Zabbuli 113

¹ Mutendereze Mukama! Mumutendereze, mmwe abaweereza be, mutendereze erinnya lya Mukama.

² Erinnya lya Mukama litenderezebwe okuva leero n’okutuusa emirembe gyonna.

³ Enjuba weeviirayo okutuusa bw’egwa, erinnya lya Mukama litenderezebwenga.

⁴ Mukama agulumizibwa okusinga amawanga gonna, era n’ekitiibwa kye kisinga eggulu.

⁵ Ani afaanana nga Mukama Katonda waffe, atuula ku ntebe ye ey’obwakabaka eri waggulu ennyo,

⁶ ne yeetoowaza okutunuulira eggulu n’ensi?

⁷ Abaavu abayimusa n’abaggya mu nfuufu; n’abali mu kwetaaga n’abasitula ng’abaggya mu vvu,

⁸ n’abatuuza wamu n’abalangira, awamu n’abalangira abo abafuga abantu be.

⁹ Omukazi omugumba amuwa abaana, n’abeera mu maka ge n’ezzadde lye ng’ajjudde essanyu. Mutendereze Mukama!