Joun 16

1 Ngko sehwotɨêmoême sohonta sekwo ngkineêno hohujo ikinjanɨmopitnnohonji yoêmayo yolohoso lɨjwosemofalokweno. 2 Hwangku sekumo aêamu Jutafe tajo ango somtaêni wae wesemofantɨfeho. I tɨfi noêmo aêamu fehohnjoso hofɨko sekumo fonjasesyɨkujoêno hofɨko huno hwasyo ole wosyofɨsyantɨfeho, Nakwo Anɨtuye syoho wopɨngo ulohofiyɨwoênɨngkuhwone soêno olo hwe lohumo wofonjosyano. Hwasyo ose wosyofɨsyantɨfeho. 3 Hwapɨngoso hofɨko nje Mpohwoênji ngko huhwoênnontnneêno huno ntoêno muyofoho. 4 Tɨfi noêmo olo yoêmayo loso iêmofaposo sohonta hungkuno ngko sekumo lɨjwosemofalokwe losoêno sekwo apaêno huno ikwesyafɨhupitnneêenji selalokweno. Anɨtuye Towahuno Wopɨngo sohwo kakoe syoho iyoêne hungkunofoho. Hohonta ngko sekwoênji humamote sohonta ngko yoêmayo hilo soêno maselɨmmotefoho. 5 I osoêno olohonta Anɨtu kako ngkimo sekwoe ango loponeêno nɨhwatɨmentiso sohwoepono asomo wasɨêmne hwoênyoho. Ngko wasɨêmne hwoênyoho ko selahonɨngko sekwo ngkimo pehoêne nehwotɨêmofalokuno eso mantohonyofoho. 6 I olohonta ngko wasehwotɨêmoêmneêno yohono selohe soêno sekwo sekwoe sɨmeho tango seyohoho. 7 I osoêno ngko hungkuno nehopiênohino waselɨmonneêno yohono. Ngko sekumo sefoêmayoêne wasɨmonneêno yohono. Ngko sekumo masehwotɨêmofeênjoêmanji Towahuno sekumo yokumpohnênyo sosofitofosesyohumayoêne sohwo moseêmanehoho. I osoêno ngko sɨmeêmanji ngko Anɨtuye Towahuno huhwo sohumo sekuyepono walɨhwatɨmonnoho. 8 Kako nopɨhwosi syoho hufaêu sɨhune yone hweho. Sɨmoêmo kako aêamufe yahino wonyo ujo ehontojwasyɨhwosoêno hofɨko yofe uhwopitnnefoho. Nomêne syohoso kako honɨngkano itoênohinoso utɨhwamontonoho. Nomêneso aêamu yahino wonyo somneêno tohino mayoêne Anɨtu kako yano ulofiyone soêntnneêno ulɨmontonoho. 9 Hofɨkoe yahino wonyo hwapɨngo soêno Anɨtuye Towahuno sohwo ole utɨhwamontonoho. Hofɨko ngkineêno sɨmeho hiêntnnono montapmmotofo soêno honɨngkano wonyoso hiênjofoho. 10 Anɨtuye Towahuno sohwo kako honɨngkano wopɨngo itoênohino soêno ole utɨhwamontonoho. Ngko honɨngkano homo somo intoênohino imote soêno nje Mpohwo kako ngkimo asomo ntɨmanefoho. Oseso sekwo olopo apaêno manohonɨfitnnefoho. 11 Anɨtuye Towahuno sohwo kako aêamufe yahino wonyo somneêno yano ulofiyone soêno ole utɨhwamontonoho. Anɨtu kako hwe wonyo Seten olo hwaho loponjo aêamu mokosyohumawoênɨngkiso sohumo yano nto ulofimentiso soêno aêamu Setenɨmo inɨngkowalokwofo soêntnneêno yano ulofiyɨhwosoêno hofɨko tohino engo nomapitnnefoho. Ose utɨhwamontonoho. 12 Ose nalonto nalɨmento, Ngko sekumo hungkuno piênɨngo engo waselɨmonji ko yoheso sekwo oso hungkuno selɨme somo huno seyone soêno hopoenohino hwasɨêmaho. Oêo, hopiênono selɨêmeêno sekwoe sɨmeho tango engo seyonoho. 