Yaru Divariri 100

1 Namonde isambu endada irera, dubo evevaghae beka fainghedo, Bajari kena yaru divore! 2 Nunda geka ningido, ivugaghae yaru didivuse, nunda dombuda tere fetore! 3 Aminguse, namonde kasama arera: God nu Bajariri! Namonde jo namondeda kotariimi siroraeri. Namonde, God nune setiri siroruseri. Namonde nunda natofori, nu namonde kaifa eraira. 4 Nunda kambo guro teria afigetiri irira aminda, “aiyakoe” sise, ya terore! Ya nundae sakai sise, jokáda terore! Nundae “aiyakoe” sise, nunda javo kakara aore! 5 Ainda beká mo: Bajari sifo ghousa evia veka eveva use irira. Nu kavevera ari kato a joka ari katori. Nu namonde joka use, dubo budo ghusira, dubo buraira, a dubo ruruse irarira. Nunda kaifa ari mo, namondeda imemesiri siroruse itatamudo yarera.