Lukas 22

1 Gubuê tsiraê garam Yuda gada bret yist maêa gin faringêa bida Angira Atupa Sib gubuê gan isu uts i waêan. 2 Da garam pumuêa Anutu wain gudzun rusan da garam gudzupuê i nan faidagin isau sanab maradzigin i isa Yisu funub, i ribarangan irat i ampan bungê ais ribarangan. 3 Da Yudas Iskariot, rib 12 ugu gan mangan, Sadang yatangê gin, 4 da ifan da garam pumuêa Anutu wain da garam singaari mpada tayangê Ungar Mararam gudzun rusan. Da irut itip nan i sanab idzuwai rima Yisu fada ribarangan banginggan. 5 Da ribarangan nugun inuf da itaga ruan i rima moni da arangan. 6 Da Yudas yis yaring gin da ifangê i gubuê bini mangan ampi tsiraê mamida i waêan da rima Yisu da ribarangan. 7 Gubuê miamun nam gadan tsiraê bret yist maêa gin iwaê. Da gubuê arigi da bungê ais dumpa narun i tsarada suda dangki i maran fura gubuê Angira Atupa Garam Israil Sib. 8 Da Yisu itangin Petrus da Yowanis da ini, “Wafan da watip nam gadan maran fura Angira Atupa Sib i agi mpruêa ruangê gadan." 9 Da rib iruê igi igutin, “U ni aga tipa mingêa anungê?" 10 Da Yisu ini, “Gubuê agam atangêa Yerusalem igi da agam bungê awaê da garam manga buaringêa gur mpui gan, da agam watsungê arangan nafa ungar aranga fa atangêa gin. 11 Da wani da ungar rinunggan igi nabiani, ‘Kidungwaga tsiraê igutin: Mumai wasaê ampi gan mangan imingê anungê i dzi ruta ribangê atsungêa i dzi gada nam maran fura Angira Atupa Sib in?’ 12 Da arangan bungê asantingê agam i mumai tsiraê mangan imingê ungar wagungê tipa sib, da agam watip nam gadan namingê igi." 13 Ribarangan ifa gamp igi da itsangan nam ibi Yisu nidan, ibinigi da ribarangan itip nam gadan Atupa Sib. 14 Gubuê maran ibawaê da Yisu irut aposelan impa i gada nam. 15 Da Arangan ini da ribarangan ibiani, “Dzi marangê yari iyus i ruta agam mpruêa ruangê gada nam Angira Atupa Sib ani raiyi da dzi musa uda barabin. 16 I dzi nani da agam, dzi wasangê tipa gada nam Angira Atupa Sib ani u, nasangê wainggan waêa suda nidzun mingêa Anutu nanggan mpada tayangê gan garaman." 17 Da iyu kap wain gurun da irim dangki gin sib da ini, “Wayu wabiaê da wanum wasangê ruam. 18 I dzi nani da agam, aruani da fadan dzi wasangê tipa numa wain gurun nafan nasangê Anutu nanggan mpada tayangê gan garaman naba." 19 Da Arangan iyu bret da irim dangki gin da ibrang da irim da ribarangan da ini, “Nani dzi nidzunggangê dzi rima i agam; agam watsungê sanab bida ani i maram fura dzi." 20 Iga nam sib raiyi da Arangan itip iyu kap wain da ini, “Kap wain aruani nan utusa i ruan gin faê Anutu nanga yaba i dzi biê gangê, aru yata rai i agam. 21 “Da bitsintaê waringantin! Garam rima dzi fadan da garam ipiap banginggan irut dzi iga nam da aruani. 22 Da Garam Narunggan bungê amamp natsungê nan ragada sib yaba i Arangan, da bitsintaê garam rima Arangan fada garam ipiap banginggan natsauê i runggan!" 23 Da ribarangan igut i ruan ifa iba i ribarangan gan idzuwai bungê anang nabinigi. 24 Da ribarangan isu ufuai da ruan i nan manga suda garam tsiraê i ribarangan. 25 Da Yisu ini da ribarangan, “Rib mingêa manaê i utup Yuda king rusan irasu utupan da impa tayangê gin, da ini ampan gan tsarifa bida garam maraampi. 