Lukas 19

1 Yisu iwaê gamp Dzeriko da iyung wasaê i gamp igi. 2 Da garam mangan impai gamp igi binganggan Sakayus, arangan garam uda takis gudzunggan ruta nam bunump. 3 Arangan maran ifur i tsanganda Yisu igi ibianungê, da bitsintaê arangan uts angu da arangan wasangê tsanganda Yisu i garam ampi tsiraê igi. 4 Ibinigi da arangan irunt imungê sanab Yisu yunga fada gin igi da iyab gai tsiraê mangan i tsanganda Yisu. 5 Gubuê Yisu bawaêa mumai igi, da irarab iyab da ini ibiani, “Sakayus waruê sung, aruani da dzi bungê ampa ungaram." 6 Sakayus iruê sung angu da iyu Yisu iyab ruta nugun tsiaêan. 7 Garam santan tsanganda nam igi da igurungur da ini nan da ruan, “Arangan isu ampi ifa rut garam maisan bingan aga impai." 8 Da bitsintaê Sakayus imunti iyab da ini da Nifutsarif, “Nifutsarif, waringantin. Aruani da dzi bungê ais nam bunumpangê ani wasaê farab; marafaingê bungê amingê da marafaingê da dzi narim da garam sauda runggan. Da dzi bungê atip narim nam mungaê da rib dzi iyuêan da uda takis yusan gin, da dzi bungê arim raragun gin nasangê 4." 9 Da Yisu ini, “Gubuê aruani angu da utup ungar aruani iwaê da nam rima sib, i garam ani binigi Abraham yangin gan nidzun. 10 I Garam Narunggan iba i sauda garam runta asub da tipa udan." 11 Gubuê ribarangan rungê rima ringan i nan igi, da Arangan ini nan raman mangan, ibiani Arangan isu uts da Yerusalem da garam maran ifur i Anutu nanggan mpada tayangê gan garaman bungê awaê dzidziwan sung angu namingê igi. 12 Da Arangan ini, “Garam tsiraê mangan nanga i fada gamp bingibing mangan i king tsiraê rima bingan king da arangan ida tipa badan i mpada tayangê intapan. 13 Ibinigi da arangan inuê garam guman 10 impruê, da irim moni mair bitsintaê bitsintaê isangê santan. Da arangan ini, ‘Warim gum i moni ani nasangê dzi tipa badan.’ 14 Da bitsintaê rib intap igi ibugin arangan, ibinigi da itangin garam fain yatsungê arangan i gamp igi i nida nan da king tsiraê bida nigi, ‘Aga bugin garam arigi suda aga king gangê!’ 15 “Da gubuê arangan suda king sib da itip iba gampan. Ida arangan itangin nan i mamaê gum arangan rima moni rutin ugu i bada rutin. Arangan ini sruêagin i moni rima rutin ugu iyingê ibianungê. 16 Da miamun iba da ini, ‘Tsiraê, u moni mair gam dzi nang gum in da dzi waê da moni mair 10 impruê.’ 17 “Da garam tsiraê gan ini, ‘Dzi mamaê gumangê bini, u nang bini iyus. U mpa tayangê nam isiê angu da u santingê ibi dzi sangê rima nam tsiraê yaba u banginggam, ibinigi da u bungê ampa tayangê gamp tsiraê 10.’ 18 “Da garam suda iruêrun iba da ini, ‘Tsiraê, u moni mair gam dzi nang gum in da dzi waê da moni mair 5 impruê.’ 19 “Da gan garam gudzunggan ini, ‘U bungê ampa tayangê gamp tsiraê 5.’ 20 “Ida garam mangan iba da ini, ‘Tsiraê, u moni mair gam aruani. Dzi patiê i bruê isiê mangan da dzi dzigin. 21 I dzi rat i agu i u garam nida nan mara dampan. U yu moni i rib fain uwatsuwatsan da ufum nam gadan u mamida ntangan.’ 22 “Da arangan garam tsiraê gan ini rutin ibiani, ‘U garam gum maisan! Dzi bungê araru agu natsungê u nanggam nidan. Amaê, u ni dzi garam nan mara dampan, a? Da dzi nang da iyu moni dzi mamida suda uwatsuwats in da nam gadan dzi mamida ntangan igi, a? 23 Ibianungê da u madarim dzi moni gangê da garam mpada tayangê moni i rib ba udan i nanga gum in? Bida nigi da gubuê dzi tipa badan da dzi sangê uda isiê pas ragun i dzi moni gangê.’ 