ZABURA 56

SIM

¹ Ǹ ma wɛ̃nda gwa Luda, òtɛn pɛ́ma, òdigↄ̃ zĩ̀ ká kũmao ògↄ̃ wɛ́ tãma gↄrↄ sĩnda pínki.

² Ma kpàkparinↄ dìgↄ̃ pɛ́ma gↄrↄ sĩnda pínki, ń karambaani yãin òtɛn zĩ̀ ká kũmao.

³ Tó vĩna tɛni ma kũ, mani n náani kɛ.

⁴ Mani Luda tↄ́ kpá yã kũ à ò yãi, má Luda náani vĩ, mani vĩna kɛro. Bↄ́n bisãsiri ni fↄ̃ à kɛmɛnɛɛ?

⁵ Òdigↄ̃ ma yã litɛ kpɛdangara gↄrↄ sĩnda pínki, òdigↄ̃ ma kpákpa kũ yã vãnio.

⁶ Òdi kↄ̃ kakaramai ò natɛmɛnɛ, òdi ma kpákpa ògↄ̃ ye ò ma dɛ.

⁷ Luda, ǹsun tó ń gbɛ̃ke boro, ǹ burinↄ nɛ kũ pↄfɛ̃o.

⁸ Ǹ ma warikɛna yã da, ǹ ma wɛ́tɛ̃kↄtɛna ká n tùruu gũn. À kú n takada gũnloo?

⁹ Tó ma lɛ́ zù Ludai, ma ibɛrɛnↄ ni boru kũ kpɛo, manigↄ̃ dↄ̃ kũ à yã sìmɛnɛ.

¹⁰ Mani Luda tↄ́ kpá yã kũ à ò yãi, ee, mani Dikiri tↄ́ kpá yã pì ona yãi.

¹¹ Má Luda náani vĩ, mani vĩna kɛro. Bↄ́n bisãsiri ni fↄ̃ à kɛmɛnɛɛ?

¹² Luda, mani lɛ́ kũ ma gbɛ̃̀nnɛnↄ fĩna bo, mani kɛnnakũkↄ̃o sa omma.

¹³ Zaakũ n ma si ga lɛ́i, ńdi tó ma gɛ̃̀ɛ sìro, de màgↄ̃ kure kũnwo gupura kũ àdi wɛ̃̀ndi kpáḿma gũn.