Maleko 8

1 Lahaidi yai ni baiwa hesa ya faêoigogoma, mate hige adi kalahe. Yo fede Yesu ana hewahewali ya yogaidima na iyen, 2 Dodoga te, E fanuwatohatohaedi, na adi kalahe sa ofi, paêana lahai faihona ma afa haidagu. 3 Yena E duidi sa lau edi luma ma guliyamdi haba matadi sa kwadekwade ai edaêeda paêana haisa adi eda sa lofa. 4 Tau famuli watanina sa fatiêo tiyen, Ai malatupwam te haba ai somo kalahe te lobahi be te fakalahedi? 5 Yesu ya fatiêoidi iyen, Fwalawa fisa lebemiu yai? Alinana sa bui tiyen, Faligigi luwaga moho. 6 Dodoga ya falibadi be sa taêai tanohi yai. Habahim fwalawa faligigi luwaga ya abidi na Yaubada ya lautoêiyen. Ya ifidi na tau famuli watanina ya feledi be sa soiyedi baiwa lisidi yai. 7 Hama fisa Yesu ya abidi na Yaubada ya lautoêiyen be tau famuli watanina ya feledi sa soiyedi hinaga. 8 Mahudoêidi sa kalahe be bogadi sa yahayaha. Ouêoulidi doha 4,000. Adi antole sa tanogogondi be noho faligigi luwaga sa famohafudi. Habahim Yesu ya duidi be sa lau. 10 Na maêana hewahewali waga yai sa lau Dalamanuta nuêuna. 11 Falesiya edi fanuha bena Yesu sa fasai buluhi yo fede sa laoma be sa fatiêoi bena galewa fafaêilalana ya faêitadi. 12 Yo fede Yesu ya nahasi na iyebom, Sidohana be hiti te ami fanuha bena fafaêilala E ginauli be ami ita? E faliba dudulaimiu mate ibege laêi ya ginauli. 13 Yo fede ya lau afuledi na ya awa waga yai be sa lau gabogabo tefana. 14 Tau famuli watanina nuwadi sa fui be hige fwalawa adi ti abi faêouli. Esega dumaduma mate waga yai. 15 Yesu ya falibadi iyen, Au ita komakoman! Falesiya yo Heloda adi yisti ibe au abi. 16 Liba wa ibodi sa fafadosi tiyen, Nuwana fwalawa hige laêi ta abi, logena ya liba doha. 17 Edi nuwanuwatuhu, mate Yesu haêa ya sibai yo fede ya fatiêoidi iyen, Paêana somo ami liba auwen, “Hige ama fwalawa?” Hige somo au nuwatuhu lobahi, Nuwanuwamiu sa poêi?! 18 Matamiu yo beyamiu na hige hola somo au ita yo au atahi lobahi. Nuwamiu sa fui 19 Fuyana fwalawa faligigi E ifidi dodoga 5,000 adi, anêan otafahidi ami tanogogo mate noho fisa ami famohafudi? Alinana sa bui tiyen, Noho safuhudohudoêi luwaga. 20 Na Yesu ya fatiêo boda iyen, Fuyana fwalawa faligigi luwaga E ifidi dodoga 4,000 adi, mate antoledi ami tano gogoidi be noho fisa ami famohafudi? Alinana sa bui tiyen, Noho faligigi luwaga. 21 Yo fede Yesu ya fatiêoidi iyen, Na sidohana be hige au nuwatuhu lobahi? 22 Betesaida nuêuna yai sa laoma yo fede dodoga haisa amainiya taumoho mata toutouna sa leyama Yesu lisina be sa anêetai bena ya abiêina. 23 Yesu taumoho wa ya abi nimai be ya foya hudoêiyen tefa hesa yai. Matana ya kanisoidi, na muli yai ya abilau tauna yai na iyen, Somo laêi wa ita, e higeêe? 24 Taumoho wa ya itaêita hasa na iyen, Iiâ, dodoga E itadi doha oyagi sa laulau tiga. 25 Yesu nimana ya tole fuyoi taumoho matana yai. Habahim matana sa nega be ginauli ya ita lobahidi. 26 Ya faliba iyen, Tabu u fuyo duhu laêi yai. Habahim ya dui. 27 Habahim Yesu yo tau famuli watanina sa lau luma haisa Sesaliya Filipo sadaina yai na edaêeda yai ya fatiêoidi iyen, Dodoga haba tiyen, “Yau sai?" 28 Yo fede tau famuli watanina tiyen, Dodoga haisa tiyen, “Um Diyon Babasito.” Haisa tiyen, “Um Ilaidiya,” na haisa tiyen, “Um mate peloweta hesa." 29 Be ya fatiêoidi iyen, Na umi haba auwen, “Yau sai?” Alinana, Pita ya bui, Um mate Keliso, Yaubada ena Fasinabo Dogana. 30 Yesu ya laugagayoêedi, iyebom, Ami nuwa gado. Tabu au fatala libalibaegu. 31 Yesu ya fatubu tau famuli watanina ya faêatadi iyen, Doga Natuna haba kamkamna boludi ya fahoinadi. Haba babada yo tau antalasam babaêisadi yo laugagayo tau lau faêataena sa êwaiyoêoêen. Haba sa wunui na lahai faihona ai mulidi ya mwahuli fuyo. 32 Liba te Yesu ya dede faneganega. Yo fede Pita ya foya hudoêiyen, be ya liba suêui. 33 In moho, Yesu ya timuli bui ana hewahewali lisidi, na ma liba suêu hinaga, In ya libalau Pita lisina, iyebom, Satani, u lau afulegu! Em nuwanuwatuhu doha dodoga edi nuwatuhu. Hige Yaubada ena nuwatuhu! 34 Habahim tau famuli watanina yo baiwa ya yoga gogondima lisina be ya falibadi iyebom, Yena sai ya famuli watanigu ginauli mahudoêidi ti otawa. Ena kolosi moho i bahei na i lau watanigu. 35 Yena sai ena mwahuli ya modemodeêen, mate ibege ana loge. Na sai ena mwahuli ya nuwa afulen, yau debagu yai yo wasa loholohona debana yai mate haba ya mwahuli. 36 Ibe sai tanoêubu nuwanuwatuhudi moho ya modemodeêedi, na yaluwana hige i nanabuwen ai somo haba dudulai ya abi? 37 Somo haba doga ya ginauli be yaluwana ya une fafuyo? 38 Umi mate tau muli suhasuha Yaubada matana yai. Lahai pilipilidi yai te yena hiti heyaheyayadi ganahewadi yai sai ya taumayamayaêegu yo egu liba hinaga ya taumayamayaêen, mate Doga Natuna haba ya taumayamayaêen ena fuya laoma yai maidana anelu tabudi Tamada ena namanamali yai. (Delamaiya 3:8)