26 Da bitsintaê sanab bida nigi anungê waêan da agam. Garam tsiraê mingêa wasaê i agam narasu runggan nabi mamaê rini faê aga, da garam gudzun da nasu mamaê gum utaê angu. 27 I mangan igi su bingan tsiraê, garam mpada ruêa i gada nam ma garam pumuêa garam i rima nam gadan rutin? Aru mpada i gada nam! Da bitsintaê dzi mingê wasaê i agam ibi garam pumuêan. 28 Gubuê nam intsaêan waêan da dzi da agam imunti impruê da dzi. 29 Da ibi dzi ramanggangê irim nampang da dzi i mpada tayangê garam da dzi rim nampang igi da agam. 30 Da agam bungê arut dzi nampruê ruangê gadan da numan mingêa dzi nanggangê mpada tayangê garamangê. Da agam bungê ampa nayab bintip king ruas gan i mpada tayangê garam Israil utup 12 ugu. 31 “Saimon, Saimon, waringantin, Sadang igut i Anutu sib i untsianga i agam bida piriangêa rais nidzun sinungê piriats. 32 Da bitsintaê dzi yugin da Anutu i agu, Saimon, i agu anungê tirida nanggam muarutsan rai u, da gubuê u parima i ruam da warim riniurun da raim rusam." 33 Da Petrus ini, “Nifutsarif, dzi tip ruangê sib i ruta agu mpada karabus da mampan mpruêan da agu." 34 Da Yisu ini arangan nanggan mungaê, “Dzi nani da agu, tatariê wasangê kakarakan da pas wasaê nasangê u tungêa i dzi sangêa iruê da bits sib raiyi." 35 Da Yisu igut i ribarangan, “Gubuê dzi tanginda agam fada ruta moni da tayap da faga gangkang maêan, da agam isau ruam i nam fain, ma imaê?” Da ribarangan ini, “Imaê." 36 Arangan ini da ribarangan, “Da aruani da bida manga moni gan da tayapan rumingêan, da nayu nampruê. Da bida manga bainatan maêan da narim ngarukui gan i suba bainat mangan. 37 Nan profet akaran mungê ini ibiani, ‘Ribarangan itsanga arangan ibi garam maisan.’ Dzi nani da agam, nan akaran ugu bungê asu nidzun nayab i dzi. Hai, nan akaran yaba i dzi mungê ugu ibawaê i suda nidzun." 38 Da ribarangan ini, “Nifutsarif, watsangan bainat iruê ani.” Da Yisu ini, “Nan isangê." 39 Da Yisu ifa Mamai Oliv ibi Arangan tida fada gin ugu, da gan riban yatsungê gin. 40 Gubuê waêa mumai igi da ini da ribarangan, “Agam wayugin da Anutu i agam anungê ruaêa i nam intsaêan." 41 Da Yisu iyung pas angu ifa sinungê ribarangan isangê ampap garam tapuda tauf da faruwaêa gin da ifa idzaê faga gudzun iruê da iyugin, 42 “Ramangê, bida u maram furan da wayu barabin dzi ntafa gin ani sinungê dzi, da bitsintaê anungê atsungêa dzi marangê furan gaê u. Wanang wabi u maram furan." 43 Da angira gunungun mangan iwaê da Arangan da irim riniurun rutin. 44 Yisu imingê wasaê i nam tsakia tsiraê da iyugin ruta wangunggan santan da uwats uwats tsiraê itituê iruê ibi biê tituêa ruêa intap. 45 Gubuê Yisu udagin sib da uriêa fadan da riban atsungêa gin, da itsanga tuasarangan gingêa marampruê sib, i ribarangan irabub i barabin da igingê, 46 da Arangan ini da tuasarangan, “Ibianungê da agam igingê? Wauriê da wayugin da Anutu i agam anungê ruaêa i nam intsaêan." 47 Gubuê rungê nida nan da garam utup fain iwaê, da rib 12 igi gan mangan nida Yudas in imungê i ribarangan. Arangan ifa su uts da Yisu i tsutsufa Arangan. 