Lukas 21

1 Gubuê Yisu raêa i maran da itsanga garam ruta nam bunump fain rima dangki gan ruêa bugis dangki gan. 2 Da sagat yaruf sauda runggan mangan ibinigi irim moni narun iruêrun iruê. 3 Da Yisu ini, “Dzi nani nan nidzun da agam, sagat yaruf sauda runggan aruani irim nam iyus rib fain aga. 4 Garam santan igi irim dangki gan imingê nam bunumpan tsiraê igi isangê maran furan gan. Da bitsintaê sagat sauda runggan ani irim nam bunumpan santan aru rima arangan sib in." 5 Rib fain ini nan da ruan iyab i Ungar Mararam giradan i tauf grigriêan bini bini da nam rima suda dangki fadan da Anutu. 6 Da bitsintaê Yisu ini, “Nam idzuwai agam tsangandan da aruani, da gubuê mangan bungê abawaê da tauf mingêa raragun i ruan ani bungê agruê ruan sib." 7 Da ribarangan ini, “Kidungwaga tsiraê, gubuê idzuwai da nam igi bungê awaê? Da nam idzuwai igi bungê awaê mungê i santingêa nam igi gubuê gan isu uts i waêan?" 8 Da Yisu ini, “Watsanga runggam sib i garam iyuêa nam. I garam ampi bingan bungê aba i dzi binganggangê da nani, ‘Dzi Arangan ani,’ ma ‘Gubuê maran isu uts.’ Da anungê atsungêa ribarangan u. 9 Gubuê agam ringanta i nan i nam isa ruan tsiraê waêan, da anungê ratan u. Hai, nam igi bungê awaê mungê raiyi, da bitsintaê gubuê buntun wasangê i waêa sung u." 10 Ida Arangan itip ini da ribarangan, “Garam intap manga bungê auriê da nais garam intap mangan, da king mangan bungê auriê da narut king mangan nais ruan. 11 Da nam maisan bida ani bungê awaê namingê intap mara maran: tufuringê, rinin gingêan tsiraê tsiraê fain da nam mangits tsiraê, da nam ratan da nam santingêan bungê awaê namingê maranguntung. 12 “Da bitsintaê nam bida ani bungê awaê mungê raiyi: garam bungê ampung agam da narim tsakia da barabin da agam. Tuasarangan bungê araru agam namingê ungar mpruêa ruan gin da narim agam i karabus. Da nausu agam i muntida king da gabman tsiraê maranggan, i wain, agam yatsungê dzi. 13 Da nigi bungê awaê abi sanab agam nida dzi sisingê bini gangê wasi da santingêa agam nanggam muarutsan da ribarangan. 14 Da bitsintaê anungê maram fura i tipa nan mungê i rima runggam sib i nida nan bida anungê. 15 Dzi bungê arim nan da mararuru da agam i agam ipiapam anungê nida nan mungaê da agam. 16 Da anungê rib fain angu u, agam utupam ibinigi â ramanggam da rinanggam da raim rusam da rinum rusam â bungê arim agam nafan da garam fain banginggan da nais agam fain funub. 17 I dzi angu da rib santan bungê abugin agam. 18 Da bitsintaê nam arigi mangan anungê isangê siata agam ganunggam rai, imaê. 19 Agam buaringêa barabin da muntida babampaf in da agam bungê awaê da nam mpada ratar. 20 “Gubuê agam tsanganda garam singaari muntida wafiêa Yerusalem da agam wasruê gin nabi gubuê siata gamp igi iba su uts. 21 Ida rib mpada intap Yuda narunt sib nafa mamai, da rib mpada wasaê i gamp Yerusalem igi nawaê sib, da rib mpada manaê i gamp igi anungê tipa atangêa fadan u. 22 I gubuê arigi da Anutu bungê arim nam mungaê natsungê nan santan akaran ugu. 23 Da gubuê arigi bungê arim barabin nayus da sagat wangundan da sagat narun mitan. I barabin tsiraê bungê awaê intap ani da Anutu bungê ayats wangun sasusan ragun i garam Yuda ani. 24 Da garam singaari bungê ais ribigi fain funub i bainat da nampung fain nasu garam karabus nafa intap santan. Da garam mingêa manaê i utup Yuda bungê arasu Yerusalem nasangê garam manaê igi gubuê gan bantsupan. 25 “Da nam santingêan maran mangan bungê awaê i gubuê da ukam da ngantam. Da mingêa intap da garam utup santan bungê arat da uwayant bungê arintsum ruan i uruts kungan da iyamiyam tsiraê. 26 Maran bungê afur nam nanga i waêa intap da bungê arat da maran nadidirunt da namamp asub, i nam riniurun idzuwai mingêa maranguntung wagungê bungê audza i ruan. 27 Mingêa gubuê arigi da ribarangan bungê atsanga Garam Narunggan bada mingêa maraum wasaê ruta nampang da nanggan dzidziwandan tsiraê. 28 Gubuê nam bida nigi bungê waêan da wamunti wayab da anungê ratan u, i gubuê Anutu tipa uda agam iba su uts." 29 Arangan ini nan raman ani, “Watsanga gai fik da gai santan aga. 30 Gubuê gai yafan puêan da agam bungê atsangan da wasruê gin nabi gubuê rima maraburuab da nidzun waêan isu uts. 31 I sanab bida arigi angu da gubuê agam tsanganda nam bida nigi waêan da wasruê gin nabiani, Anutu nanggan mpada tayangê gan garaman iba su uts. 32 Dzi nani nan nidzun da agam nabiani, rib utup rungê mpadan da gubuê aruani fain rungê bungê ampai nasangê nam santan igi waêan. 33 Gunungun da intap bungê antsup sib, da bitsintaê dzi nanggangê bungê amingê ratar nanting. 34 “Watsanga runggam sib i agam anungê numa mpui maradidirunt yusan da nanga sanab maisan da maram anungê furan nan i nanggam mpada bini mingêa intap ani. I sanab bida nigi bungê arim wangu barabin da agam, da gubuê arigi bungê awaê da agam sung angu 35 nabi pungip mpunga apu. I gubuê arigi bungê awaê da rib santan mpada mingêa intap da intap. 36 Ibinigi da gubuê sib angu da agam watsanga runggam sib, da waugin i uda riniurun i waêa sinungê nam santan nanga i waêan igi ida muntida Garam Narunggan maran." 37 Gubuê sib angu da Yisu ifis i nan imingê Ungar Mararam, da idziang santan Arangan ifa mpai Mamai Oliv. 38 Da garam santan iba da tataê maratait i ringanta i Arangan fisa i nan mingêa Ungar Mararam.