ZABURA 41

SIM

¹ Arubarikaden gbɛ̃ kũ àdi gbãnasaride yã da ũ, Dikiri dì a bo warikɛnagↄrↄa.

² Dikiri ni à dãkpã à a gba wɛ̃̀ndi gbã̀na, ani arubarika daagu a bùsun, ani a kpá a ibɛrɛnↄa ò ń pↄyeina kɛaro.

³ Dikiri ni zɛ kãao tó à wutɛna gyãn, ani tó à futɛ gyã pìn aafia.

⁴ Ma pì: Dikiri, ma durunna kɛ̀nnɛ, ǹ ma wɛ̃nda gwa, ń ma gba aafiaa.

⁵ Ma ibɛrɛnↄ tɛni ma wɛtɛ kũ gao ò pì: Bↄrɛn ani ga de a tↄ́ sãtɛɛ?

⁶ Tó ò sù ma gwa, yã pãn òdi omɛnɛ, òdi baaru vãni wɛtɛ ma yã musu, gbasa òdi futɛ ò gɛ́ ò yã pì fã bàai.

⁷ Ma zãngurinↄ dì ma kpákpa kũ yã vãnio, ń pínki òdi àlesi vãni dↄma ò pi:

⁸ Gagagyã mɛ́ à a lè, ani futɛ a wutɛna bire gũn doro.

⁹ Bee ma gbɛ̃nna kũ ma a náani kɛ̀, kũ odì ↄ kakara ta dokↄ̃nↄ gũn bò ma kpɛ.

¹⁰ Mↄkↄ̃n sↄ̃ Dikiri, ǹ ma wɛ̃nda gwa, ǹ ma gba aafiaa de mà fĩna bońnɛ.

¹¹ Tó ma ibɛrɛnↄ dí ma yↄ̃̀gↄ̃ kɛmaro, manigↄ̃ dↄ̃ sà kũ ma yã kàngu.

¹² Ń ma kũna ma nɛ̀sɛmana yãi, ń tò màgↄ̃ kú n arɛ gↄrↄ sĩnda pínki.

¹³ Arubarikade Dikiri, Isarailanↄ Luda zaa káaku ari gↄrↄ sĩnda pínki! Aami! Aami!