Lukas 16

1 Yisu ini da riban atsungêa gin, “Garam ruta nam bunump mangan impai, da rib fain ini da arangan i gan garaman mpada tayangê i nanggan itapu arangan nam bunumpan igi ararai. 2 Ibinigi da garam nam bunump inuê garam gum igi da igut i arangan, ‘Nan dzi ringantagin yaba i agu ani ibianungê? Wakakar da wasantingê dzi i u nanggam mpada tayangê gin wainggan, i u wasangê rung mpada tayangê gin u.’ 3 “Da garam mpada tayangê igi ini angu i runggan, ‘Dzi nanang nabianungê da aruani? I dzi garam gudzunggaê ani bungê asiat dzi rai i gangê gumangê ani. Dzi anungê isu riniurun i suda mamaê gum rafa intap, da dzi riningê imiaê i yaiêa ruangê da garam. 4 A! Dzi sruê i nam idzuwai dzi nangan i bida gubuê garam gudzun siata dzi rai i gangê gumangê da garam bungê ais yaring i dzi fada rutin i gan ungaran.’ 5 “Ibinigi da arangan inuê garam uda nam ntsuman i gan garam gudzun gan igi bitsintaê bitsintaê iba rutin. Da arangan igut i miamun, ‘U yu nam ntsuman wayawai i dzi garam gudzunggaê?’ 6 “Da arangan ini binaê, ‘Dzi yu madamin oliv dram isiê isiê 100.’ “Da arangan ini da garam uda nam ntsuman igi, ‘Wampai waruê sung da wayu papiaram nam ntsuman ani, wagari rai, da wakar 50 angu.’ 7 “Da arangan itip igut i garam suda iruê, ‘U nam ntsuman gam wayawai?’ “Da arangan ini nan mungaê ibiani, ‘Dzi yu 1,000 bek wit.’ “Da garam mpada tayangê ini, ‘Wayu papiaram nam ntsuman ani, wagari rai, da wakar 800 angu.’ 8 “Ibinigi da garam nam bunump itsarif garam nan umpur mpada tayangê i nanggan igi, ibiani arangan inang gum ibi garam mararuru tsiraê. I sanab bida nigi garam intap isu mararuru iyus garam mararam i sanab tsanganda runggan bini mingêa wasaê i garam intap ani. 9 Ibinigi da dzi nani da agam, warim rib fain sib i nam bunump intap ani gan i suda agam rinum rusam. Da gubuê nam bunump igi ntsupa sib da ribigi bungê ais yaring i agam i ungar mingêa gamp mpada ratar ntingan. 10 “Manga bida mpada tayangê nam isiê angu bini, da arangan bungê ampa tayangê nam tsiraê bini nabinigi. Da mangan bida wayada nam isiê angu da bungê awaya nam tsiraê nabinigi. 11 Bida agam mamida mpada tayangê nam bunump intap ani gan bini, da Anutu isangê i rima nam bunump nidzun mingêa gunungun i agam mpada tayangê gin? 12 Da bida agam mamida mpada tayangê garam mangan nam bunumpan bini, da mangan bungê arim agam nam bunumpam da agam? 13 “Garam gum bitsintaê anungê isangê i nanga gum i garam gudzun iruê u, i maran bungê ari i mangan da nabugin mangan, ma bungê ani mais i mangan da narim runggan santan nafa da mangan. Agam wasangê i pumuêa Anutu mpruêan da nam bunump intap ani." 14 Da rib Farisai maran arida i moni yusan iringant i nan igi da igagara sib i Yisu da irim umpur in. 15 Da Yisu ini da ribarangan, “Agam rib aru tsarifa runggam bida garam rururungan mingêa garam gar maranggan, da bitsintaê Anutu isruê i agam wangunggam sib. Nam idzuwai garam gar maran arida gin yusan ugu da Anutu ibugin nidzun angu. 16 Nan faidagin da profet ruas nanggan akaran isu nan mpada tayangê agam nanggam mpadan isangê bawaêa Yowanis gubuê gan. Mingêa gubuê arigi da sisingê bini Anutu nanggan mpada tayangê gan garaman ipipuaê i ruan wasi, da ampi bingan irim ruan iyus iyus i atangêa gin. 17 Gunungun da intap isangê i ntsupan, da bitsintaê Anutu nanggan faidagin isiê mangan anungê isangê i ntsupan. Imaê. 18 Bida garam mangan siata fininggan da uda sagat mangan da arangan inang sanab araraê, ma garam manga uda sagat mangan gabunggan siatan da garam igi inang sanab araraê ibinigi. 19 “Garam nam bunump mangan yatsuf ngarukui grigriêan da fafusan bini angu. Da arangan impa bini da iga nam bini bini da nugun itsiaê da gubuê santan. 20 Da garam sauda runggan mangan binganggan Ladzarus, diginting tirida gin, riban isintungê arangan imingê garam nidzun igi muantsi nifun gan manaê. 21 Da arangan maran yari iyus i gada nam pupumuts ruêa mingêa garam igi tebolan warangê. Da iyam inang da iba damis arangan rini mais igi. 22 “Gubuê mangan da garam sauda runggan igi imamp da angira iyu arangan ifan da itangin arangan impa uts da Abraham. Da garam nam bunump imamp ibinigi da idzufungê arangan. 23 Arangan iwaê da nam tsakia iyus imingê garam mampan gampan, da arangan iraê i maran da itsanga Abraham da Ladzarus mpada i bangin marafaingê mingêa ruguntiê bingan. 24 “Ibinigi da arangan inuê, ‘Ramangê Abraham, maram wagaib dzi ani. Da watangin Ladzarus i tuguda bangin tsitsin i mpui da ba rima i dzi mangê rangarangan, ibiani dzi waê da nam tsakia iyus imingê dzaf ani.’ 25 “Da bitsintaê Abraham ini, ‘Narunggangê, maram wafur u gubuê gam mpada marataê ugu da u waê da nam bini bini da Ladzarus impa maisan angu, da bitsintaê aruani da arangan impa ruta nugun nufan, da u waê da nam tsakia. 26 Da wain bits impruê ibiani, gangar tsiraê imunti wasaê i agu da agai, da mangan mingêa ani wasangê i biadan da agam, ma agam mangan wasangê isa udziê i badan da agai u.’ 27 “Da garam nam bunump ini, ‘Ramangê, dzi nagaib runggangê da agu nabiani. Watangin Ladzarus natip nafa dzi ramanggaê gampan, 28 i dzi raingê rusangê 5 rumpai i. Wanang da arangan nafa fai nan i ribarangan i anungê bada gamp aru nam tsakia yusan gin ani u.’ 29 “Da Abraham ini, ‘Imaê. Moses da profet ruas nanggan akaran rumingê i ribarangan ringantida gin.’ 30 “Da garam nam bunump ini, ‘Imaê, ramangê Abraham, bida garam mampan mangan waêan da ribarangan da ribarangan bungê aparim i ruan sinungê nanggan maisan.’ 31 “Da Abraham ini da garam igi, ‘Bida ribarangan mamida muarutsa Moses da profet ruas nanggan, da ribarangan anungê isangê i parima i ruan bida manga muntida marataê mingêa garam mampan gin u.’"