24 Ida arangan ini da rib muntidan igi ibiani, ‘Wayu moni sinungê garam arani da warim wafan da garam aru waêan da moni mair 10 ugu.’ 25 “Da ribarangan ini, ‘Da bitsintaê, Tsiraê, garam igi yu moni mair 10 sib.’ 26 “Garam tsiraê ini nan mungaê ibiani, ‘Dzi nani da agam santan nabiani, manga uda nam da nanga gum bini yaba gin da rubungê ayu fain. Da bitsintaê manga uda nam isiê pas angu da mamida nanga gum in, da dzi bungê ayu sinungê arangan. 27 Da bitsintaê wayu rib aru rima ipiap i dzi da buginda i dzi suda i king gan ugu naba aruani da wais funub i dzi maranggangê.’" 28 Gubuê Yisu nida nan aru nigi sib, da Arangan iyung iyab ifa i waêa Yerusalem. 29 Da gubuê Arangan waêa uts da Betfage da Betani mingêa Mamai Oliv, da itangin garaman atsungêa gin iruê imungê, 30 da ini rutin ibiani, “Agam wamungê afa gamp isiê mangan naga, da gubuê agam atangêa fada gamp igi da agam bungê atsanga dongki narun mangan dzuran, da agam wapiraê da wayu aba. 31 Bida rib fain guta agam, ‘Ibianungê da agam ipiraê dongki igi?’ Da wani rutin nabiani, ‘Nifutsarif ini nanga gum in.’" 32 Ibinigi da rib tanginda mungêan igi ifan da itsanga ibi Arangan nida rutin ugu. 33 Gubuê ribarangan piraêa dongki narun da rinun rusan igutin, “Agam ibu piraê dongki narun igi iyaê?" 34 Da ribarangan ini ibiani, “Nifutsarif ini nanga gum in." 35 Da ribarangan iyu ifa da Yisu da ribarangan irim ngarukui gan iyab gin da itangin Yisu iyab impa gin. 36 Yisu rungê impai i dongki ifan da ampi tsiraê igi iyafus ngarukui gan i sanab imungê i Arangan. 37 Gubuê Yisu basuda uts mumai sanab ruêa Mamai Oliv igi da utup tsiraê atsungêa Yisu nugun itsiaê da iyaiê nifun tsiraê i tsarifa Anutu i nam mara maran santingêa Anutu nampanggan ribarangan tsangandan ugu. 38 Da ribarangan inuê, “Nifutsarif ifinti king aru bada i Arangan binganggan! Nan nufan imingê wasaê i Anutu mingêa Gunungun da garam intap! Anutu impa wagungê ruta nam puatsadan!" 39 Da Farisai fain mingêa wasaê i ampi tsiraê igi ni da Yisu ibiani, “Garam tsiraê, wampiê gam utupam atsungêa i agu ani i anungê nida nan bida nigi u." 40 Da bitsintaê Yisu ini ibiani, “Dzi nani da agam, bida ribarangan frap nufan da tauf santan bungê ayaiê nifun tsiraê." 41 Gubuê Yisu basuda uts da Yerusalem da tsanganda gamp tsiraê igi da irang gin. 42 Da ini, “O Yerusalem, dzi marangê yari i u madasruê gin i sanab mpada bini da gubuê aruani, da bitsintaê idzigin ruan i u maranggam. 43 Gubuê maisan bungê abawaê da agu da u garam ipiapam bungê arim ntiang i intap da gai natsuafiê agu i isa agu. Da bungê amunti natsuafiê agu nasangê fa arida tam sib. 44 Da ribarangan bungê abrang agu da utupam mpada wasaê i agu rai. Da u bungê asu intap utaê, da tauf rima ungar in manga wasangê mingêa ragun i tauf mangan u. I wain ibi u wasruê i gubuê Anutu bada i rima agu sib." 45 Ida Yisu ifa Ungar Mararam da idaru garam rantsa apu da nam fain i suba moni gin i tsaradan da Anutu rai. 46 Da ini da ribarangan ibiani, “Nan mingêa Anutu nanggan ratar akaran ibiani, ‘Dzi ungarangê igi nasu ungar udagin.’ Da bitsintaê agam inang ibi garam wapa nam mumai gan kupa gin!" 47 Gubuê sib angu da Yisu ifis i nan imingê Ungar Mararam. Da bitsintaê garam pumuêa Anutu gudzun rusan, da garam gudzupuê i nan faidagin, da garam gudzun mingêa wasaê i ampan igi intsaê i isa Arangan funub. 48 Da bitsintaê isau sanab wasi i isa Arangan funub i garam santan isu uts da Arangan i rima ringan i nan santan Arangan fisagin.