Zabura 122

¹ Na yi farin ciki tare da waɗanda suka ce da ni, “Bari mu tafi gidan Ubangiji.”

² Ƙafafunmu suna tsaye a ƙofofinki, ya Urushalima.

³ An gina Urushalima kamar birnin da aka yi a harhaɗe wuri guda.

⁴ A can ne kabilu suke haurawa, kabilan Ubangiji, don su yabi sunan Ubangiji bisa ga farillan da aka ba wa Isra’ila.

⁵ A can kursiyoyin shari’a yake tsaye, kursiyoyin gidan Dawuda.

⁶ Ku yi addu’a don salamar Urushalima, “Bari waɗanda suke ƙaunarki su zauna lafiya.

⁷ Bari salama ta kasance a katangarki zaman lafiya kuma a fadodinki.”

⁸ Saboda ’yan’uwana da kuma abokaina, zan ce, “Salama tă kasance tare da ke.”

⁹ Saboda gidan Ubangiji Allahnmu, zan nemi wadatarki.