Yaru Divariri 99
TBL1 Bajari, numo kini evovodae irira, susu aindae evetu genembo isasambu oju aimi ungo ata dadadagheraera. Nunda anumba vasada serubim soroda anumburureari enda daradaragheraira. 2 Bajari Saion aminda anumbetiri nunda duro aminda ghedo refira. Evetu genembo isasambu da Bajari fakinago nusuka numori. 3 Evetu genembo isambu nunda javo tomanakogo akotugo duroghae ava javono gatise, sakai sarera. Kakarago beká amo, numori. 4 Arie, Kini fakina kato, ari dambugo irari embo ava dubo buraesa. Nine Israel eminda ari eveva ava bu fusesi. Nine Israel kaifa use inono beká edo ari bekáda bekáda eraesa. 5 Namondeda Bajari God kena sakai saore, kakarago beká mo numori. Nunda anumba vasa da dombuda tere tumonde bainghevu! Kakarago bekaÌ mo numori! 6 Nunda fristi mane mo, Moses nengae Aaron ghae useri, a kotugo Samuel barago numokena banungedo ghusira. Bajari kena nene seoro, nu ningido ghusira. 7 Nu foroga darido irurari ainda jokádaghe nemokena geka seari, ne nunda Agho Dari kotugo rea aoro dae sisira, ava edo ghuseri. 8 Arie Bajari namaneda God, ni ninda natofo Israel emboda benunu ningido ghusesi. Geka bekári, ni nenda kosasa da mino nu futusesi, avata nenda ari ekoko kote dodo ghusesi. 9 Namondeda Bajari God kena sakai saore! Namondeda Bajari God kakarago bekári. Ãgido nunda doriri kakara aminda numoá tumonde bainghevu!