ZABURA 58

¹ Gbãnadenↄ, adì yã o a zɛ́a sↄ̃ yá? Adì yãkpatɛ kɛ kũ gbɛ̃nↄo súsu yá?

² Adì yã vãni laasun lɛ́ á swɛ̃̀ɛ gũn, adì gbãna mↄ gbɛ̃nↄnɛ á bùsun.

³ Gbɛ̃ vãninↄn sãtɛna zaa ń ina gↄrↄmɛ, ɛ́kɛdenↄn yakana zaa ń da nɛ̀sɛn.

⁴ Ń lɛ́gbɛ de lán mlɛ̃̀ sɛwɛ bà, ò de lán káre kũ à a sã tàtaa bà,

⁵ de mlɛ̃̀ɛ pì sún a kↄ̃kↄ̃'ori úra ũ maro, de àsun a dabukɛri gonikɛ ero.

⁶ Luda, ǹ ń saka ɛ́'ɛńnɛ ń lɛ́n, Dikiri, ǹ músuu pìnↄ saka sↄ̃ntɛnↄ ɛ́'ɛńnɛ.

⁷ Ǹ tó ò gɛ̃tɛ lán í bàasinaa bà. Tó ò sá gà, ǹ ń kànↄ ɛ́'ɛńnɛ.

⁸ Ǹ tó ò kori kɛ zɛ́n lán kↄntↄ lɛ́'i bà, ògↄ̃ de lán nↄ̀bↄtɛnɛ kũ adi ifãntɛ̃ ero bà.

⁹ Ari yàka tɛ́ gↄ̃ oro wã, gbɛ̃ vãninↄ ni gɛ̃tɛ kũ ĩao.

¹⁰ Gbɛ̃ mananↄ ni pↄnna kɛ zĩ kũ Luda fĩna bòńnɛ gbɛ̃ vãninↄa, kũ ò ń gbá pìpi ń aru gũn.

¹¹ Gbɛ̃nↄ ni pi: Gbɛ̃ mananↄn láada vĩ fá! Luda kun, àdi yãkpatɛ kɛ andunia gũn.