ZABURA 42

¹ Lákũ zↄ̃ dì swa sarɛ ni dɛ nà, lɛn n ni dì ma dɛ lɛ, Luda.

² Ma nini tɛn Luda ni dɛ, Luda Wɛ̃̀ndide pìi. Bↄrɛn mani le mà gɛ́ daalɛɛ?

³ Wɛ́tɛ̃ mɛ́ à gↄ̃̀ ma pↄ́ble ũ fãnantɛ̃ kũ gwãanio, òdigↄ̃ pimɛnɛ gↄrↄ sĩnda pínki: N Luda kú máa?

⁴ Ma nɛ̀sɛɛ wɛ̃̀nnɛ, akũ yã díkĩnanↄ dↄ̀magu, lákũ madì gɛ́ pari gũn nà ari Luda ↄnn, gbɛ̃nↄ dìgↄ̃ tɛ́tɛ ma kpɛ kũ ayuwiio, dikpɛkɛrinↄ dì dodomai kũ sáabukpanaao.

⁵ Bↄ́yãin ma nɛ̀sɛɛ yàkaa? À kɛ̀ dera ma laakarii fùtɛɛ? Séde màgↄ̃ wɛ́ dↄ Ludai, zaakũ mani ɛra màgↄ̃ à sáabu kpá, ma Surabari, ma Luda.

⁶ Ma nɛ̀sɛɛ yàka, akũ n yã dↄ̀magu zaa Miza kpigɛrɛɛi ari Yoda mìia, zaa Ɛmↄ kpinↄ musu.

⁷ Ndì tó ísↄ̃kɛna kĩni gↄ̃ dↄ, í lòkotonↄ tɛn lɛ́ zukↄ̃i. N tò í tɛn damala, a sↄ̃ tɛn tá kũmao.

⁸ Dikiri dì yenyĩ mↄmɛnɛ fãnantɛ̃, a lɛ̀ɛ dìgↄ̃ dↄ ma lɛ́n gwãani, matɛn wɛ́ kɛ Luda kũ à de ma wɛ̃̀ndi ũa.

⁹ Madì pi Luda ma gbɛ̀sinɛ: Bↄ́yãin ma yã sã̀nguu? À kɛ̀ dera n tò màgↄ̃ tɛ́ kũ pↄsirao ma ibɛrɛ wɛ́tãmmana yãii?

¹⁰ Ma waridↄmmarinↄ dì ma sↄ̃sↄ̃, akũ ma wánↄ dìgↄ̃ wí, òdigↄ̃ pimɛnɛ gↄrↄ sĩnda pínki: N Luda kú máa?

¹¹ Bↄ́yãin ma nɛ̀sɛɛ yàkaa? À kɛ̀ dera ma laakarii fùtɛɛ? Séde màgↄ̃ wɛ́ dↄ Ludai, zaakũ mani ɛra màgↄ̃ a sáabu kpá, ma Surabari, ma Luda.