13 I osoêno hwangku Anɨtuye Towahuno hungkuno nehopiênohino sejoêne sohwo kako nopɨhwosoêno kako sekwoênji humahwosi kako yoêmayo hungkuno hopiênonohino ne somneêno ntoêno womikinjosehwatɨmontonoho. Kako kakoe huno mtaêni syofɨsyɨhwasi waselɨmontoêmaho. Oêo, yoêmayo hungkuno kako nupaênɨwoênɨngkiso soêno waselɨmontonoho. Osoênji yoêmayo tɨfi noêmo imoênone soêntnneêno waselɨmontonoho. 14 Kako nje hungkuno selɨmentoheso nomahwosi sekumo selɨhwosoêno yoloho neso lɨjwasemofɨhwosoêno sekwo huno ntoêno waseimontonoho. Osoêno kako nje yofe engo soêno wosetɨhwamontonoho. 15 Yoêmayo nje Mpohwo mokosyohumasoso njefoho. Osoêno hungkuno nto seloheso ngko apaêno waselɨmonnoho. Anɨtuye Towahuno sohwo kako nje yoêmayo hungkunoso nomahwosi oso hisoêno wolosetɨhwamontonoho. 16 Sekwo weêenepi ngkimo manohonyoênjo uyantɨfeho. I osoêno sekwo weêenehwo humafɨkuji hwangku sohonta ngkimo nonohonɨfitnnefoho. 17 Ose nelahonɨngki kakoe inomokomoyo fehohnjo sohwonaêni ole hnnɨmentɨhwoni, Oso hungkuno nalisoso hwapɨngo neso pehoêneto. Ole nalohi, Weêenepi sekwo ngkimo monohonɨfitnnehofo. I osoêno weêenehwo nohumafɨkuji ngkimo apaêno nohonɨfitnnefoho. I nomêne nalisoso ole, Ngko nje Mpohwoe pone hwoênyoho. Ose nalisofoho. 18 Oso weêenehwo nalisoso pehoêne nalohoho. Yoloho neso nakwo huno monayohoyohoho. 19 Ose hnnontani nakwo Jisasɨmo ko mujoênjo yahonɨngkuhwoni Jisas nakwoe huno soêno huno uyahonɨngki nakumo nalɨmento, Sekwo olo hungkuno ngko selohe losoêno pehoêne hnnalokwofo. Ngko ole selohono. Weêenepi sekwo ngkimo manohonɨfitnnehofo. Weêenehwo humafɨkuji apaêno ngkimo wonohonantɨfeho. Ose selohono. 20 Ngko hungkuno nehopiênohino waselɨmonneêno yohono. Weêenepi yoêmayo tango nɨêmane soêno aêamu hwahoponjo piênɨngo engoso hofɨko sɨmonyo yontanɨngkuji sekwo sohwasi humotaho engo lɨkuji sɨmeho tango waseyɨmontonoho. I osoêno sekwoe sɨmeho tango seyontososo iwoloêmo lohofɨkuji sekwo sɨmonyo engo uyantɨfeho. 21 Ose nalonto kako pahnnɨmo hungkuno ole nalɨmento, Olo selalokwe loso aêmu fisi kako mehomi aswo mayo paênyofoho. Aêmu fisi kako aswo tohoêne yonto sɨmeho tohino umnonte soêno kakoe sɨmeho wopɨngo mmoênyofoho. I osoêno kakoe mehomi aswo mahwosi kako oso tohino engo soêno inɨngo mofɨhwosi sɨmonyo uyɨmontonoho. 22 Oso mehomi aswo mawoênɨngkohofo paênyoso sekwoe sɨmeho tangoênji humalofo. Osoêno hwangku sohonta ngko apaêno sehonɨêmeêno sekwo sɨmonyo engo apaêno uyantɨfeho. Oso sɨmonyo iyo homo somo wae yaofoêne aêamu fihwo mohumuyohoho. Oêo, awonoho. Sɨmonyo iyoso neêno nowentɨhwonefoho. 