Joun 15

1 Jisas kako kakoe inomokomoyo sohwonaênɨmo pahnnɨmo hungkuno ole nalɨmento, Ngko iyo hwapɨngo ne hwoênyoho. Nje Mpohwo iyo uyo syoho sohwoênɨmo mokosyonɨhumunyo hweho. 2 Nje iyopamo ne mintoênyoso Mpohwo kako nolofehwosi wae weeoêmtonoho. Iyopamo ne intoênnyo hopiênonohinoso kako nofasyɨhwosi pamo neênjoso wawoêmontonoho. Hwapɨngoso ipisayo engo intoênɨngkuhwosi ne engo imoênyoênefoho. 3 Oso paênyoso sekwo nje apamo sohwasi sekwo nje hungkunomo itoêno inɨngkowalokwofo soêno oso hungkuno hiso yoêmayo yahino wonyo imotofo somo wae esemofalofoho. Sekwo kihoêmasoênjo humalofo. 4 Sekwo ngkimo fosyonɨhumamno. Ngko sekumo wofosyosehumamonnoho. Iyopamo fihwo kako iyo ne hwapɨngo somtaêni nosanjɨhwosi pɨwasyososo kako ipisayo neso mintoênonehoho. Oso paênyoso sekwo ngkimo monɨfohiênyoêmanji sekwo huhwasi ipisayo neso mintoênyoêne hwasoho. 5 Ngko iyo hwapɨngo ne hwoênyoho. Sekwo nje apamo hwasoho. Aêamu fihwo ngkimo fosyonɨhumaso sohwo ngko kakimo wofosyohumamonnoho. Osoêno kako ipisayo ne engoênjo hweho. Sekwo ngkimo nɨsɨkwatɨfijoêmanji sekwo yoêmayo neso mifitnne hwasoho. 6 Aêamu fihwo kako ngkimo nɨsɨkwatnnyo sohwo aêamu iyopamo yofoho inyoso wae yaofontɨfi tohomo hoênaefɨwoênɨngkohofo hopaso nje Mpohwo kako hwe huhwo sohumo wae yaofonefoho. 7 Sekwo ngkimo nonɨhumafɨkuji sekwo nje hungkunomo aho yokumpohnênyo kemokosyohumafɨkujoêmanji yoêmayo soêno semoênɨngkuhwosoêno ngkimo jomo ntɨfijoso yoêmayoso sekumo woseêmaêmontonoho. 8 Sekwo ose ifijoêmanji sekwo nje inomokomoyo ne imoênɨngkuji sekwo ipisayo ne engoênjo imoênɨfitnne hwasoho. Oseso aêamu hofɨko Anɨtu kako sekumo hofiyo semokosyohumentanɨngkuhwosi sehonɨngkuji hofɨko nje Mpohwoe yofe engo nohoênomapitnnefoho. 9 Nje Mpohwo kako ngkimo sɨmeho engo ntapɨwoênɨngkiso hopaso ngko sekumo sɨmeho sejopalokweno. Oseso sekwo nohumafɨkuji ngko hitoho engo sejopalokwe soêno huno syafɨsyɨkuji yoêmayoso ifitnne soêno sekwo Anɨtumneêno yokumpohnênyo fiyohoênɨmno. 10 Ngko nje Mpohwoe hungkunomo tɨfi itoêno inɨngkawowoênɨngkohe soêno ngko huno niyohi, nje Mpohwo hitoho engo ntopalofoho. Oso paênyoso sekwo nje hungkunomo tɨfi itoêno inɨngkafijoêmanji sekwo huno ole waseyono. Jisas kako hitoho engo nejopalofoho. 11 Olo hungkuno selalokwe loso nje sɨmonyo iyoso sekwoe sɨmeho moêmo wasewenonji selalokweno. Oso sɨmonyo iyoso sɨmeho moêmo engo mɨkunɨmposo wasemoênɨngkuhwono. 12 Jisas ose nalonto nalɨmento, Sekwo olo hungkuno losomo tɨfi itoêno finɨngkamno. Ngko sekumo sɨmeho sejopalokwe hopaso sekwo nomêne aêamu somo ose uyɨmno. 13 Aêamu fihwo kako kakoe aêamu somo sɨmeho uyɨhwoso soêno kako aêamu hisofe mango sohwamo ole ulɨmontonoho. Olo aêamu lomo sekwo nusɨhutofɨkuji ngkimnohini fonjanɨhumno. Ose loso sohwo kako kakoe aêamu hisomo sɨmeho uyoso yakoloênnyo hweho. 14 Sekwo sohwasi nje hungkunomo tɨfi itoêno nnɨngkapɨfijoêmanji sekwo nje aêamu ne hwasoho. 15 Syoho ulohofiyo sohumo kakoe hwe engo sohwo kako yoêmayo soêno yoloho mujoênjo hweho. Oêo, syoho ulohofiyo sohwo kako syohoênohini inyo hweho. I ngko olohonta nje syoho ntohofiyo hwasoho eso apaêno maselɨmnehono. Oêo, yoêmayo hungkuno nje Mpohwo ntɨmentiso soêno ngko yolohoso nto selɨmalefoho. Osoêno olohonta nje aêamu hwasoho selalokweno. 