ZABURA 57

¹ Ǹ ma wɛ̃nda gwa Luda, ǹ ma wɛ̃nda gwa, zaakũ mↄkↄ̃mmɛ ma nanyĩ. Ǹ ma sↄtↄ n orun ari ma bo ga lɛ́i.

² Matɛn wiki lɛ́ Luda Musudei, Luda kũ àdi yã kũ à ò papamɛnɛ pìi.

³ Ani tó kpányĩ bo zaa musu à ma sura ba, ani wé'i da gbɛ̃ kũ òtɛn pɛ́manↄa, ani a gbɛ̃kɛ kũ a náaniyão kɛmɛnɛ.

⁴ Má kú músunↄ tɛ́, ma gↄ̃ wutɛna nↄ̀bↄ pãsĩnↄ dagura. Gbɛ̃ pìnↄ nɛ́nɛ nna lán fɛ̃nɛda bà, ń saka bi sárimɛ kũ kàao.

⁵ Luda, ǹ n zĩda tↄ́ sɛ́ lei ari musumusu, ǹ tó n gakuri da anduniala pínki.

⁶ Ò tankutɛ kpàkpamɛnɛ ma zɛ́n, akũ ma gↄ̃ wari gũn, ò wɛ̀ɛɛ yↄ̃̀ ma arɛ, akũ ò zù wɛ̀ɛɛ pìn.

⁷ Ma laakari kpatɛna Luda, ma laakari kpatɛna, mani lɛ̀ sí mà n táaki lɛ́.

⁸ Ǹ vu, ma swɛ̃̀! Ma mↄrↄ kũ ma gidigboo kú máa? Mani gudↄ pá mìio.

⁹ Dikiri, mani n sáabu kpá burinↄ tɛ́, mani n táaki lɛ́ gbɛ̃nↄnɛ.

¹⁰ Zaakũ n gbɛ̃kɛ zↄ̃kↄ̃ↄ kà n kĩnaa, n náani ludambɛ luku lè.

¹¹ Luda, ǹ n zĩda tↄ́ sɛ́ lei ari músumusu, ǹ tó n gakuri da anduniala pínki.