Nɨawari 127

1 Xɨka Yawé kii ka’utawewieni, yakɨ xeikɨa ‘iwewiwamete mekateniyu’uxitɨaka. Xɨka Yawé xeime kiekari ka’ɨwiyani, tɨkarikɨ tehɨwemete yakɨ xeikɨa mekaniyɨaka. 2 Yakɨ xeikɨa ximeri paitɨ xekananuku’uweni, meta yakɨ xeikɨa ‘arike xekaniukahipiteni, meta yakɨ xeikɨa kwinimieme xekateni’uximayaka ‘ikwai xemɨte’ukaxexeiyanikɨ. Karikɨ Kakaɨyari kutsi kaniwapitɨaka pɨta kemɨ’ane mɨwanaki’erie. 3 Tɨɨri ‘imikieri mekanihɨkɨtɨni Yawé hetsɨa miemete, tɨɨri tahetsie memɨyekɨka ta’iwarika witsimɨ’ane mekanihɨkɨtɨni. 4 Kepauka temaikɨ tɨɨri mɨwarayexeiya yumemiwame ‘ɨrɨ kemɨra’ɨ hepaɨ kani’aneni. 5 ‘Aixɨa xepɨ’itɨarie kemɨ’ane ‘ɨrɨ ‘uitɨwameta xemihɨniya mɨkɨ ‘ɨrɨ ‘aixɨa mɨ’anenekɨ. Mɨkɨkɨ hatsuaku mepɨkatewiyatsitɨarieni memɨwaraye’unie wahɨxie kepauka memɨtaxanetsieni yemekɨ ‘itsɨkate wahɨxie.