Lukas 18

1 Yisu ini nan raman i santingêa riban atsungêa gin i udagin maiê maiê, da bida sauda nidzun da anungê raraiêa gin u. 2 Da ini ibiani, “Mingêa gamp mangan da garam raruda garam mangan impai, da anungê irat i Anutu ma itsarif garam gar u. 3 Da sagat yaruf mangan impai gamp igi mpruê, da iti fa rutin maiê maiê i nida wangu barabin gan bida ani, ‘Warim nan rima dzi sib i gangê garam ipiapangê aga.’ 4 I gubuê fain da garam igi bugin rima sagat igi sib, da raiyi ini i wangunggan, ‘Dzi anungê irat i Anutu ma itsarif garam gar u, 5 da bitsintaê sagat yaruf ani iti ba da dzi maiê maiê da dzi raraiê. Dzi bungê arim sib i barabin gan, i maba maiê maiê da dzi da dzi awangê amaê i.’" 6 Da Nifutsarif ini, “Watsanga garam maisan raruda garam igi nanggan nidan. 7 Da ibianungê? Anutu wasangê rima garaman piriangêan sib aru udagin rutin gubuê da idziang sib angu, ma? Ma Arangan bungê arim barun rutin? Imaê! 8 Dzi nani da agam, Arangan bungê arim ribarangan sib sung angu. Da bitsintaê, dzi gut i agam, gubuê Garam Narunggan tipa badan, da Arangan bungê awaê da garam muarutsan mingêa intap ani ma imaê?" 9 Yisu ini nan raman mangan ani da garam fain tsarifa runggan bini yusan da rasuda rib fain, 10 “Garam iruê iyab Ungar Mararam i udagin da Anutu, manga Farisai da manga garam uda takis. 11 Da garam Farisai imunti iyab da iyugin i runggan ibiani, ‘Anutu, dzi rim dangki da agu, i dzi anungê ibi garam fain aga u â wapa nam, da nanga maisan, da araraêan ma bida garam uda takis araga. 12 Da gubuê iruê mingêa wasaê i suntaê santan da dzi paê ruangê i nam gadan, da dzi brang nanggangê ufuman isangê 10 da dzi rim i gan bits ibiaê da agu.’ 13 “Da bitsintaê garam uda takis imunti ruguntiê. Da arangan anungê idantang iyab gunungun, da bitsintaê itsiats nugun i santingêa wangun barabin gan da ini, ‘Anutu, wagaib dzi garam maisan ani.’ 14 “Dzi nani da agam, garam aruani iwaê rururungan i Anutu maranggan sib da itip iruê gan ungaran, da garam Farisai imaê. I rib santan tsarifa runggan da Anutu bungê arasu, da rib rasuda runggan da Anutu bungê atsarif." 15 Rib fain iyu mamaê narun narun ibinigi iba i Yisu rima bangin ragun gin. Da gubuê riban atsungêa gin tsanganda bida nigi da impiê ribarangan. 16 Da bitsintaê Yisu inuê i mamaê narun narun bada rutin, da ini da riban atsungêa gin ibiani, “Watangin narun narun igi naba da dzi da anungê muntida sib in, i Anutu nanggan mpada tayangê gan garaman bungê awaê da garam atsungêa sanab bida narun narun ani sanaban. 17 Dzi nani nan nidzun bingan da agam, manga mamida muarutsa Anutu i mpada tayangê arangan bida mamaê narun da wasangê i mpada wasaê i Anutu nanggan mpada tayangê gan garaman." 18 Da garam gudzun mangan igut i Yisu ibiani, “Kidungwaga tsiraê bini, dzi bunanga bida anungê i waêan da nam mpada ratar ntingan?" 19 Da Yisu ini, “Ibianungê da u faringê dzi bini? Garam manga anungê bini u. Imaê. Anutu runtaê angu. 20 U sruê i nan faidagin sib ibiani: ‘U ma-araraê maê. U mais garam funub maê. U mawap nam maê. U madzur garam maê. Watsarif ramanggam da rinanggam.’" 