Maleko 7

1 Falesiya yo laugagayo tau lau faêataenna hahaisa Yelusalem yai sa laoma be sa faêoigogo Yesu lisina yai. 2 Yesu tau famuli watanina haisa sa kalakalahe ma nima bidabidadi. Falesiya sa ita faheyayadi paêana edi laulau hige ti falau watan. 3 Falesiya yo Diusi mahudoêidi ibege ti kalahe gaibu, yena afa wahawahadi edi laulau sa laulauwedi be nimadi sa kaisudi, mate haba sa kalahe. 4 Yena ai maketi sa fuyoma edi abiêabi sa falau watan be nimadi sa kaisudi, haba sa kalahe. Yo kaputi, gulewa, gaeba yo aba kalakalahe ginaulidi bena sa kaisudi. 5 Yo fede Falesiya yo laugagayo tau lau faêataenidi Yesu sa fatiêoi tiyen, Sidohana be tau famuli watanim hige wahawahada edi laulau ti lau watanidi na ma nima bidabidadi sa kalahe? 6 Yesu alinadi ya bui iyen, Umi dodoga bwalabwalamiu! Isaiya ya liba dudulai fuyana ya libaemiu, ena uliêuli yai iyebom, “Yaubada, iyen, ‘Nuwa maitimiu yai Guyau ami fadebasae. 7 Yo ita eda laugagayo moho dodoga ami fatalahadi!” (Isaiya 29:13) 8 Yaubada ena laugagayo ami tole hudoêiyedi na dodoga edi lau faêata ami lau watanidi. 9 Yesu ya falibadi iyen, Yaubada ena laugagayo ami êwaiyoêoêen, na emi lau faêata bena ami lau watanidi. Hige i loholoho! 10 Yo fede Mose ya falaugagayodi iyen, “Tamam yo tinam u faêatitiyedi. Yena sai tinana e tamana ya liba faheyayadi dogana bena sa wunui." 11 In moho emi lau faêata yai auwen, “Yena sai hige i fanuha bena tinana e tamana i saguhidi haba ena aba anfale ya libaen iyen, ‘Ite Koban (aniyona mate Yaubada ena ainauya), be tamana yo tinana ibege i saguhidi." 13 Laulaudi te debadi yai Yaubada ena liba ami kaiwegowegogoêen paêana abiêabi ouêouli ami ginaulidi doha itete, be emi lau faêata ami fapaisowadi dodoga lisidi yai. 14 Yesu, baiwa ya yoga fafuyodima lisina be iyen, Mahudoêimiu, au ataêatahi haba ami sibai, 15 kalahe ami an, ibege i fabidahemiu. Na liba heyaheyayadi moêamiu yai ami libalibaedi mate iti logedidi haba sa fabidahemiu. 16 Au ataêatahi komakoman! 17 Baiwa ya lau afulen, na ya lau luma ganahewana habahim tau famuli watanina heyaheyasonna te aniyona sa fatiêoi. 18 Yesu alinadi ya bui iyen, Umi hola ma nuwa supusupumiu! Sidohana be hige au nuwatuhu lobahi? Hige somo ganamuli yai i luhulau doga ganahewana haba i fabida, 19 paêana ya lau boga yai moho be ya kalamahano fuyo. Hige i luhulau nuwanuwana. (Liba te debana yai Yesu iyen, “Kalahe mahudoêidi ibege ti fabidaheda.”) (Paisowa 10:15) 20 Na hinaga ya liba iyen, Somo doga ganahewana yai ya hala liwaêen mate logena ya fabida. 21 Paêana doga nuwana ganahewana yai, be nuwatuhu heyaheyayadi sa kalamahano doha: nuwatuhu heyaheyayadi, luma gwaêu hudoêi - hudoêi, angafu, aiyunu, doga hesa lahuna maêena sa luma gwaêu, (Lewitikusi 20) 22 anduma, laulau heyaheyaya, laulau bwalabwala, luma gwaêu nuwanuwatuhudi, nuwa elaêela, lau mwanunu, nuwa saesae, yo nuwatuhu yauyauleâ, 23 Ginauli heyaheyayadi mahudoêidi te, mate ganahewadi yai sa laoma be sa fabidaheda. 24 Galili nuêuna Yesu ya lau afulen na ya leu Taya nuêuna. Ya mahano lau mate ya lau luma hesa ganahewana paêana hige i fanuha bena sai i sibai mate in amainiya. In moho hige gonowana i miya alasimo. 25 Yaluwa heyaheyayana mate waihin hesa, natuna waihin ganahewana yai. Waihin wasa ya atahiyen mate Yesu ya laoma, yo fede ya lau be ya hoba lidi ahena yai. 26 In mate Giliki Waihinina Fonika Nuêuna yai ya tubu, Siliya ganahewana yai. Yesu ya anêetai bena yaluwa heyaheyayana natuna ganahewana yai ya liba dui. 27 Yo fede Yesu iyen, Hola wawaya ti kalahe bwaêi! Hige i loholoho bena wawaya adi kalahe ta peidi be êwayowa ti anidi. (Paisowa 10:28-29 yo 15:8-9) 28 Waihin Yesu alinana ya bui, iyen, Baêisa, wawaya adi mapula tebolo ubuna yai haba êwayowa sa anidi! 29 Yo fede Yesu ya libalau waihin lisina iyen, Em bui ni debana yai u fuyo em luma, haba wa fawananaha mate yaluwa heyaheyayana natum ganahewana yai haêa ya kalamahano. 30 Ya mahano fuyo mate natuna ena aba laulau eno yai Yaluwa heyayana haêa ya lau afulen. 31 Taya Nuêuna Yesu ya lau afulen na ya lau Sidon be Dekapolisi edaêedana ya lau watan ya lau Galili Gabogabona. 32 Amainiya taumoho hudoêi beya tuituina yo libaliba gesana dodoga sa leyama lisina. Yesu sa anêetai bena nimana ya tole lawen ai hewana. 33 Yo fede dodoga pwaludi yai, ya foya hudoêiyen be nimana gigidi ya tole lawedi beya sogona yai. Habahim ya kaniso na ya abilau lelona yai. 34 Na Yesu ya itaêita hasa galewa yo fede ya nahasi iyen, Haaâ, Efata! (Diusi alinadi yai, aniyona mate “Beyam ti taêafasi!”) 35 Yo fede taumoho wa beyana sa taêafasi yo liba ya libaedi mate sa dudulai. 36 Muliyai Yesu dodoga ya falibadi iyen, Tabu au fatala libalibaen. In moho sa fatala libalibaen. 37 Salumadi sa atahiyen sa noêo wananaha tiyen, Somo mahudoêina ya ginauli sa loholoho! In gonowana tau beya tuitui ya faloholohodi be beyadi sa taêafasi yo tau libaliba gesa sa libaliba!