48 Da bitsintaê Yisu ini da arangan, “Yudas, u ni rima Garam Narunggan fadan da rib ipiap banginggan i nam tsutsufan?" 49 Gubuê rib ruta Yisu tsanganda nam nanga i waêan igi da ini, “Nifutsarif, aga isa ribarangan i bainat?" 50 Da ribarangan mangan itsapi garam pumuêa Anutu wain tsiraê mamaê guman mangan ringan bini rai. 51 Da bitsintaê Yisu ini, “Nantsup! Anungê nanga bida nigi u.” Da Arangan igif garam igi ringan da idaum. 52 Ida Yisu ini da garam pumuêa Anutu wain gudzun rusan da garam singaari mpada tayangê Ungar Mararam gudzun rusan da garam gudzun bada i uda Arangan igi, “Mani dzi garam isa nam da wapa nam, ida agam iba inting da bainat da gai? 53 Gubuê sib angu da dzi rut agam impa Ungar Mararam, da agam anungê itsara bangim i dzi u. Da bitsintaê agam gubuê maran gam aruani da nam mimin nampanggan isu wain da aruani." 54 Ribarangan impung Arangan, da iyu Arangan ifa garam pumuêa Anutu wain tsiraê ungaran. Da Petrus itangin tap yatsungê ribarangan. 55 Da gubuê ribarangan arungêa dzaf mingêa ungar manaê igi da mpada wafiêan, da Petrus impa impruê da ribarangan. 56 Da sagat gum mangan itsanga arangan mpada dzaf bururung arida gin igi da intrung maran i arangan da ini, “Garam arigi binigi irut Yisu." 57 Da bitsintaê Petrus itungê gin, da ini ibiani, “Sagat, dzi anungê isruê i arangan." 58 Pas angu da garam mangan itip itsanga arangan da ini, “Agu binigi, ribarangan gan mangan agu.” Da Petrus ini, “Garam ai, anungê dzi u." 59 Gubuê maran manga yusa ruan sib da garam mangan itip ini nan rururungan, “Nan nidzun, garam aruani irut arangan, i arangan garam Galili ibinigi." 60 Da bitsintaê Petrus ini, “Garam ai, dzi anungê isruê i nan u nidan igi u!” Gubuê arangan rung nida nan igi da tatariê ikakarak. 61 Da Nifutsarif itaning da intrung maran i Petrus, da Petrus maran ifur nan Nifutsarif nidan, “Aruani da u bungê atungê maram i dzi nasangê iruê da bits, raiyi da tatariê namus kakarakan." 62 Da Petrus iwaê sinungê mumai igi da irang ruta wangu barabin tsiraê bingan. 63 Da garam muntida tayangê Yisu irim umpur i Arangan da yis Arangan maisan angu. 64 Da ribarangan ipatiê Yisu maran sib da igut i Arangan, “Bida u profet, da wani, manga is agu?" 65 Da ribarangan ini nan nifun maisan ampi bingan iyab i Arangan. 66 Gubuê pisan da tataê, da garam gudzun ruas da garam pumuêa Anutu wain gudzun rusan da garam gudzupuê i nan faidagin impruê ruan ibi utup tipa nan, faringêa bida Sanhidrin gin. Da iyu Yisu iba munti ribarangan maran. 67 Da ribarangan ini, “Bida u Kristus, Garam Anutu Ragadan, da wani da agai.” Da bitsintaê Arangan ini da ribarangan, “Bida dzi nidan da agam, da agam wasangê i muarutsan, 68 da bida dzi rima nan guta gin fain biaêan da agam, da agam wasangê nida mungaê. 69 Da bitsintaê aruani da fadan, da Garam Narunggan bungê ampa Anutu Nampang Wain banginggan bini." 70 Da ribarangan igutin, “Da Anutu Narunggan agu?” Ida Arangan ini, “Agam runggam ini ibi dzi Arangan ani." 71 Ida ribarangan ini, “Agi anungê rungê rima udzungê i rib fain i nida nan yaba i arangan u. Agi runggangê iringant i nan asub imingê arangan nifunggan rururungan sib."