Maleko 4

1 Yesu ya lau faêata boda gabogabo sadaina yai na baiwa ya laêi wananaha, yo fede waga hesa ya poupouli amainiya ya awa lau be ya taêai. Na dodoga mate fote yai. 2 Heyaheyason ya fapaisowadi ena lau faêata yai be ginauli boludi ya fatalahadi iyen, 3 Au ataêatahi! Fuya ma esega doga hesa ya lau be witi tumadi ya lau falili ena gabu yai. 4 Haisa sa beêu edaêeda yai yo fede ataiêa sa laoma be sa anidi. 5 Haisa sa beêu tanohi umeêumeêehuna yai be sa in feufeula. Maihala ya kepama witi wa ya nefadi be sa hohoya paêana tanohi ya hebehebe be hige ti abi lam sigi lidi. 7 Tuma haisa sa sagigi lidi hawahawa nulinulidi ganahewadi yai be sa in. In moho sa waboêidi be hige ti in loholoho yo hige ti fuwa. 8 Haisa mate sa beêu tanohi loholohona yai be sa in yo sa fuwa loholoho be haisa tumadi naunaudi na haisa sa duliduli. 9 Ofiêofina, Yesu iyen, Au ataêatahi komakoman! 10 Yesu iyabona na tau ataêatahi haisa maidadi safuhudohudoêi luwaga sa laoma be Yesu sa fatiêoi tiyen, Heyaheyason aniyodi haga ema u liba? 11 Yesu ya falibadi iyen, Yaubada Aba Baêisa libana simosimona mate haêa E falibamiu. Na dodoga haisa mate heyaheyason yai sa atahiyen. 12 “Haba sa ita na in moho ibege ti ita lobahi; haba sa ataêatahi na in moho ibege ti nuwatuhu lobahi. Ibe moho nuwadi sa buidi haba edi heyaheyaya ya nuwa afuledi.” (Isaiya 6:9-10) 13 Habahim Yesu ya fatiêoidi iyen, Yena heyaheyason te hige au sibai mate haba haisa sidohana emi sibasibaidi? 14 Tau falili mate Yaubada ena wasa tau umahina. 15 Dodoga haisa itaêitadi doha tuma edaêeda yai. Wasa sa atahiyen yo fede Diyabolo ya laoma be libana nuwadi yai ya abi fahi. 16 Dodoga haisa iti doha tuma sa beêu lidi tanohi umeêumeêehuna yai. Wasa sa atahiyen yo fede sa abi ma nuwa amnadi. 17 In moho hige i abi lam nuwadi yai be hige i ota lofalofa. Yena pilipili e kamkamna sa laoma wasa ni debana yai feula na sa muli suhasuha. 18 Na dodoga haisa doha tuma sa in hawahawa nulinulidi ubudi yai. Iti logedidi wasa tau atahiyenna. 19 In moho: mode hudoêi - hudoêi, bena sa fagogo, yo fanufanuha haisa nuwadi sa famohafudi. Yo fede wasa sa eli bulubuluhi be hige ti fuwa. 20 Dodoga haisa mate doha witi tumadi sa falili tanohi loholohona yai. Wasa sa atahiyen yo fede sa lau watan be uludi sa toledi. Haisa naunaudi na haisa sa duliduli. 21 Yesu hinaga ya liba iyen, Yena lampa wa gabu haba ai gulewa wa fakou e ai aba eno ubuna wa tole? Higeêe! Haba ai mahata wa tole. 22 Ginauli simosimodi haba sa taumahata na somo sa fakou haba bubulina sa kamfahi. 23 Fafabeyamiu, au ataêatahi komakoman! 24 Yo ya falibadi hinaga iyen, Somo ami atahi mate au fadosi komakomaniêi! Lufa laêina somo wa fapaisowa haba gonogonowana ai lisim sa fapaisowa e haba ya diêoi. (2 Kin 21:13) 25 Yena sai somo lisina yai mate Yaubada haba ya falaêi. Na sai higeêe mate somo begana lisina yai hinaga haba ya kamfahi. 26 Yesu ya liba fuyo iyen, Yaubada Aba Baêisa itaêitana doha taumoho hesa tuma ya lau falili gabu yai. 27 Lahai fisa mulidi yai tuma wa ya in. In moho sidohana ena inêin yo ena laêilaêi hige i sibai. 28 Tanohi iyabona tuma wa ya faêin be ya fuwa. Bwaêibwaêina mate atipuna bigabigana ya taumahata, habahim ya taya be tumana ya toledi. 29 Ya anaho be ya tomo. 30 Yesu ya falibadi iyebom, Yaubada Aba Baêisa doha somo? Heyaheyason somo haba te fapaisowa be te fatau gonogonowa? 31 Itaêitana doha ite: Taumoho hudoêi umaêuma hesa tumana kiukiu wananaha ya umahi. 32 Hige walolona ya in, be gabu anêandi haisa ya tubu famulidi na ataiêa sa lofoma be lagadi logulogudi yai edi nohi sa ginaulidi. 33 Heyaheyason boludi doha itete Yesu ya fapaisowadi be dodoga enehedi ya dede, be haba gonowana sa nuwatuhu lobahidi. 34 Heyaheyason yai moho ya falibadi na yena iyabodi mate aniyodi ya dede famahatadi tau famuli watanna lisidi yai. 35 Maimailafina Yesu tau famuli watanina ya falibadi iyen, Haga ta lau gabogabo tefana. 36 Waga haisa amainiya hinaga. Tau famuli watanina baiwa sa lau afuledi, na sa awa lau Yesu ena aba taêataêai wagana yai be sa lau tefa. 37 Hige walolona hwayahwayau adiêadidilina ya towa be bagodu sa hin diêo. Begana haba waga sa famohafu. 38 Yesu ya eno unuwa yai waga mulina yai. Tau famuli watanina sa fanohi tiyen, Tanuwaga! Haba te peêi. Sidohana hige u mode? 39 Yesu ya obiyo be ya liba adidili lau hwayahwayau yo bagodu lisidi iyen, Au fatautau! Yo fede hwayahwayau ya towa motu na ya daumwali fuyo. 40 Habahim Yesu ya falibadi iyebom, Sidohana be ami êwasabu? Emi sunuma, e higeêe? 41 In moho sa êwasabu wananaha be sa famoêa libaliba tiyen, Sai itete? Hwayahwayau yo bagodu ena liba sa lau watan!