Lukas 17

1 Yisu ini da gan riban atsungêa gin ibiani, “Nam mara maran intsaêa garam i ruaêa i asub bungê aba. Da bitsintaê mangan santingêa nam intsaêan bida nigi natsauê i runggan. 2 I bida nangan da isiê isiê tuas arani mangan ruaêa i asub, da bungê awaê da barabin nayus barabin bida dzura i tauf tsiraê i wan da tapuda ruêa uruts wasaê. 3 Watsanga runggam sib. “Bida u rainggam mangan nanga asub yaba i agu, wararu arangan, da bida parima i ruan da wasiat i gan asuban rai. 4 Da bida gubuê bitsintaê arangan nanga asub sangêa 7 da agu, da parima i ruan da tipa badan da agu sangêa 7 da gampunda ruan, da wasiat i nanggan maisan rai." 5 Da aposel ruas ini da Nifutsarif, “Wanang aga nanggangê muarutsan nasu tsiraê." 6 Da Nifutsarif ini nan mungaê, “Bida agam nanggam muarutsan isiê angu sangêa miriamp nidzun da agam isangê i nidan da gai igi bida ani, ‘Wabriê ruam da wantangê runggam waruê uruts wasaê,’ da bungê atsungê nan agam nidan! 7 “Ma bida agam mangan garam guman raba intap ma mpada tayangê dumpa tanginda gum rai da bungê bawaêan, da garam tsiraê gan anungê isangê i nidan da ba mpada ruêan da gada nam u, imaê. 8 Da bungê ani da garam guman, ‘Watsuf ngarukui gam faê da watip dzi nanggangê gadan da wayu waba da dzi nagan da nanum mungê, raiyi da wamus gada gam.’ 9 Da isangê i garam tsiraê rima dangki da arangan i guman nangan ibi arangan nidan? Imaê. 10 Da agam ibinigi, gubuê agam nanga nam santan nidan da agam bida arigi, wani wabiani, ‘Agai mamaê gum utaê angu; aga atsungê gumangê nangan.’" 11 Yisu iyung ifa i waêa Yerusalem da Arangan iyung yatsungê ampap mingêa wasaê i intap Galili da Samaria. 12 Da gubuê Arangan atangêa gamp mangan da garam 10 diginting tirida gin iwaê rutin da imunti ruguntiê gin 13 da inuê ifan, “Yisu, Tsiraê, wagaib agai ani!" 14 Da gubuê Yisu tsanganda ribarangan da ini, “Agam wafa santingê runggam da garam pumuêa Anutu.” Da gubuê ribarangan rungê yunga fadan da rininggan iwaê bini. 15 Da gubuê ribarangan gan mangan tsanganda rininggan waêa bini, da iparim i ruan da itip iba, da iyaiê tsiraê bingan itsarif Anutu. 16 Da arangan iba tatapuangê maran iruê Yisu fagan da irim dangki da Arangan. Garam aru nigi garam Samaria. 17 Da Yisu igutin, “Dzi buni garam 10 rinin dauman. Da 9 ugu ifa anungê? 18 Ibianungê da garam mingêa manaê i utup Yuda ani angu itip iba i tsarifa Anutu da fain ugu imaê?" 19 Da Yisu ini da arangan, “Wauriê da wafan; u nanggam muarutsan inang u rininggam idaum." 20 Gubuê mangan da garam Farisai igut i Yisu ibiani, “Gubuê bungê abianungê da Anutu nanggan mpada tayangê gan garaman bungê aba?” Da Yisu ini, “Anutu nanggan mpada tayangê gan garaman wabi nam garam tsangandan u. 21 Garam anungê isangê i nidan, ‘Watsangan! Arangan ani,’ ma ‘Watsangan! Arangan aga.’ Imaê. Anutu nanggan mpada tayangê gan garaman imingê wasaê i agam sib." 22 Da Yisu ini da gan riban atsungêa gin, “Gubuê maran bungê aba da agam bungê arim maram nidzun angu i tsanganda Garam Narunggan gubuê gan bitsintaê angu, da bitsintaê agam wasangê i tsangandan. 23 Garam bungê ani da agam, ‘Watsangan! Arangan aga,’ ma ‘Watsangan! Arangan ani.’ Imaê. Wampai wabi arigi; anungê atsungêa ribigi u. 24 Mingêa arangan gubuê gan da Garam Narunggan bungê awaê nabi tsuarip prikan mpara i ruan mingêa maranguntung wagungê. 25 Da bitsintaê miamun da arangan nawaê da nam tsakia da barabin ampi bingan da yangin gubuê aruani bungê abugin arangan raiyi. 26 “Nam idzuwai waêan da Noa gubuê gan mpadan ugu, da Garam Narunggan gubuê gan bungê awaê nabinigi. 27 Tuasarangan iga nam da inum, da iyu finin da isu gabun isangê gubuê Noa atangêa madzung sib da mpui fur tsiraê waêan da siata ampan santan. 28 Da isangê ibinigi angu i Lot gubuê gan ugu. Garam igan da inum, isub nam, irants nam, intang nam yamun da irim ungar. 29 Da bitsintaê gubuê Lot tanginda Sodom rai da tauf dzaf imui ibi gamiê imingê gunungun da is ribarangan santan funub. 30 “Garam gar santan bungê ampa nabinigi angu da wasangê tipa runggan da gubuê Garam Narunggan kupisa ruan. 31 Waêa gubuê arigi da garam mangan mpada ungar manaê wasangê i atangêa ungar wasaê i uda nam bunumpan u. Da manga mpada gum wasaê wasangê i tipa fada ungaran i uda nam bunumpan u. 32 Maram wafur nam waêan da Lot fininggan. 33 Manga intsaêa i rima runggan sib i nanggan mpada bini mingêa intap ani da bungê arim ganunggan rai, da bitsintaê garam rima runggan rai da bungê arim ganunggan sib. 34 Dzi nani da agam, rib iruê mpruêa ruan gingêa rabiê da idziang arigi, da bungê ayu mangan da mangan bungê ampai. 35 Sagat iruê mpruêa ruan rusa dzangkum, da bungê ayu mangan da manga bungê ampai." 36 37 Da ribarangan ini, “Nifutsarif, nigi bungê awaê amingê anungê?” Da Yisu ini, “Apu mampan mangan mingêa anungê, da ibingimp santan bungê ais ampruê gin."