‘ñó ndaà matsjakeèâná. K’oa̱á maâne nga kisìkasén ki’ndíâla̱ nga k’en ngajoâná, méâne si̱ìjchàat’aàâná jéâná. 11 Jñò ndí ’ndsè xi matsjake̱ânó, tsà jè Nainá k’oa̱s’ín ‘ñó ndaà matsjakeèâná, mochjeénâné nga k’oa̱ ti̱s’ín ko̱tsjachaá xinguia̱á nga ìjngoò jngoá. 12 Ni̱ sa̱á jngoò xi̱ta̱ xi xko̱n beèâne Nainá, ta̱nga tsà ndaà ko̱tsjachaá xinguia̱á nga ìjngoò jngoá, jè Nainá ya̱á tíjnajiìn kjit’aà ini̱ma̱âná ko̱ i̱t’aà tsa̱jánâná nga ndaà tíbitasòn yije kjo̱tsjachaâla̱ Nainá. 13 Nainá jyeé kitsjaàâná Ini̱ma̱ Tsjeèâla̱. K’oa̱á maâne nga jye ‘yaá nga kjit’aà na̱chrjein ya̱ titsa̱jnakoa̱á Nainá ko̱ ti̱koa̱á ya̱ tíjnako̱âná Nainá nga tíjnajiìn ini̱ma̱âná. 14 Ngaje̱n sobá ki’yaâje̱n ko̱ ‘bíânáje̱n ‘énâna̱je̱n nga jè Nainá xi Na̱’èn ‘mìâlaà kisìkasén Ki’ndíâla̱ nga jè ko̱chrjekàjiìn kjo̱’in xi kjoa̱ ts’e̱ jéâla̱ ngats’iì xi̱ta̱ i̱sò’nde. 15 Ngats’iì xi̱ta̱ xi nguì ko̱ ini̱ma̱âla̱ tsjá ‘énâla̱ nga jè Jesús xi Ki’ndíâla̱ Nainá, kjit’aà na̱chrjein ya̱ tíjnako̱ Nainá ko̱ jè Nainá ya̱á tíjnajiìn ini̱ma̱âla̱. 16 Jyeé k’oa̱s’ín ndaà ‘yaá, ko̱ ti̱koa̱ mokjeiínâná, nga jè Nainá tjínâla̱ kjo̱tsjacha xi i̱t’aà tsa̱ján. Nga̱ jè Nainá kjo̱tsjachaâné. Ko̱ jè xi̱ta̱ xi kjo̱tsjacha tíjnajiìn kjit’aà ya̱ ini̱ma̱âla̱, ya̱á tíjnako̱ Nainá ko̱ jè Nainá ya̱á tíjnajiìn ini̱ma̱âla̱ xi̱ta̱ jè. 17 K’e̱ nga i̱t’aà tsa̱ján k’oa̱s’ín ndaà tíbitasòn yije kjo̱tsjachaâla̱ Nainá, ‘ñó tjín takoán nga mìtsà ti̱ mé tsakjoònâná jè na̱chrjein k’e̱ nga si̱ndaàjiìnâla̱ xi̱ta̱ xi kjoa̱ ts’e̱ jéâla̱. Nga̱ jñá, k’oa̱á s’ín ndaà titsa̱’né i̱ i̱sò’nde koni s’ín kis’iìn jè Jesucristo. 18 Ya̱ ñánda nga tjín xi kjo̱tsjacha, mìtsà ti̱ mé kjo̱skon tjínâne. Nga̱ jè xi nguì kjo̱tsjacha, faáxìnâné ngats’iì xi kjo̱skon ‘mì. Jè xi̱ta̱ xi tsakjón, kjo̱’inâné xi tsakjónâla̱. Ko̱ jè xi̱ta̱ xi tákó kjo̱skon tíjiìn ini̱ma̱âla̱, koiíâné nga kj’eè tsà ndaà tíjiìn ini̱ma̱âla̱ jè kjo̱tsjachaâla̱ Nainá. 19 Koií k’oa̱s’ín matsjachaâná Nainá, koií kjoa̱âla̱ nga̱ jè kjòtsjakeè ítjònâná. 20 Tsà tjín xi̱ta̱ xi tsò: “‘A̱n, matsjake̱âná Nainá.” Ta̱nga tsà majtikeè xi̱ta̱ xíkjín xi ti̱koa̱ i̱t’aà ts’e̱ Cristo mokjeiínâla̱, jè xi̱ta̱ jè, xi̱ta̱ ndisoâné. Tsà mì kì matsjakeè xi̱ta̱ xíkjín xi xko̱n tíbeèâne, ¿kós’ín maâne ko̱tsjakeè Nainá xi kj’eè tsà xko̱n beèâne? 21 Jè kjo̱tíxoma xi kitsjaàâná Jesucristo, k’oa̱á tsò: Jè xi matsjakeè Nainá, mochjeénâné nga ti̱koa̱ kàtamatsjakeè xi̱ta̱ xíkjín xi ti̱koa̱ i̱t’aà ts’e̱ Cristo mokjeiínâla̱.