Maleko 5

1 Galili Gabogabona yai sa dohe be Gelasa nuêuna yai sa duna. 2 Yesu ya tulubeêu na taumoho hudoêi yaluwa heyaheyayadi ganahewana yai ya laoma. Bwana yai ya kalamahano be ya laoma Yesu lisina. 3 In mate duyufi atiêatipudi yai ya gogogo. Hige gonowana sai i faseni bodai. 4 Fuya ouêouli nimana yo ahena sa fasenidi in moho seni ya eli motudi yo powati ahena yai ya dem pwaipwaidi. Hige gonowana sai i abi famamayo. 5 Lahai yo iêipa ya laulau gaibu ai bwana yo ai tuêa. Ya êwalaêwalawui yo tauna ya anseseidi ai umeêehu senadi. 6 Yesu hola ya laolaoma na dogana ya itaêita lau be ya ita yo fede ya fabelele be nuwanuwana yai ya tulibono. 7 Habahim ya liba laêilaêi iyen, Yesu, Hewa Wananaha Yaubadana Natuna! Somo lisigu yai wa fanuha? E anêetaim Yaubada hesana yai, tabu u fakamkamnagu! 8 (Ya liba doha paêana Yesu iyen, “Yaluwa heyaheyayadi doga ni au lau afulen!”) 9 Yo fede Yesu ya fatiêo lau lisina iyen, Hesam somo? Taumoho iyen, Hesagu “Baiwaâ,” êe ouli wananaha! 10 Ya anêeta lau Yesu lebena tabu yaluwa heyaheyayadi ai nuêu ni i lau weêaidi. 11 Na sadai yai mate salai baiwadi sa suwasuwali daha sadaina yai. 12 Yo fede yaluwa heyaheyayadi Yesu sa anêetai tiyen, Aeeâ, u fatamalimai ai lau salai ai ganahewadi ai miya. 13 Yo fede Yesu ya duidi be sa kalamahano na sa lau salai baiwadi doha 2,000 sa luhufidi. Salai sa leta kokoli daha yai be sa dago lidi hoêowa yai. Yo fede sa kapulolo. 14 Salai tau itaêita watanidi sa gela be sa lau sa fatala libalibaen taon yai yo mulimulina nuêudi yai be dodoga sa laoma somo ya tubu sa ita. 15 Sa mahanoma Yesu lisina, taumoho wa uluna ya dudulai. Kaleko ya liêo, na ya taêataêai sa ita. Yo fede mahudoêidi sa êwasabu. 16 Somo ya tubu taumoho ni yo salai lisidi yai salumadi sa ita, mate dodoga edi sa liba. 17 Yo fede Yesu sa faliba tiyen, Aeeâ, ema nuêu u lau afulen! 18 Waga yai Yesu ya awa na doga ya faloholoho wa ya libalau lisina iyen, Aeeâ, Yesu, bena E lau watanim! 19 Yo fede alinana, Yesu ya bui iyen, Hige gonowana! U fuyo em luma yo am boga lisidi be Guyau ena nuwatohatoha lisim yai yo somo ya ginauli lebem yai enehedi u liba. 20 Yo fede doga wa ya aulaha ya lau Dekapolisi Nuêuna yai be somo Yesu ya ginauli lisina yai ya falibadi. Salumadi sa atahiyen mate sa noêo. 21 Waga yai Yesu sa dohe be sa mahano yo fede baiwa sa faêoigogon. 22 Aba oiêoigogo baêisana hesana Diyailusi ya mahanoma Yesu ya ita yo fede ya hoba lidi ahena yai. 23 Ya anêeta gadogadola lau lisina iyen, Natugu waiwaihin mate nuêanuêana. Te lau be wa abilau ai tauna haba ya loholoho! 24 Yo fede Diyailusi maêena Yesu sa lau. Dodoga mate sa faipapipapi na sa laulau watanidi. 25 Waihin hesa ana asiyebo mate êwasina ya miyamiya afulen eeâ, bolima safuhudohudoêi luwaga. 26 Doketa boludi fuya lofalofa edi mulamula yai sa fafakamkamna. Ena moni mahudoêina ya pei faêofi bena haba loholoho ya lobahi. In moho ana asiyebo ya fafalaêi. 27 Yesu wasana waihin wa ya atahiyen be nuwana yai iyen, Ibe ana luhuluhu moho E abiêona haba E loholoho. Yo fede Yesu mulina yai ya laoma be dodoga pwaludi yai ya andudu balabala be ana luhuluhu ya abiêona. 29 Amna ya atahi mate êwasina ya miyamiya afulen ya fatautau yo ena kamkamna wa ya ofi. 30 Yesu amna ya abi mate gigibwali ya lau afulen. Yo fede baiwa ganahewadi yai ya timuli bui be ya fatiêo iyen, Sai agu luhuluhu ya abiêina? 31 Tau anpate alinana sa bui tiyen, Baiwa haêa wa ita, na sidohana be uwen, “Sai ya abiêinagu?" 32 Yo fede Yesu ya itaêita asiêasi be tau abiêinana ya yoêoi. 33 Waihin asiêasiyebona somo lisina yai ya tubu ya sibai yo fede ma êwasabuna ya laoma be ya tulibono ahena yai na ya faliba dudulain. 34 Yesu iyen, Natugu, nuwam i amna! Em kawawananaha debana yai asiyebona ni, ibege u abi fuyoi. 35 Yesu hola waihin asiêasiyebona ya fafaliba na Diyailusi ena luma yai dodoga sa laoma be aba oigogo baêisana sa faliba tiyen, Natum haêa ya peêi. Tabu u modemode lau tanuwaga lisina. 36 Sa libaliba, Yesu ya atahi yo fede iyen, Tabu u êwasabu! U kawawananaha moho. 37 Diyemsi ma hidana Diyon yo Pita iyabodi maêedi Yesu sa lau, na hige sai hesa. 38 Sa mahano lau Diyailusi ena luma yai, bobohalahala yo tan sa atahi. 39 Ya luhulau luma yai be ya falibadi iyen, Bobohalahala yo tan te sidohana? Tineêeu ni hige i peêi. Mate ya eno! 40 Yo fede sa liuhwaêen. Habahim mahudoêidi ya duidi sa lau ganamuli. Na tamana, tinana yo tau famuli watanna faihona ya auledi be sa lau tineêeu edi aba tolena bilina yai. 41 Ya abilau nimana yai na ya faliba iyen, Talita, koum! (Aniyona mate, “Tineêeu kiukiu, E falibam, ‘U obiyo!”) 42 Hige walolona na ya laulau tiga. (Ena bolima mate 12). Laulau te debana yai edi noêo sa ofi. 43 Yesu ya laugagayoêedi tabu sai, ena ti liba, yo ya falibadi bena sa fakalahe.