23 Oso sɨkuno homo somo sekwo ngkimo yoêmayo yoêmayo soêno mantɨfitnnefoho. Oêo, ngko hungkuno nehopiênohini waselɨmonneêno yohono. Sekwo nje Mpohumo yoêmayo yoêmayo soêno jomo ulɨkuji nje yofeênji ulɨfijo soêno kako ngkineêno syanɨfɨsyɨhwosi yoêmayo yoêmayoso wosejapmmontonoho. 24 Hohonta oso hopaso sekwo mimmotofɨhwasoho. Oêo, nje yofeso Mpohumo mulɨmmotofo soku olohonta sekwo Mpohumo nje yofeênji jomo ulɨfijoso yoêmayoso wosejapmmontonoho. Oseso sekwo sɨmonyo nehopiênohini uyantɨfeho. 25 Ngko yoêmayo yoêmayo soêno pahnnɨmo hungkuno selɨwoênɨngkohefoho. I tɨfi noêmo ngko pahnnɨmo hungkunoso maselɨmnehono. Oêo, ngko nje Mpohumneêno hungkuno yolohoênohini wolɨjwasemoêmonnoho. 26 Oso hohosohonta sekwo yoêmayo soêno Anɨtumneêno jomo ulɨfijo sohonta ngko ajwo sopo sekumo sefoêmayoêne mohumamnehono. Oêo, sekwo Mpohumo nje yofe ulɨfijoso kako yoêmayo soêno wosejapmmontonoho. 27 Hwapɨngoso sekwo ngkimo sɨmeho hiêntnnono ntapontɨfe sohwahnneêno Anɨtu nɨhwatɨmentiso soêno huno seinyo sohwahnneêno Anɨtu kako sɨmeho sejopalofoho. Kako sekwoe hungkunomo wosepaênɨmontonoho. 28 Ou nehopi. Hohonta Mpohwo kako nɨhwatɨmentiso sohwoêni olo hwaho lopono pmmentohe hwoênyoho. I olohonta ngko olo hwaho lopo sehwotɨêmohmêmo nje Mpohwoepono asomo wasɨmne hwoênyoho. 29 Ose nelahonɨngki kakoe inomokomoyo sohwonaêni ulɨmentɨhwoni, Ihwoni. Olohonta kɨko pahnnɨmo hungkuno monalohoyohino. Oêo, hungkuno yolohoênohini nalohino. 30 Osoêno nakwo yoêmayo soêno huno nayohoho. Kɨko huno hwapɨngoênjo hwosoho. Nomêne aêamu hofɨko hunoênohini syofɨsyantɨfeso hofɨkoe huno hiso kɨko huno kinyo hwosoho. Osoêno nakwo olo hilo soêno sɨmeho hiêntnnono uyalokuhwono. Kɨko Anɨtu mtaêango nehopiênohino hwosoho. 31 Ose ulahonɨngkuhwoni Jisas nalɨmento Olohonta sekwo ngkineêno sɨmeho hiêntnnono nehopi lontopantɨkwofo. 32 Upaênɨmno. Sekumo tango seêmayoêne sɨkunoso weêenepi umoênɨmonteêno yohoho. I nto iêmofapohoho. Osoêno hofɨko ngkimo nɨkekujoêno sekwo ngkimo nɨhwotɨêmofɨkuji sekwo angaêno angaêno sekwoe angoêmneêno esesamo wohumpeentɨfeho. Osoêno sekwo ngkimo nɨhwotɨêmofɨkujoêno ngkoênohini nje mango sohwanji wohumamonnoho. I osoêno ngkoênohinɨêmaho. Oêo, Mpohwo kako huhwo ngkoênji wohumamontonoho. 33 Yoêmayo tango seêmayo soêno ngko olo hungkuno hiloso selalokweno. Tango hiso seêmahonɨngkuhwosi sekwo ngkineêno ole wosyonɨfɨsyantɨfeho. Ngko Jisasɨmo ufohiênonji kakoênji humalohwono. Ose syanɨfɨsyɨkuji sekwo sɨmeho wopɨngoênji wohumantɨfeho. Sekwo olo hwaho lopo nohumentanɨngkuji yoêmayo tango wonyoso woselohofantɨfeho. I osoêno sekwo yokumpohnênyo lohofɨkuji sɨmonyo fiyɨmno. Hwapɨngoso ngko olo hwaho loponjo yahino somo hwotoho fenji nto uyakoloêmaleno. Ose nalɨmentisofoho.