21 Da arangan ini, “Dzi yatsungê sanab igi santan da dzi mamaê isiê angu." 22 Gubuê Yisu ringantagin da ini rutin, “Da bitsintaê u wanang sanab bitsintaê aruani u. Wafan da wasub moni i nam bunumpam santan da warim moni da garam sauda runggan da u bungê awaê da nam bini namingê Gunungun. Da waba atsungê i dzi." 23 Da gubuê garam arigi ringanta i nan igi, da arangan wangun ibarabin gin, i arangan garam nam bunump tsiraê. 24 Da Yisu itsanga arangan wangun ibarabin da ini, “Rib ruta nam bunump tsiraê bungê abarabin wasi i atangêa Anutu nanggan mpada tayangê gan garaman. 25 Bida kamir nida i atangêa i nil marabampun, da barabin gan wasangê garam nam bunump barabin gan atangêa Anutu nanggan mpada tayangê gan garaman." 26 Da rib ringanta i nan igi igutin, “Bidanigi da mangan igi bungê awaê da nam mpada ratar ntingan?" 27 Da Yisu rungê ini, “Nam garam gar mamida i sangêa i nangan ugu da Anutu isangê i nangan." 28 Da Petrus ini, “Waringantin, aga tangin nanggangê santan rai da yatsungê Agu." 29 Da Yisu ini da ribarangan, “Dzi ni nan nidzun bingan da agam, rib aru tanginda gampan, ma fininggan, ma raman da rinanggan, ma rain rusan, ma narun rusan, i mingêa wasaê i Anutu nanggan mpada tayangê gan garaman, 30 ribarangan bungê ayu nam nayus nidzun angu i nanggan tanginda rai ugu da gubuê mpada mingêa intap ani, da gubuê buntun aga da ribarangan bungê awaê da nam mpada ratar." 31 Yisu iyu riban 12 igi angu da ini nan rutin, “Agi yung sanab iyab Yerusalem da nan santan profet ruas akara i Garam Narunggan ugu bungê asu nidzun namingê igi. 32 Bungê arim Arangan nafan da garam mingêa manaê i utup Yuda banginggan. Da ribarangan bungê arim umpurin, da bungê arim ubin, da bungê atupingê nifu gurun i Arangan, 33 da bungê aripi Arangan, da nais funub. Da gubuê suda iruê da bits da bungê atip amunti marataê." 34 Da bitsintaê rib atsungêa gin igi anungê isruê gin, i nan igi wainggan rungê imingê maradzigin i ribarangan. Da ribarangan anungê isruê i nan idzuwai Arangan nidan. 35 Aru Yisu fasuda uts da Dzeriko da garam maran gampaman impa sanab ringampa i yaiêa ruan da garam. 36 Da gubuê ringanta i garam ampi tsiraê bafadan da igutin i nam idzuwai igi iwaê. 37 Da ribarangan ini da arangan, “Yisu garam Nasaret ugu iba." 38 Da aranga nuê, “Yisu, Tafit Narunggan, wagaib dzi ani!" 39 Da rib mungêa fada i Yisu impiê arangan, da ini rutin i mpada frap nufan. Da bitsintaê arangan iyaiê nifun tsiraê, “Tafit Narunggan, wagaib dzi ani!" 40 Yisu ifa munti da ini da garam i uda arangan bada rutin. Da gubuê arangan bawaêa uts, da Yisu igutin ibiani, 41 “U buni dzi nanga bida anungê i agu?” Da arangan ini, “Nifutsarif, dzi ni marangê dzidziwandan i tsanganda nam." 42 Da Yisu ini da arangan, “U maranggam nawaê bini i u nanggam muarutsan angu itip u maranggam." 43 Sung angu da aranga maran intap ruan da itsanga nam manaê, da yatsungê Yisu da itsarif Anutu. Gubuê rib santan tsangandan nam igi, da itsarif Anutu ibinigi.