16 Sekwo ngkimo sɨmoêmo nakwoe Hwe Engoêne hwehontɨfi nɨhwosopoêmentohofɨhwonɨêmaho. Oêo, ngko sɨmoêmo sekumo nje aêamu ne imoênyoêne sehwosopoêmentohe hwasoho. Sekwo ipisayo ne intoênyoêne sehwosopoêmentohe hwasoho. Oseso olo syoho sejopalokwe loso sekwo yahonɨngkuji aêamu piênɨngoso nje hungkuno nupaênɨngkuji tɨfi nnɨngkapɨfijoso nakwoênji neêno nohumantokutnnefoho. Oseso sekwoe syohoso ne imoênɨngkuhwosoêno neêno nowentɨhwonefoho. Sekwo ose ifijoêmanji sekwo nje Mpohumo nje yofe ulɨkuji yoêmayo soêno jomo ulɨfijoso kako wosejapmmontonoho. 17 Oseso ngko olo hungkuno loso apaêno yokumpohnênyo selalokweno. Sekwo aêamu somo sɨmeho nehopi uyɨmno. 18 Hwe moyaêmi hwahoponjo yahinomo tɨfi inɨngkowalokwofoso hofɨko sekwoe mangohwa imoênɨfijoêmanji sekwo huno ole waseyono, Sɨmoêmo ngkineêno mangohwa imoênɨmalofofoho. 19 Sekwo olo hwaho loponjo yahinomo tɨfi inɨngkafijontentesi u, aêamu hwaho loponjoso sekumo nakwoe aêamu hwasoho selɨfijoso sɨmeho sejapɨkutnnesohilo. I osoêno sekwo olo hwaho loponjo aêamu hwasɨêmaho. Oêo, ngko olo hwaho loponjo yahino somneêno iêwaho itoêno ehumayoêne soêno sehwosopoêmentohefoho. Oseso hwe moyaêmi hwahoponjoso hofɨko sekwoe mango hwafoho. 20 Olo hungkuno nto selohe loso huno itoêno fɨsyafɨhupmno. Aêamu syoho ulohofiyo sohwoe yofe engoso kakoe hwe engo sohwoe yofe engomo muyakolofonehoho. Oso hisoêno sekwo inɨngo seyɨhwoloho. Ngko sekwoe hwe engo sohwoênɨmo aêamu hwahoponjoso wonyo ntohofɨwoênɨngkohofo hopaso hofɨko sekumo woselohofantɨfeho. I hofɨko nje hungkunomo haloho nɨpopijoêmanji hofɨko sekwoe hungkunomo haloho wosepeentɨfeho. 21 Aêamu hwahoponjoso hofɨko Anɨtu nɨhwatɨmentiso soêno huno muyofoho. Osoêno sekwo ngkimo tɨfi nnɨngkapɨwoênɨngkohofo soêno hofɨko yoêmayo wonyoso woselohofantɨfeho. 22 Ose nalonto nalɨmento, Ngko olo hwaho lopo mapeênjo ntentesi nje hungkuno hofɨkimo mulontɨêmtentesi hofɨkoe honɨngkano wonyo somneêno hofɨko tohino engo momafɨkutnnesohilo. I osoêno nje hungkunomo nto ko upaênɨmotofoso hungkuno homo somo sɨmeho muyofoho. Osoêno sɨkuno aeêuyo somo ngko wonyo hwasoho ulɨêmeêno hofɨko mampiênyo ifitnnefoho. 23 Aêamu nje mangohwo imoênoso sohwo kako nje Mpohwo huhuneêno mangohwo osenohini umoênɨmonte hweho. 24 Yoêmayo syoho wonyoangkafo aêamuso hofɨko miyɨwoênɨngkiyohofoso ngko hofɨkoênjopo itɨhwamentohefoho. Oso syoho hiso ngko miyoênjo yontɨêmtentesi hofɨkoe wonyo honɨngkano somneêno tohino engo momafɨkutnnesohilo. I osoêno olohonta oso syoho wopɨngo imentohe somo hofɨko tɨmo uhwonontɨfi hofɨko ngkineêno nakwolaho ntɨmentohofoso hofɨko ngkoênji nje Mpohwo huhwoênjiye mangohwa imoênɨmentohofofoho. 25 Oseso hofɨkoe yahino homo somneêno oso Anɨtuye hungkuno angaêno mtɨêmokinyoso ne imoênalofoho. Oso hungkunoso olenoho. Ngko hofɨkimo wonyo ko mulohofahonɨngko hofɨko ngkineêno siki mangohwa imoênnyofoho. 26 Ose nalonto nalɨmento, Ngko nje Mpohwoe poneêno nosɨêmo Anɨtuye Towahuno yokumpohnênyo sosofitofosyosehumayoêne sohumo ngko sekuyepono wolɨhwatɨmonnoho. Oso Towahuno huhwo sohwo kako hungkuno neênjo hweho. Kako Mpohwoênji fosyohumawoênɨngkiso sohwo kako sekuyepono wapmmontonoho. Kako nopɨhwosi ngkineêno hungkuno wolɨjwasemoêmontonoho. 27 I sekwo ngkoênji nje syoho emaêmentohe sohonta humamotohwone soêno sekwo huhwahnnonji aêamu hopiênonohino somo yoêmayo upaênontɨfi uhwonontɨfeso filutɨhwafɨkuno.