Zabbuli 122

¹ Nasanyuka bwe baŋŋamba nti, “Tugende mu nnyumba ya Mukama!”

² Ebigere byaffe biyimiridde mu miryango gyo, Ayi Yerusaalemi.

³ Yerusaalemi yazimbibwa okuba ekibuga ekinywevu ekiyimiridde awamu.

⁴ Eyo ebika byonna gye biraga, ebika bya Mukama, okutendereza erinnya lya Mukama ng’ebiragiro ebyaweebwa Isirayiri bwe biri.

⁵ Eyo entebe ez’okusalirako emisango gye zaateekebwa; z’entebe ez’obwakabaka ez’ennyumba ya Dawudi.

⁶ Musabirenga Yerusaalemi emirembe: “Abo abakwagala bafune ebirungi.

⁷ Emirembe gibeerenga munda w’ebisenge byo; n’amayumba go amanene gabeerenga n’omukisa era nga manywevu.”

⁸ Olwa baganda bange ne mikwano gyange nnaayogeranga nti, “Emirembe gibeerenga mu ggwe.”

⁹ Olw’obulungi bw’ennyumba ya Mukama Katonda waffe, nnaanoonyanga okukulaakulana kwa Yerusaalemi.