1 Corintios 13

1 ‘A̱n, tsà maâna chjà jñà ‘én xi kj’ei̱í tsò xi chja̱ xi̱ta̱ na̱s’ín jñà ‘én xi chja̱ àkja̱le̱, ta̱nga tsà tsjìnâna kjoa̱tjòcha, nìmé chjíâla̱; k’oa̱á ngayaâna koni jngoò ki̱cha̱ xi ‘ñó one, o koni jñà ki̱cha̱ tsji̱n xi ch’o one k’e̱ nga kaàkjoò. 2 Tsà tsjìnâna kjoa̱tjòcha, ni̱mé chjíâna na̱s’ín maâna chjà ngajoâla̱ Nainá, na̱s’ín machi̱ya yijeâna kjoa̱ xi tjí’maâla̱ Nainá; na̱s’ín ma yijeâna kjoa̱ chji̱ne̱, na̱s’ín ndaà mokjeiín yijeâna i̱t’aà ts’e̱ Nainá, skanda maâna síkjaníyáâla̱ nindoò. 3 Tsà sika’biá yije tsojmì xi tjínâna nga ko̱kje̱n xi̱ta̱ i̱ma̱, koa̱ tsjaà kjo̱tjoà yijoâna̱ nga ki̱ti̱ xi kjo̱ndaà ts’e̱ xi̱ta̱ xi kj’ei̱í, ta̱nga tsà tsjìnâna kjoa̱tjòcha, ni̱mé sìkijne. 4 Jè xi̱ta̱ xi tjínâla̱ kjoa̱tjòcha, tjínâla̱ kjoa̱tsetakòn ni̱ta̱ mé kjoa̱âne; tjínâla̱ kjo̱ndaà; mìkiì maxìtakòn; mìtsà ‘én ’nga chja̱; ko̱ mìtsà ti̱jè ndaà síkíjnaâne yijoâla̱; 5 mìtsà ta̱xki̱ s’ín; mìtsà tà kjo̱ndaà ts’e̱ ótsji; mìkiì ta̱xki̱ majtiâla̱; ni̱mé kjoa̱ bíngui takòn; 6 mìtsà matsjaâla̱ i̱t’aà ts’e̱ kjoa̱ xi ch’o tjín, ts’e̱é kjoa̱ kixi̱ xi matsjaâla̱. 7 Jè xi tjínâla̱ kjoa̱tjòcha, síkjeiín yijeâla̱ ni̱ta̱ mé kjoa̱âne, mokjeiín yijeâla̱, koña yijeâla̱, chíkjoa̱ko̱ yijeâla̱ ngats’iì kjoa̱. 8 Jè kjoa̱tjòcha mìkiì kjoe̱het’aà. Ta̱nga ki̱jchò na̱chrjein nga mì ti̱ yá xi ki̱chja̱ ngajoâla̱ Nainá, nga mì ti̱ yá xi ki̱chja̱âne ‘én xi kj’ei̱í tsò xi mì yá xi̱ta̱ fìyaâla̱ ko̱ nga mì ti̱ yá xi tjoéâla̱ kjo̱hítsjeèn xi tjí’maâla̱ Nainá. 9 Nga kj’eè tsà nguì ndaà tíjiìn yijeâná kjo̱hítsjeèn xi tjí’maâla̱ Nainá, ko̱ kj’eè tsà nguì ndaà nokjoà ngajoâlá Nainá. 10 Ta̱nga k’e̱ nga ki̱jchò na̱chrjein nga kjoi̱í xi ni̱mé chijat’aàâla̱, ya̱á kjoe̱het’aà jñà kjoa̱ xi ta chiba machi̱yaâná. 11 K’e̱ nga sa̱ chítia, k’oa̱á s’ín kichjà koni chja̱ i̱xti, k’oa̱s’ín kisìkítsjeèn koni s’ín síkítsjeèn i̱xti, k’oa̱s’ín kiskoòsònâla̱ koni i̱xti. Ta̱nga k’e̱ nga jye kòjchínga, kisìkíjnaâná kjoa̱ ts’e̱ i̱xti. 12 I̱’ndei̱, ta k’oa̱á s’ín ‘yaá Nainá koni tsà chi̱tsín jmà chítsejènâyaá nga mìkiì ndaà tsejènâná. Ta̱nga ki̱jchò na̱chrjein k’e̱ nga ndaà ko̱tsejènâná nga chí’aán Nainá. I̱’ndei̱ ta̱ chibaá machi̱yaâna, ta̱nga ki̱jchò na̱chrjein nga ndaà ko̱chi̱yaâna koni s’ín beèxkonâna Nainá. 13 Ján kjoa̱ tjín xi mìkiì kjoe̱het’aà, jngoò kjoa̱ nga mokjeiínâná i̱t’aà ts’e̱ Nainá, ìjngoò nga chiñàâlá xi tjoéâná, ìjngoò nga s’e̱âná kjoa̱tjòcha. Jñà ingajàn kjoa̱ koi, jè kjoa̱tjòcha xi ìsa̱ ‘ñó chjíâla̱.